يا روح ما بعدك روح... دي كلمة الشباب الثوار اللي فاض بيهم الكيل و وصلوا الي مرحلة الغضب العارم من التلاعب بمقادير البلد و مقدرات اهل مصر... التلاعب بمستقبل المصريين، و الاهم التعامل باستخفاف بمطالب الثورة و بعقول الشباب المصري الفاهم الواعي الوطني اللي مستعد يفقد بصره و بل يفقد حياته من اجل حرية بلده....
علي الناحية التانية ....يا روح ما بعدك روح... دي برضه مقولة المجلس العسكري اللي مرعوب من كشف فضايحه ... انا معنديش دليل زي ماهما برضه مكنش عندهم دليل علي اتهام الشباب بالتأمر و التعامل مع قوي خارجية.. بس برضه اتهموهم .... و بالباطل.....
انا فكرت فيها بالمنطق و العقل (مش هلوسة المرة دي). الباشوات اللواءات و الفرق و المشير بقالهم كام سنة خدمة مع مبارك؟ ١٠ سنين... ١٥ سنة .... اكتر او اقل... يعني خدموا مع مبارك و حكوماته الفاسدة و الناهبة لثروات البلد و المرتشية علي كل المستويات لسنين بل و عقود طويلة ...
لو حد فيهم نضيف هل كان ممكن يستمر في وسط هذا المناخ الملوث و لو هونضيف و اراد ان يستمر هل العصابة كانت حتسيبه في مكانه؟؟ ليه علشان يكشفهم؟ الاجابة الواقعية لاننا مش عايشين في يوتوبيا او في الجنة...طبعا لأ..... و بناء علي عيشتنا في مصر و خبرتنا و معرفتنا بان الحرامي بـيقعد مع الحرامي و الشريف بيقعد مع الشريف و لو حصل ان في حد شريف وقع في وسط الحرامية فشرفه حيقوده لكشفهم او علي الاقل الخروج من القعدة... مش يستمر معاهم لاكتر من ١٥ سنة...غير لو كان المرء على دين خليله.... ومن عاشر القوم اربعين يوم صار منهم... نظرية مبارك مع حاشيته : اطعم الفم تستحي العين... وضد نظرية أثبتت نجاحها والدليل هو الوفاء الواضح من المجلس لمبارك .... وفاء نادر.... بصراحة اللي خلف مامتشي فعلا...
وعلشان كده طبعا لازم محاكمة مبارك تبقى سرية..... ولازم الثورة تفشل أو على الاقل تتعطل.... لانه لو كل ملفات الفساد اتفتحت.... هيكون من ضمنها ملفات وزير الدفاع وبالتبعية كل قيادات المجلس.... يعني كله هيتفضح..... والمطلوب إن ده ميحصلشي بأي تمن حتى لو كان التمن حياة شباب مصر اللي زي الورد....
نيجي لابسط الفضايح.. وده فقط الفساد المالي..... في اعضاء كتير من حكومة مبارك و مبارك نفسه كانوا عايشين في بذخ و عز و رفاهية فوق امكانيات موظفي دولة ايا كانت وظيفتهم و مكانتهم الوظيفية...كل واحد عايش في قصر وكل قصر بكذا مليون جنيه و مرتب الوزير كام؟ ١٠٠،٠٠٠ جنيه في الشهر... ؟ حتي لو فعلا ميت الف.. دي مصيبة اكبر لما موظف دولة نامية ٤٠٪ من اهلها تحت خط الفقر و مرتب وزير بعشرات الالوف شهريا... ..بلاش نتكلم على الفساد السياسي...
انا واثق (و بدون دليل برضه) ان كافة اعضاء المجلس العسكرييمتلكوا بملايين الجنيهات و انا بقي كمواطن مصري باسألهم : من اين لك هذا؟ لو فيهم واحد يقدر يرد يا ريت يرد... رد يا .......
للاسف لاستطيع حاليا غير الكتابة... وده اضعف الأيمان .....
توقيع:
علي حسني (مفيش مهلوس بعد كدة)
و يا روح ما بعدك روح.... الشباب اللي اتقتلوا و اتعموا اشجع مننا الف مرة.
