الثلاثاء، نوفمبر 12، 2013

و لا بني ادم و لا عمره كان..

مش عمر سليمان (الله يرحمه) طلع ولا يعرف اي حاجة عن اي حاجة ... و يقولك بتاع مخابرات ال!!!
مش هو اللي قال ان المصريين مش جاهزين للديمقراطية؟ اهو طلع ولا يعرف اي حاجة..... 
كل من تنبأ ان المصريين مش جاهزين او مش مستعدين او مش فاهمين او مش عارفين طلع في البلالا و لا يعرف الهوا و لا يعرف المصريين ... و لكن ....

ابطل السخرية السخيفة و اقولكم رأيي و امري لله....

المصريين فعلا مش جاهزين بس مش للديمقراطية ... لا.... و لكن للادمية....
ايوة للادمية و ده اللي عمر سليمان معرفوش او مقالوش...
احنا كمصريين مش جاهزين نكون بني ادمين... عليا النعمة لو عملتم مستغربين و ياي مفاجاة و الهبل ده راح امد ايدي عليكم و اللي يحصل يحصل....
بدل تمثيل الصدمه يا امه، اسالوا ليه مش بني ادمين؟
و انا اقول و افضفض...

اكتر حاجة تفضحنا .... موضوع فرحتنا في الموت و ده ظهر تقريبا كل مرة يموت مننا واحد او اكتر.... دول خونة.... دول عملاء.... دول اخوان.... دول بلطجية.... دول داخلية.... الخلاصة و من الاخر دول حلال قتلهم و موتهم يفرحنا....
  
اقولكم حاكتب نقط بس لانني لو حكتب حكاوي و حواديت يبقي مش حاخلص لحد ما موت بالشيخوخة..... وعلشان كدة كملوا انتم الكلام و الديباجة.... او ما تكملوش ولايفرق لاننا كلنا عارفين الحقيقة...
- من أعلي نسب التحرش بالنساء في العالم
- من اعلي نسب تعاطي المخدرات في العالم
- جرائم القتل لاتفه الاسباب
- السحل و جلد و قتل الغير... ال ايه حد الحرابة
- اكثرنا منافق بصورة او بأخري:
   * نفاق ديني
   * نفاق سياسي
   * نفاق اجتماعي
- نفتقد في تعاملاتنا ابسط القيم الانسانية: 
   * الرحمة
   * التعاطف
   * الاستماع
   * الحديث (مش الصراخ)
- وجود اطفال الشوارع
- افلام السبكي
- نشمت في الموت لأن الميت مش من طرفنا
- نشجع علي القتل لانه مش دمنا
- نشتم اللي ضد القتل و يبقي بيعادينا
- كدابين بأسم الدين
- عايزين نحمي القيم و الاخلاق بس و احنا بنبحث عن الجنس علي النت
- اسوأ تعليم في العالم
- اسوأ علاج و رعاية صحية
-  دمرنا ما حولنا و حولناه اللي قبح و تلوث:
   * هواء
   * دوشة
   * بصريا

ها كفاية كدة؟ 
كفاية كدة....

كل النقط دي و غيرها ممكن نقول انها: نتيجة و نقول اننا ضحايا...
و ممكن نقول انها: سبب كل القرف اللي احنا فيه....
و ممكن : ننكر وجودها و نقول انه كله كذب و افترا...

كل واحد يختار اللي يريحه و يخليه ينام و ضميره مرتاح... و علي فكرة مش حاتفرق كتير لأننا لو اخترنا موقف دلوقت فمش حيستمر كتير و حنغير اختيارنا بكرة الصبح بالكتير...

اصل اخر نقطة علي بالي:
- ملناش كلمة ولا مبدأ و كلمة تجيبنا و كلمة تودينا

يا تري عمر سليمان مكانش فعلا يعرف؟؟؟؟

عايزين تعرفوا ايه هي بقي الادمية؟ اقروا الكلام تاني و حولوا بعضه لأسئلة و بعضه لأجابات.... و حتعرفوا يعني ايه بني ادم...

ليست هناك تعليقات:

إرسال تعليق