انتم منين؟ احنا من تويتر...

زمان انا و مراتي كنا بنتكلم علي حاجات كتير و في كل حاجة الا السياسة كنا بنتكلم مثلا علي حاجات زي ان بنت خالتي اتجوزت حنروح نباركلها وان عمتها مسافرة رايحة تصيف و لازم نسلم عليها قبل ما تسافر و ان ابن اختي لقي شغل ماشاء الله شغلانة حلوة و بنت اخوها نجحت و عدت من امتحانات اخر السنة .... ثم حدثت الثورة.... ان ان ان آه.....
و تعرفنا علي شبكات التواصل الاجتماعي.... إحنا كنا نعرف فيسبوك و لكن مع أصحاب زمان من المدرسة و أهلنا و الذي منه و كدة.... الثورة وصلتنا لمستوي تاني خالص بعد معرفتنا بتويتر و ما ادراك ما تويتر.... تويتر ممكن يتحول الي دنيا داخل الدنيا....
و فعلا تويتر دخلنا عالم الثورة و حسسنا أننا فعلا في قلب الأحداث و قد أوهمنا أننا فعلا كان لنا دور في الثورة كما ولو كانت تغريداتنا هي اللي خلعت مبارك.... بس علي فكرة ده برضه إحساس حلو.... حتي ولو كان إحساس وهمي....
دلوقت بقي دخلنا مرحلة تويترية جديدة بل و مؤثرة في حياتنا... ازاي؟ أقولك...

دلوقت غير ان احاديثنا بتدور حول 'نور' بنوتة مروة (المحروسة) و 'خالد' ابن علاء عبد الفتاح.... و ازاي هما حلوين و زي العسل و زاد عليهم 'نادية' بنت باسم يوسف ... اخر عنقود اهل تويتر... و مش كدة و بس لأ ده اخبار مين اتجوز و مين اتطلق و فرحتنا بكتب كتاب اسماء محفوظ و بجواز نوارة نجم و حواراتهم علي الطبيخ و مين عاوز ياكل ايه و تهريجهم مع بعض علي تويتر و احنا معاهم.... و مالك و فاطمة و تطعيمات الكلب بتاع مالك... و عربية رشا عزب و طول لسان رشا ده حدوتة تانية خالص ... اول مرة احس ان الاباحة و طولة اللسان ده حاجة كويسة و رشا بصراحة خير من يمثلنا في هذا المجال... و اعمال الخير لمحمد الجارحي بصراحة الواحد بيشعر بالضألة امام نشاطه في الخير و تاكسي الخير... و بعدين شعوذة اراء الداعية مينا نجيب و دفاعه عن الحرية المطلقة ... ايا كانت هذه الحرية..... و برضه بتلاقي الاندال زي عبد الرحمن عز ملك الخيانة المتوج.... و تقعد تتأمل مواقف مالك العدلي و تخيللي لو انا مكانه هل كنت اقدر اعمل اللي بيعمله ده في الدفاع عن الثوار و الشحططة من نيابة لمحكمة و جري من معتقل لقسم.... و لا يمكن اننا يعدي يوم و منتكلمش علي مني سيف و لا للمحاكمات العسكرية و آه ساعات بنجيب سيرة الوان المانيكير اللي بتحبه و كله كوم و سوزان هانم دي كون تاني.... ساعات احس انها بايتة في الميدان و ساعات استغرب بتجيب الاخبار منين و ارجع اقول ما هي هانم اكيد قاعدة في البيت موراهاش حاجة غير حب مصر و الثورة... غيرهم و غيرهم و غيرهم و غيرهم و غيرهم و غيرهم كتير كتير كتير....

بس كل ده كوم و حوارات الثورة كوم تاني ...كل اللي فات ده حلو وجميل و لكنه يمثل اقل من ١٪ من حوارنا و حديثنا عن تويتر و اهل تويتر... و احلي كلام هو مناقشة اراء الناس دي عن الثورة .... والمناقشة مع بعض الناس دي عن الثورة ... و ازاي ان نوارة صامدة برغم الشتايم و ماشية علي مبدأ ان العيب من اهل العيب ميبقاش عيب و اللجان الالكترونية عمرها ماحتقلل من قيمتها و قيمة ابوها عمنا احمد فؤاد و ازاي متمسكة بمبدأ ان مصر لازم تتغير وحتتغير للاحسن و اراء جمال عيد عن حقوق الإنسان و اتفاقي معاه التام عليها و اختلافي معاه في تقييمه لبعض الشخصيات... والشاب المهذب و المتفاني في فعل الخير عبد المنعم و سعيه لتحسين أوضاع أهل حلايب و شلاتين و القري المصرية وناسها اللي عايشين تحت خط الفقر.... و تغريدات إسراء عبد الفتاح المتفائلة عن مستقبل الثورة و أنا معاها علي طول الخط و اختلافنا مع احمد العش بخصوص مساندته القوية لأبو الفتوح و فرحتنا لما انتقد أبو الفتوح بنفس القوة... و بتبقي أيامنا اقل سعادة لما مراتي تبتدي تعيط علي الشهداء و الشباب اللي بيتمسك عاطل علي باطل.... و هما أنضف شباب في الدنيا .... في آخر المطاف إحنا اتعلمنا ازاي نحب وطننا و نتفاعل مع مصر من العيال دي.... العيال بتاعة تويتر .... العيال السيس اللي خلعت رئيس و فضحت رئيس و عرته أمام العالم و حتخلعه هوه راخر.

ألذ حاجة بقي أننا نعرفهم و هما ولا يعرفونا و لا الهوا.... بس لا يمنع أننا حاسين أننا منهم و معاهم... بفضل التواصل الاجتماعي...

كفاية كدة بقي، حاقوم أشوف البوب (aka: البرادعي) قال إيه في تغريدته الأخيرة...

توقيع:
علي حسني

احيه... احيه.... احيييييييييييييه

مرسي رئيس مش عاجبنا و جبناه و قلنا ماشي اهي فترة و حتعدي و نقلبه و نجيب غيره ......المهم ان الفلول و بواقي النظام السابق ميرجعوش تاني شفشق او غيره... كل ده رضينا بيه انما لا بقي ... يجي و يشغل البلد بنفس نظام مبارك اهو ده اللي لا...
ازاي نظام مبارك؟ اقولك....
١- ابنه يتلم و يتكتم و يبطل ظهور في اي مساحة اعلامية حتي لو كانت النت و فيسبوك و تويتر... لأنه دلوقت ابن رئيس و كل كلمة يقولها محسوبة علي ابوه و ده كان زمان وخلص.
٢- المدام شرحه... نفس الكلام علي الابن ينطبق علي الام.
٣- و مرسي لما يطلب من الشعب ينضف الشوارع حلو و جميل بس الاساس و الاهم انه يقدم الخطة لنظافة البلد و تدوير المخلفات و الاستفادة منها... مش نظام الطلبة ينضفوا حوش المدرسة و خلاص علي كدة..
٤- نيجي بقي للحكومة... هشام قنديل او قطونيل المفروض يتكلموا علي مستوي وضعهم و مركزهم بمعني ان رئيس الوزراء لما يتكلم يكون بارقام و احصائيات و خطط و اجراءات.... انما كلام خالتي و خالتك ان اللبسة و الفانلات القطن احسن في الحر ... ده لما يخرج من الوزارة انشاء الله يبقي يقوله علي القهوة.
٥- موضوع المعبر و فتحه و موضوع سينا و اللي حصل و اتعمل هناك ده حدوتة تانية....
٦-موضوع الإعلان اللادستوري ... اسمه بالبلدي تعر...ص، ليه؟ أقولك.
المحكمة الدستورية العليا احتمال كبير جداً يوم ٢ ديسمبر تحل لجنة الدستور ... صح؟ صح.... و الدستور لسة مخلصي ... صح؟ صح. فلو اتحلت يبقي يبقي لازم تيجي لجنة تانية و هنا ممكن تكوينها يكون غير متوانس و موالي للإخوان وبالتالي اللجنة الجديدة حتطلع دستور مش علي مزاج الإخوان..... إيه الحل؟ الحل سهل أوي.... علشان نضمن أن الدستور يطلع علي مزاج الإخوان ، دستور ابن ستين كلب يعني... يبقي لازم يطلع قبل ٢ ديسمبر و هنا لازم يسرعوا بخروجه عن طريق لهلبة الجو... ازاي؟ أقولك.... يطلع بيان دستوري ابن وسخة و كله شر في شر و الناس تكرهه و تتكتل ضده بس يبقي الحل للخلاص من الإعلان ابن الوسخة أنهم يخوفوا الناس و يحركوهم اتجاه الموافقة علي الدستور ابن الكلب... لو تفتكروا ده اللي حصل في انتخابات الرياسة تمام.... تم انتخاب ابن الكلب لقطع الطريق علي ابن الوسخة....

توقيع:
علي حسني
(لو الألفاظ الابيحة ضايقتك؟ متقراش)

انا و ملحد افندي...

بدا ذي بدء احب اكد ان انا مسلم و موحد و اشهد ان لا اله الا الله وحده لا شريك له و سيدنا محمد نبيه و رسوله. اما بعد ان آامنت نفسي فممكن دلوقت احكي الحوار الخيالي اللي دار بيني و بين صديقي الملحد... و كلمة خيالي هنا مقصودة... انتم فكروا و قرروا اذا كان حوار خيالي بمعني انه دار في خيالي و لا خيالي بمعني انه شئ ابعد من الخيال ان يحدث و لكنه حدث... براحتكم...
الحوار دار بيني و بين صديقي الناكر للاديان جميعا و اعتقاده الراسخ ان الاديان من صنع البشر للسيطرة علي بعضهم البعض... بالبلدي متآلفة و متظبتة علشان مجموعة قليلة من الناس تسيطر بيها علي عموم الناس....
حانسمي صديقي ده ملحد افندي علشان نعرف نفهم الحوار ماشي ازاي..... ماشي?
ملحد افندي: المسيح كما يدعي المسيحيون ضحي بنفسه من اجل انقاذهم. صح?
انا: يمكن ... ها ...اه ماشي ضحي بنفسه ..بس علي فكرة القرآن بيقول غير كدة... بس حامشي انا معاك...و بعدين?
ملحد افندي: انتم بتموتوا نفسكم و تضحوا بحياتكم لآن واحد او مجموعة غلطت في رسولكم محمد...صح?
انا: طبعا لازم ندافع عن النبي....
ملحد افندي: طب انا راضي ذمتك النبي اللي يضحي علشان الناس تعيش احسن و اللا النبي اللي الناس بتموت علشانه (و هو ميت من اكتر من الف و سنة) احسن?
انا: ايه? (علي رآي شفشق) النبي محمد مقالش لحد يموت نفسه علشانه...
ملحد افندي: يبقي اكيد قال موتوا اللي غلط فيا علشان كدة انتم يا مسلمين قتلتوا كل من اعتقدتم انه غلط فيه... صح?
انا: هو يعني مش قوي كدة... اصل النبي مقالش ان حد يموت حد ايا كان السبب... هو ماموتش الناس اللي غلطت فيه و هو عايش...
ملحد افندي: اه... يبقي اكيد ربكم هو اللي قال كدة ....
انا: لا خالص مش كدة... ربنا مقالش موتوا حد برضة لمجرد اختلاف رآي او حتي عقيدة...
ملحد افندي: بس موتوا ناس لانهم غلطوا في نبيكم... او حتي كانوا مين دين مختلف عنكم و اتخانقتم لآي سبب .... طاخ بوم اقتل و احرق... يبقي دينكم ده دين بيسمح بالعنف و القتل و الذي منه...صح?
انا: ابدا... ديننا دين تسامح..دين رحمة... دين مغفرة....
ملحد افندي: هه!!!??? ماشي حافوتها بمزاجي لو قولتلي ليه لازم تدافعوا عن ربكم باستخدام العنف المفرط طالما هو دين حلو و حنين قوي كدة و كمان لو انتم مصدقين انه القادر و الجبار يعني يقدر يحمي و يدافع عن نفسه بمعرفته...من غير ما تقوموا انتم تموتوا ناس و تحرقوا الدنيا علشان كلمة كدة ولا كلمة كدة اتقالت في حقه...قوللي يا واد يا مؤمن?
انا: انا...انا لازم ....هو... انت عايز ايه? تقصد ايه? يا كافر يا زنديق? ده حلال فيك القتل.... لو مكنتش صاحبي كنت دبحتك دلوقت هنا.... يا كافر...
ملحد افندي: ماشي يا واد يامؤمن.... بلاش نتكلم عن ربك او دينك ... ايه رآيك نتكلم عن شيوخكم?
انا: اه ... كدة ماشي...
ملحد افندي: متآكد? اصل موضوع ربك و دينك ممكن يكون اسهل من شيوخك... متآكد?
انا: ايه يا بني الكلام الخايب ده! الشيوخ دول ناس قارية و فاهمة الدين و بالبلدي ناس بركة و ربنا كارمها... فلة شمعة منورة...
ملحد افندي: انت حر... ده انت وقعت ولا حدش سما عليك...
انا: ايه?
ملحد افندي: خد عندك...حازومة ابو سماعين كداب في اصل وشه و امه طلعت امريكانية.
انا: اه ليه? بس ده واحد ... حنعمم بآة علشان واحد كداب??
ملحد افندي: وجدي غنيم سباب و شتام و لسانه زفر ...يبقي فاهم دين ازاي و رسولكم بيقول ان صفات المسلم المؤمن:
ليس المؤمن بالطعان و لا اللعان ولا الفاحش ولا البذئ.
انا: اه ليه? بس ده واحد... حنعمم بآة علشان واحد لسانه ظفر??
ملحد افندي: طيب و الشيخ خالد عبد الله ما هو راخر لسانه بينقط زفت علي التليفزيون ليل و نهار...
انا: و هو ده شيخ برضه.. بس ماشي ده واحد تاني لسانه زفر.. يعني اتنين ...حنعمم بآة علشان اتنين....
ملحد افندي: ماشي طيب و البلكيمي السلفي اللي كدب انه اتسرق في حين انه عمل تجميل لمنخاره?
انا: هه? ده واحد مريض... حنعمم علشان واحد? ده مريض نفسي...
ملحد افندي: طيب و الشيخ ونيس و لا انيس... اللي اتقفش معاه مزة?
انا: اه... ده واحد ابيح... حنعمم بآة علشان واحد??
ملحد افندي: طيب و الشيخ اللي قطع الانجيل? تسامح ايه بآة يا عمنا...
انا: ده راجل مدعي وواحد عاوز شهرة ... حنعمم بآة علشان واحد زي ده??
ملحد افندي: طيب و السلفيين اللي قتلوا الشاب اللي كان ماشي مع خطيبته?
انا: دي حادثة فردية.. و دول اكيد عيال بلطجية مش متدينين...حنعمم بآة علشان حادثة فردية???
ملحد افندي: اه... ماشي ... طيب و المدرسة اللي قصت شعر البنت علشان مش محجبة?
انا: دي مدرسة!!! ايه علاقتها بالشيوخ?
ملحد افندي: دورها زي دورهم بتعلم الناس .... كلهم بعلموا الناس سوآ دين او غيره.... صح?
انا: صح... بس .... ماشي خلصت ولا في تاني?
ملحد افندي: خلصت ايه يا بني! ده لسة كتييييير....
ندخل بقي علي الجماعة...
انا: جماعة مين يا بني?? مراتي مالها و مال موضوعنا?
ملحد افندي: جماعة الاخوان المسلمين يا مصحصح.... صباح الهبل....
انا: مالهم الاخوان المسلمين... جماعة بتدعوا الي تطبيق الدين و الشرع و عاوزة تتطهر السياسة من النجاسة و الفساد و تعوض الناس عن سنين الفقر و الذل و ترجعلهم فلوسهم المنهوبة و اللي كانت بتتصرف علي كلام فارغ.... قول عليهم حاجة لو جدع..
ملحد افندي: هاهاهاهاهاهاهه... حاجة واحدة بس... ده حاجااااااات كتير.... نبتدي منين يا تري??
اه... من اول الاغتيالات الي حصلت ايام الملك...لحد الكدب و الغش ايام ناصر لحد الكدب و الغش وقت السادات لحد الكدب و الغش وقت مبارك.... و بعدين ندخل علي الثورة و كدبهم و ادعائهم و ركوبهم علي الثورة.... لحد ما نوصل لما بعد الثورة و حكمهم للبلد دلوقت.... اقولك بقي... شعب جعان و عريان و رئيس مجلس شعبك الاخوانجي بيقبض عشرات الالوف و راكب عربية بالشئ الفلاني... و بعدين مرسي اللي بيصلي الجمعة الواحدة بكذا مليون كل مرة.... ولا الشاطر و رجالته اللي ماسكين بيزنس البلد و الرحلات الرئاسية اللي بيطلعوها مع مرسي لتنشيط الاعمال و هما و شلتهم بس... اكمل ولا كفاية كدة? دين رحمة و تسامح و محبة و كلام حلو كتير....
مش كدة?
و ممكن نتكلم عن خيانة العهد و التواطئ مع العسكر و مهادنة الفاسدين و اتفاقيات تحت الترابيزة و كله بما لا يخالف شرع الله....
انا:...........
ملحد افندي: تعرف ان انا قريت القرآن و السنة و عرفت الدين بس عشت مع المتدينين بتوعكم و لقيت العكس علي طول الخط... دينكم يقول يمين و هما ماشيين شمال و انتم وراهم زي الغنم.... أآمن ازاي ???? انتم اكتر من يسئ لدينكم و لو بمفهومكم للدين يبقي تستحقوا القتل :))))
انا: ............
ملحد افندي: انا عازرك ...حترد تقول ايه... متقدرش تكدب الواقع...
انا: : انا...انا اصل هما....هو... انت عايز ايه? تقصد ايه? يا كافر يا زنديق? ده حلال فيك القتل... دينا دين تسامح و رحمة... . لو مكنتش صاحبي كنت دبحتك دلوقت هنا.... يا كافر.

توقيع:
علي حسني

الخوف من الواحد...

من أول يوم الثورة و انا مقتنع تماما ان عدم وجود قائد للثورة هو شئ كويس....
كنت متخيل ان وجود قائد كان ممكن يسهل القضاء علي الثورة....

دلوقت باعتراف أنني كنت غلطان من ساسي لراسي... كان لابد من زعيم للثورة..... الزعيم كان حيوحد الناس حوله و باتجاه واحد و طريق واضح...

انا اسف، كان لابد من قائد للثورة و زعيم....

توقيع:
علي حسني


http://youtu.be/2AlGucONW9w

مبارك .... استااااااااذ

لأول مرة اتأكد و اقتنع ان الواحد لازم يخطط خطط طويلة الامد او الاجل او المدي او ذات بعد زمني و ليس فقط للوقت الحالي و بكدة يضمن النجاح... ايه اللي انا بقوله ده؟ ولا حاجة انا بأقر و اعترف بذكاء مبارك و نظامه... و كلنا لازم نقف احتراما و تبجيلا لعبقريته الفذة...
ايه الهبل اللي انا بقوله ده؟
والله اللي اهبل هو اللي مش شايف الحقيقة ... الحقيقة ان مبارك خطط و نفذ و بارك .... استااااااااذ استفاد .... لحد دلوقت.
مش حاتكلم علي خطط الفساد سياسي او فساد مالي او فساد عائلي او استغلال نفوذ او استغلال سلطات او السماح و التواطئ مع الحاشية الفاسدة و المستفيدة و المرتشية .... لا... لا.... ابدا.
اللي انا اقصده هو الجهل او كما احب ان اتفلسف و اسميها بثقافة الجهل... بمعني ان مبارك عمل بهمة و نشاط يشكر عليهم وخلق اجيال و اجيال و اجيال من افراد شعب جاهل (٣٠ سنة بقي من الشغل الجاد و المتفاني) و يتفاوت مستوي الجهل ما بين امية تامة يعني يجهل القراءة و الكتابة و حتي جاهل بقرآنه و دينه و ما بين جاهل معاه شهادة ثانوية و برضه ميعرفش الألف من كوز الدرة و الاسخم هو الجاهل اللي اتخرج من الجامعة وكل اللي خرج بيه منها عبارة عن شهادة جامعية يعلقها في حمام بيتهم انما الادل (معرفشي يعني ايه ادل .. بس هما بيقولوها كدة: اسخم و ادل) ماعلينا، الادل بقي هو الجاهل الجهول اللي بيدرس بجهله لجيل جديد واعد متوعد يشع جهل و حاجة تشرف كدة... تشرف مين؟ مبارك طبعا... مبارك اكتشف بذكائه الفطري او يمكن ذكاء مراته ان :
شعب جاهل = حياة رئاسية سعيدة و لا نهائية.
و الخطة كانت واضحة و محددة و للاسف سهلة التنفيذ و الادل (تاني) انها خطة ناجحة بل و مؤكدة النجاح.
ادلة نجاح الخطة عديدة .... مصر حاليا هي الاولي في الجهل و عن جدارة، احنا اجهل خلق الله في المواضيع التالية:
- حقوقنا
- واجباتنا
- ديننا
- السياسة
- اسلوب الحوار
- اسلوب الاختلاف
- اسلوب الخناق (والله حتي ده كمان)
- الادب
- الاخلاق
- العلوم
- الفن
- كل حاجة تانية... كله كله....
و نتيجة جهلنا في كل ما سبق تفوقنا حتي علي نفسنا و اصبحنا الرواد ايضا في المواضيع التالية:
- الرشوة
- الكذب
- النفاق
- الغش
- الفساد بكل انواعه
- الخنوع
- المذلة
- و كل حاجة تانية خايبة و تكسف و تعر
و اهم ما في الموضوع اننا اخطر حاجة بنعملها اننا بنلوم الجاهل لما بيخطئ و عمرنا ما بنلوم اللي حرم الجاهل فرصة المعرفة و خلاه يخطئ ... الجاهل دايما بيغلط و ده رد فعل .... انما فاعل الفعل و اللي منع و حرم و حجب المعرفة ولا بنقوله حاجة و لو قولنا بتبقي بكسوف لأننا حتي جاهلين بأسلوب محاسبة من يسلبنا حقوقنا ... نجهل كيف ندافع عن حقوقنا... نجهل كيف نطالب بحقوقنا...
لحد يوم ٢٥ يناير... يوم ما مجموعة شباب زي الورد و اجمل من اخرجت مصر من كنوز خرجوا للشوارع و قامت الثورة... الثورة قام بيها شباب اجدع منه مفيش... شجاع ووطني حتي النخاع و لأنه هو الضحية ... فهو برضه جاهل... عرف يعمل الثورة و معرفش ينجحها... ناس كتير بتلوم الثوار علي الوضع الحالي و ده ظلم بين و غبن واضح لأن الثوار قاموا بواجبهم في حدود امكانيتهم... الوضع الحالي لمصر هو بسبب الجهل و نتاج الخطة التجهيلية المباركية و هو الجاني و المستفيد من جريمة التجهيل... و الشعب المصري كله الضحية.
الثورة ركبها بعد كدة ناس تانية مابين سياسيين و متشيخيين و مفكريين كل دول ركبوا علي الثورة و برضه مش عارفين ينجحوها بالرغم ان فيهم دكاترة جامعة و شيوخ دين بدقون و سياسيين محنكيين تولوا مناصب حساسة و بدل و كرافتات و جلاليب و عبايات و في الاخر برضه جهلة واجهل من ابو جهل بذات نفسه... الخلاصة لأني زهقت، لابد من محاربة الجهل... ايوة الجهل مش الجهلة و ساعتها ووقتها مش حنلاقي حد بيصوت عمياني للي بدقن و مش حنلاقي اللي بيعلم علي العلامة الخضرا لنصرة الدين، مش حنلاقي ناس مصدقة ان عسكري خدم عشرات السنين مع مبارك ممكن يكون انسان شريف، مش حنلاقي ناس بتؤيد واحد لمجرد ان شكله ابن ناس و ذوق و شياكة (مع انه مبيغيرش البلوفر) و مش حنلاقي ناس بتنزل الشارع للدفاع عن من يكذب عليهم علنا لمجرد انه حافظ القرأن، مش حنلاقي حد بيسمع كلام قائد او مرشد بدون مناقشة خوفا من الاقصاء لاعتقاده ان ده حيحرمه من الجنة، مش حنلاقي ناس بتصدق الكلام المرسوم و المزوق بدون التدقيق في معاني الكلام ومصدقة كلام الاغنية الشعبية.... انما وقتها ووقتها بس حنلاقي شعب واعي و فاهم و غير منقاد و انما رأيه من دماغه و قراره من دماغه و مبني عن معرفة... معرفة حقوقه و قبلها واجباته نحو بلده و اهله و قبل كل حاجة واجباته نحو نفسه.... عيش، حرية، عدالة اجتماعية.

توقيع: علي حسني

البرادعي ...؟ ابو الفتوح ...؟ ولا خالد علي ...؟

انا من اول يوم ثورة و من قبلها و انا برادعاوي و افتخر و كل مواقف الرجل وحتي بعد انسحابه مازالت ثابتة و تدفع الي التغيير و أنا مقتنع انه انسان يستحق الاحترام و أثق في قدراته و امكانياته لقيادة البلاد.

و كلنا نسمع عن و من ابو الفتوح كقيادة اخواني و مش اخواني و من قبل كرجل ثورجي صميم و مواقفه من زمن بعيد واضحة و رغبته في التغيير معلنة و معروفة.

دلوقت بقي اتفرجت و سمعت الحوار مع خالد علي (البرنامج تم مع يسري فودة من كام اسبوع) و بصراحة عجبني الكلام و الحماس و الرؤيا و الرغبة في التغيير...حسيت انه كمحامي و من كتر ماشاف من بلاوي و مصايب و ناس طلع عين ابوها في القضايا و المحاكم و الظلم اللي اتعرضوا ليه تشبع برغبة قوية في التغيير.

مخي شغال في مقارنات (موضوع ان مخي يشتغل دي حدث يستحق الاهتمام لأنه نادرا ما يحدث) المقارنة ابتدت من ناحية دوافع كل منهم و ليه عاوز يغير ؟ التلاتة هدفهم التغيير و في اتجاه واحد واهداف تقريبا واحدة ان لم تكن فعلا واحدة.

انما خلفية كل منهم اكيد لها تأثير علي منهج التغيير اللي حيطبقه كل منهم... و فيه كمان حمدين صباحي.....

استني .. استني...

ايه ده يانهار كوبية انا باقارن بين ناس مرشحين لرياسة مصر... ايه ده حلم ولا علم!!!؟؟؟

ما داهية ليكون حقيقي.... ايه ده؟؟؟؟ الله الله الله انا ممكن اختار الريس...؟؟؟ و مش لازم يكون مبارك؟؟؟؟ و لا حتي جمال...؟؟؟؟ جد والله؟ طب احلف بأغلي حاجة عندك.... خلاص صادق...

يعني انا لامؤاخذة يعني و اعوذ بالله من كلمة انا بقيت مواطن و ليا حقوق وهيبقي عندنا انتخابات رياسة زي البلاد التانية؟ يعني ممكن انتخب رئيس بلدي و لو معجبنيش منتخبوش المرة الجاية؟ مش قادر اصدق يا جدعان... طب احلف تاني كدة...

توقيع:

علي حسني

بدأت الجلسة - حكمت المحكمة - رفعت الجلسة

استطاع احد مراسلينا من الاتصال بمصدر موثوق منه و هو ايضا المصدر المطلع و هو ذاته المصدر الذي رفض ذكر اسمه و الذي امد مراسلنا بقرار الحكم في قضية المخلوع وولاد المخلوع و رجالة داخلية المخلوع... و حيث ان الاوراق التي امدنا بها كانت بخط يد السيد المستشار/ القاضي فقد اضطررنا ان نكتبها علي الحاسوب ليتسني نشرها و يسهل قرأتها و نؤكد اننا لم نغير كلمة واحدة او نضيف او نقتطع حرفا واحدا و انما ننشرها كما هي احقاقا للحق و للحقيقة (لزم التنويه)،
والان، فلنبدأ الجلسة:
السادة المحامين المطالبين بالحق المدني و السادة محامين الدفاع بعد مداولات طويلة و استعراض كافة المستندات و الادلة والبراهين و الاستماع لشهادة الشهود و الشهداء و دفاع المحامين من الطرفين وصلنا نحن هيئة المحكمة الموكلة بهذة القضية الي قرارنا و الذي بني علي الحيثيات الاتية:
اولا:
بعد سماع مرافعات السادة المحامين الموكلين عن اهالي الشهداء و المصابين و المطالبين بالحق المدني (الغجر اللي كانوا بيعملوا دوشة في كل جلسة و أل ايه واحد منهم كان عاوز يردنا، هأأو).
وصلنا الي ان اي منهم لم يستطع ان يقدم و لو دليل واحد علي ان موكله قد استشهد او حتي اصيب و بالرغم من اعطائهم الوقت الكافي لتقديم ما يستطيعون من مستندات و اوراق و لكنهم استنفذوا هذا الوقت في كلام مرسل و اتهامات غير محددة و غير مرهونة بدليل واحد قاطع.
ثانيا:
و بالرغم من ذلك و احقاقا للحق فقد اخذت هيئة المحكمة علي نفسها مهمة الاثبات و طلبت مناقشة الشهداء و قد تم الاتي:
مناقشة كل من الشهداء شخصيا كل بحضور محاميه و قد ثبت لهيئة المحكمة ان كل من الشهداء و بناء علي شهادته اما انه مات او قتل بطريقة او بأخري - يعني ما فيش حد استشهد.
ماعدا الشهيد رقم ٤٢٤: حق عبد الحق الذي ثبت من شهادته انه مات نتيجة سقوط من مرتفع - يعني سقط الحق.
و الشهيدة رقم ٣٤٣: حقيقة ست ابوها و التي ادلت في شهادتها انها توفت نتيجة تسريب غاز طبخ - يعني خنقت الحقيقة.
و بذلك تكون قد سقطت اهم اركان القضية.
ثالثا:
و احقاقا للحق فقد سمحت المحكمة الي الشهود الذين طلب المحامين المطالبين بالحق المدني سماع شهادتهم. و قد تم الاتي:
سماع شهادة المشير طنطاوي و الذي اكد في شهادته مرارا و تكرارا ان المتهم الاول: محمد السيد مبارك ما هو الا فلة وردة و شمعة منورة و هذا كان كافيا لاقناع هيئة المحكمة.
و قد تم ايضا سماع شهادة السيد/عمر سليمان و الذي اكد في شهادته مرارا و تكرارا ان المتهم الاول: محمد السيد مبارك ما هو الا فلة وردة و شمعة منورة و حيث انه من الصعب ان يتفق اثنان علي شخص واحد وقد حدث فأن هذا يعد من الادلة القاطعة علي ان المتهم الاول: محمد السيد مبارك هو نفسه الفلة والوردة و الشمعة المنورة.
رابعا:
تم سماع الدفاع عن كافة المتهمين من الاول و حتي اخر واحد. و قد تبين من المرافعات الاتي:
المحامي عن المتهم الاول: محمد السيد مبارك، الذي ذكرفي مرافعته و دفاعه ان المتهم برئ من كل التهم و انه ملاك ذو اجنحة. و حيث ان هذا الكلام قد يعد غير منطقي و خيالي بعض الشئ فقد قامت هيئة المحكمة و احقاقا للحق بمعاينة المتهم الاول: محمد السيد مبارك و قد شاهدت بأم اعينها و لمست بايديها فعلا الاجنحة الريش التي علي ظهر المتهم و بذلك قطعت الشك باليقين و تاكدت انه فعلا ملاك بجناحين بل و عند المعاينة تبين لهيئة المحكمة وجود هالة من النور علي رأس المتهم و عند سؤاله اجاب: هذا من فضل ربي (و حينها نطق بعد اعضاء الهيئة: الله اكبر) و عند سؤال دفاع المتهم عن عدم ذكره موضوع هالة النور اثناء مرافعته؟ اجاب بأنه لم يرد ان يؤثر علي قرار المحكمة بما قد يراه البعض خارج موضوع القضية. و لكن قررنا نحن هيئة المحكمة اثبات وجود هالة النور.
خامسا:
و بما ان المرء علي دين خليله فقد ثبت لهيئة المحكمة ان كافة المتهمين يتسموا بنفس صفات المتهم الاول و خاصة المتهمين الثاني و الثالث ابناء المتهم الاول.
و بناء علي ما سبق من حيثيات فقد وصلت هيئة المحكمة لقرارها:
اولا:
الحكم للمتهم الاول و حتي اخر واحد في المتهمين بالبراءة من كافة التهم الموجهة اليهم.
ثانيا:
يتم اعادة كافة المتهمين الي سابق مناصبهم و رد كافة ممتلكات من قصورهم و شاليهاتهم وبلدهم و شعبهم و اهراماتهم و كنوزهم و خلافه و تعوضيهم عما لحق بهم من اساءة و تشويه و ستترك لهم المحكمة حرية تقدير ما يروه تعويضا مناسبا (وده اقل واجب)
ثالثا:
الحكم علي الشهيد الاول و حتي اخر واحد في الشهداء بالحبس لمدة اربعين يوم بتهمة البلاغ الكاذب و ازعاج السلطات.
رابعا:
و حتي لا يتكرر ما حدث من اضاعة لوقت المحكمة فقد لزم ارسال رسالة الي الشعب المصري الحبيب و الذي نعمل جميعا من اجل الحفاظ علي حقوقه فقد قررنا الأتي:
حبس المتهمين البالغ عددهم اربعة و ثمانون مليون و تسعمائة و تسعة و تسعون الف و تسعون مواطنا (الوارد اسمائهم بالكشف الملحق) لمدة ١٤ شهر و هو ما يوازي فترة حبس المتهمين ظلما في القضية المذكورة.
و الله الموفق و المستعان.

توقيع:
علي حسني
رفعت الثورة ... اسف رفعت الجلسة.

ج ... چ

قامت الثورة و خلعت المخلوع... انما اهم انجازاتها (ده لو حققت انجازات طول ما العسكر كاتمين علي نفسها) هو انتشار تعطيش حرف ال ج الذي اصبح بين ليلة و ضحاها حرف ال چ... في التليفزيون و الراديو و فاضل يكتبوها في الجرايد و المجلات و لم تعد محصورة علي الشيوخ و المستشيخين (اللي عاملين نفسهم شيوخ يعني) بل اصبح استخدامها فرضا علي الجميع، مذيعين و مذيعات، الاعلاميين و الاعلاميات ... و ده طالما الحزب الاقوي من اهل ال چ و ثاني اقوي حزب من اهل ال چ اذا فلابد ان يصبح الجميع من اهل ال چ ولو حتي استخدموها في غير موضعها ....

دلوقت :

جريمة - چريمة

جمال - چمال

جبان - چبان

جثة - چثة

جميع : چميع

جماهير - چماهير

جنة - چنة

جماعة - چماعة

جيش - چيش

جلسة - چلسة

جمهورية - چمهورية

جدع يا باشا - چدع يا باشا

و بعدين دخلنا علي:

لجنة - لچنة

مجلس - مچلس

و استمر بقي الي ماشاء الله... كل ج تصبح چ، و كأن هذا هو ما قامت الثورة من اجله (اچله) و هو الهدف الاسمي الذي استشهد من اجله (اچله) شباب مصر.

هذا ما أتي به المتأسلمون و هذا ما أتقنه المنافقون....

بدلا من اصلاح حال البلد و بدلا من توعية الناس بدينهم... تشبث الجميع باللفظ و تركوا المعني ... يعني چم في الهايفة و اتصدروا....

اتفرجوا علي الفيديو ده و نرجع نكمل بعديه...

 لو مش شايف الفيديو...إنقل هذه اللينك في المتصفح...
http://youtu.be/B8rNfubK3UA

اتفرجتوا؟ حاسين بأيه بقي؟

انا عن نفسي كنت اعرف ان في فقر و غلب وبؤس انما لم اتخيل ان في بلد عاشت طول عمرها تتمنظر علي الجميع و تتفشخر بأن عندها الازهر و الف مأذنة و علماء نشروا الاسلام في بلاد العالم و شيوخنا منتشرين في بلاد الغرب و الشرق و حتي الصين لنشر كلمة الله و رسوله... و يكون هذا حال اهلها و صميم مجتمعها.... العار ثم العار يا أهل مصر ... يا رجال الدين ... يارجال الفقه ... يا حملة راية الاسلام... حد ممكن يقول .... الله ما هي الحكومة هي اللي فشلت و ده صحيح و لكن ماذا كنا نتوقع من حكومات فاسدة ورؤساء عصابات و ليسوا رؤساء دولة و كلنا كنا نعلم بعدهم عن الدين و ربما تعمدهم تركه و تجاهله.... حتي يصبح الحرام حلالا و الفساد هو الحق بين الناس و علي الارض ....

و لكم انتقدتهم جماعة الاخوان الذين طوال ٨٠ عاما من اللهث وراء السياسة و الحكم و التلون بكافة الوان الطيف اما لتفادي بطش حاكم فاسد او لموالة حاكم افسد و تناسوا عمدا و صدقا باقي اسم جماعتهم "المسلمين" و لتوضيح مدي جرمهم مقارنة بجرم الحكومة هو ان الحكومة و الحاكم لم يطلق علي نفسه الحاكم المسلم و الحكومة الاسلامية التي تدعي تطبيق شرع الله علي عكس جماعة الاخوان المتأسلمين التي طالما تشدقت بالكلام عن الدين و عن معاناة اعضائها في سبيل نصرة الدين و نشر الدين و زي ماشوفنا في الفيديو الدين منتشر و كله ١٠٠/١٠٠

نيجي بقي للاخوة السلفيين اصحاب هذا الفيديو الذي يعد صفعة علي وجوه الجميع و السلفيين من ضمنهم (بالرغم من شكري لهم علي نشر هذا الفيديو الذي لم اتخيل - و هذا ذنبي انا- انه في بلدنا بؤس و جهل الي هذا الحد) السلفيين الساعين الي الحكم و السلطة و الذين انفقوا مئات الالوف و قد تكون الملايين علي الدعاية الانتخابية من اجل اي حاجة الا الدين و نشر الدين... من اجل الدنيا و كل الدنيا... و كأن الطريق الي نشر كلام الله و تعاليم الدين لابد ان يمر من البرلمان و عن طريق كرسي الحكم و عن طريق القنوات الفضائية التي تتكلف الملايين يوميا من اجل الوصول الي بيوت المنتخبين و ليذهب الفقراء الجهلة و المساكين الي الجحيم فهم لا صوت لهم في الانتخابات...

في كلمة اتقالت في الفيديو علي لسان سيدة صعيدية غلبانة : ده احنا زي البهايم.... الحقيقة ان هذه المقولة تنطبق علينا احنا.

الحقيقة إن الايمان منتشر في قلوبهم وهذا ليس بفضل أي من هؤلاء المتأسلمين....  كلنا متخاذلين و مذنبين في حق هؤلاء الناس... كلنا... هؤلاء الناس الذين حجزوا مكانهم في الجنة لرضاهم عن حالهم و شكرهم لله و حمده علي نعمه التي في نظرهم لا تعد و لا تحصي .... علي الرغم انه لو كنا نحن مكانهم لربما تبرمنا من ضيق الحال و شظف العيش و نظرنا لغيرنا و ما يملكون و قارننا و نقمنا... انما هم فحامدون شاكرون و رغم عدم حفظهم الفاتحة و عدم معرفتهم بأسم النبي فهم افضل عند الله من الكثيرين حافظي القرآن و العاملين بعكسه ولو حتي نطقوا ال ج ... چ.

توقيع:

علي حسني

وصيتي...

قررت اكتب وصيتي و مفيش مكان احسن من النت علشان تبقي محفوظة فيه....

في يوم ١٢ فبراير ٢٠١٢
اوصي انا علي حسني بانه في حالة وفاتي ترث زوجتي نادية حجاب كل ما املك في دولة اقامتي او في دولة مسقط رأسي.
و اوصي ان يتم التبرع باعضائي لمن يحتاج في اي مكان سواء في دولة اقامتي او في دولة مسقط رأسي.
و ان يتم دفني في اسرع وقت بعد وفاتي و في اي مكان.
و تقرأوا الفاتحة و تتكلوا علي الله و تمشوا و تسيبوني اموت براحتي من غير دوشة.
هذة وصيتي واجبة التنفيذ.
التوقيع:
علي حسني

ثائر و عسكري و اخوانجي...

احداث الساحة دلوقت في مصر فكرتني بفيلم مواطن و مخبر و حرامي... ابطال الفيلم كانوا بيمثلوا فئات متناقضة في المجتمع المصري و موجودة و عايشة وهي احنا و احنا هي....و دلوقت احنا بقي بنتفرج علي نسخة واقعية من الفيلم بس المرة دي اسمه: ثائر و عسكري و اخوانجي... نفس الادوار بس الاحداث محرفة شوية و التسلسل متلخبط شويتين و النهاية يمكن متغيرة تلات شويات ... الله أعلم بالنسبة للنهاية...

كل ده مش مهم... المهم ان الشخصيات باختلاف المسميات مازالت واحدة.... المواطن المحتاس و المتلخبط وفي نفس الوقت طيب وحالم هو الثائر اللي بيحاول يخلص من الحوسة و يخرج من اللخبطة و يعيش بكرامة و يحقق حلمه في الواقع ... و بعدين في المخبر الفاسد المرتشي اللي بيظلم الغلابة بحجة حماية المواطن او ضحيته اللي هو اصلا بيستغله في الطالعة و النازلة اللي هو دلوقت المجلس العسكري شريك مبارك في الفساد و الحكم الظالم و استغلال الشعب ... و اخرا و ليس اخيرا في الحرامي اللي بيهجم علي البيوت و يسرق عرق المواطنين و بيدعي الامانة و ربما يكون جواه كويس بس اللي يقبل الحرام من حقنا نشك في امانته ... و لو حتي حتة صغيرة اللي هو دلوقت الاخوانجي اللي بيحاول يسرق الثورة و يدعي انه هو اللي عملها هل ممكن نثق فيه ولا نشك في نواياه... اخرة الفيلم كلهم بقم اصحاب و باين ولادهم اتجوزوا بعض و الصداقة استمرت عمر و اصبحوا شركاء في الشغل و الحياة و بقت كل حاجة حلوة و كله ١٠٠/١٠٠...

علي فكرة أحداث الفيلم مش خيالية افتكروا و فكروا شوية و شوفوا نظام مبارك و الحاشية الفاسدة حتلاقوا الفيلم واقعي... كانت كل حاجة حلوة و كله ١٠٠/١٠٠ بالنسبة لهم ...هم وبس.

في الواقع بتاعنا دلوقت بقي ايه اللي حيحصل؟؟؟؟ الله وحده يعلم...

كل اللي أنا متاكد منه أن الثورة هتنجح...

توقيع:

علي حسني

كنا اربعة ... يا ترى اتنين واتنين لسة أربعة؟

كبرنا مع بعض و الصداقة اتولدت في المدرسة و الجامعة و استمرت برغم السنين و المسافات و ربما ايضا انقطاع الاتصالات ... و علي ذكر العلاقات ايام الشقاوة عطينا سوا و اتشاقينا سوا و اتبسطنا سوا و زعلنا سوا...

كل واحد كان شخصية مختلفة ... يمكن بعض الصفات او الاهتمامات كانت مشتركة انما في الاخر كانت الشخصيات مختلفة... انا مش حاقول اسامي انما حاعمل زي كتب الفضايح (مفيش فضايح متخافوش او متزعلوش) و حاستخدم اول حرفين في الاسم يعني انا علي حسني (ع ح) ماشي؟

نبتدي بقي... "م ق" صديق طفولة اقدر اقول انه المتأنق دائما... البنطلون لازم يكون مكوي و القميص لايق و الجزمة بتلمع فعلا علي طول متأنق ... يمكن شفته في جينز مرات تتعد علي صوابع الايد الواحدة... و بعدين عندنا "ف ع" ده كان الشاطر و الدحيح ... جدول المذاكرة علي التلاجة و الغريب انه كان فعلا بيمشي عليه ... كل مادة لها وقتها ... تحس ان هو كان عارف حيبقي ايه في الحياة و هدفه علي طول قدام عنيه... نيجي بقي ل "ط ن" الجنان اللي علي اصوله ... يعني ايه؟ يعني سواقة عربية من غير سقف في المطرة و لو ده مش جنان مش عارف الجنان يكون ايه....

انا بقي "ع ح" مش عارف اوصفني ازاي بس اكيد مكنتش متأنق يمكن كنت في الحقيقة العكس تماما جينز علي طول الخط و ساعات غطرة فلسطيني و جاكتة واحدة طول السنة و بالنسبة للمذاكرة دي حدوتة تانية خالص يعني اقدر اقول انها مكانتش من اولوياتي ... نيجي بقي للجنان ... لو ممكن اقول ان ركوب عربية مكشوفة تحت المطر جنان فيمكن ركوب العربية بالبيجامة تحت المطر مع "ط ن" في مشوار ساعة رايح و ساعة جاي ممكن نسميه جنان بس مش اوي ... يبقي انا...

المهم اننا كنا مختلفين و كنا متفقين و كنا اصحاب و كنا متنافسين و كنا ستر وغطا و كنا متواطئين و كنا حاجات كتير بس عمرنا ما كنا اعداء او لبعض كارهين... كنا اربعة اصحاب ... اربعة أصحاب بيحبوا بعض...

فاست فورورد لقدام شوية في الزمن كل واحد مشي مشوار حياته زي ما ربنا رسمهوله كلنا اتجوزنا و كل واحد شق طريقه و مشي مشواره...

انا سافرت واتغربت عنهم و عن اهلي و بلدي و "م ق" بقي في مدينتنا و اصبح من رجال الاعمال و "ف ع" شرحه بس اصبح من رجال المال و "ط ن" ترك المدينة و اصبح من رجال الاعمال في المدينة الكبيرة ... و لما اتجمعنا بعد زمن كنا مازلنا اربعة اصحاب... اربعة أصحاب بيحبوا بعض...

فاست فورورد كمان مرة.... و قامت الثورة ٢٥ يناير ٢٠١١ .... الشعب كله أييدها و كله فرح بيها ... اخيرا خلصنا من آل مبارك و الفساد و الظلم و... و بعدين؟

هي دي بقي المشكلة....

انا و "م ق" شايفين ان الثورة لازم تستمر حتي تكتمل...

"ط ن" و "ف ع" شايفين ان الثورة نجحت و يلا نرجع للشغل و بقية طلبات الثورة تكمل مع الوقت...

انا و "م ق" شايفين ان الثورة لو استمرت حتجيب الخير...

"ف ع" و "ط ن" شايفين ان الثورة لو استمرت حتخرب الاقتصاد و البلد...

و الاختلاف في الاراء انا شايف انه طبيعي و صحي و لازم نختلف وإلا تبقي الحياة مملة لو كلنا حبينا نفس الاكل و نفس اللبس و نفس الاتجاهات السياسية... كانت الحياة بقي لونها بني و بقت اخر ملل...
السؤال دلوقت ياتري بقي الاختلافات اللي علي كبر دي ممكن تفسد صداقة العمر تفسد و للود قضية؟ هل الاربعة اصحاب حيبقوا اتنين و اتنين ... يا ترى اتنين واتنين يبقوا أربعة اصحاب ؟

توقيع:

علي حسني

SCAF GO

 

 

البرادعي، إنسحاب ولا إنطلاق؟؟؟

إنسحب البرادعي من السباق الرياسي الذي لم يبدأ رسمياً و لكنه بدأ بينا و بين بعضينا...

ناس فهمت الانسحاب علي إنه تخلي عن مبدأ أو موقف....

وناس فهمته على إنه مناورة سياسية .....

و ناس بتخمن انه تفادياً للفشل في الإنتخابات ودة برضه فرضية... أو تنجيم .....

وناس شايفة إنه خذلهم....في دي بالذات انا شايف العكس على طول الخط... مش لأني مؤيد للبرادعي ودة صحيح.... بس أنا مش مؤيد أعمى... أنا بحاول علي قد عقلي اني أفكر واحلل وأقارن ولا اتبع الا ما أراه يتفق مع أفكاري و معتقداتي ... المهم مش أنا الموضوع... نرجع للبرادعي ...

أنا بقى مش شايف الكلام ده، ولكم أن تعترضوا أو توافقوني...

أنا فهمت الانسحاب علي إنه تمسك بمبدأ وموقف ثابت و فكر بدأ من قبل الثورة بعامين وهو فكر التغيير الذي لابد أن يشمل النظام وليس فقط رموز النظام (وحتى تغيير الرموز لم يحدث بصورة كاملة وانما بصورة هزلية مخزية)....

وأنا مش شايف إنه مناورة سياسية طبقا للبعض ...المناورة السياسية لابد أن ينتج عنها مكسب سياسي قريب أو بعيد... وهذا ما لا أراه في هذا الموقف... فالمكسب الوحيد من الانسحاب هو مكسب ثوري وشعبي وليس مكسب سياسي مرتبط بشخص أو كيان سياسي وانما البرادعي حول كل مكسب من هذا الإنسحاب إلى مكسب للشعب عن طريق الدعوة الي إستمرار الثورة حتي تكتمل و يصبح التغيير شاملا للنظام و رموزه و ذيوله...

اما موضوع الخذلان دة بقى فهو حاجة شخصية وفي رأيي نوع من التواكل وحالة من لوم الغير لمجرد تبرئة النفس من الاحساس بالتخاذل.... الرجل جاء بفكر وإرادة شخصية في التغيير... جاء في وقت تلاقت فيه ارادته مع إرادة العديد من مثقفي المجتمع فالتفوا حوله علي الرغم انه لم يدع القيادة و الزعامة و لكنه دائما و دوما يعلن ان التغيير سيكون بالشباب و ليس به هو و بذاته.... و قد يكون فكره هو احد محركات الثورة و لكنه فكر توحد مع فكر العديد من المصريين سواء من مؤيدي البرادعي او غير مؤيدي البرادعي و حتي بعض كارهي البرادعي (موضوع الكره ده حدوتة تانية) المهم ليه بقي يكون البرادعي هو المتخاذل الذي خذلكم و هو لم يدع في يوم انه سيقودكم الي الجنة ... انتم من نصبتوه في خيالكم علي انه المنقذ و المخلص... و لا ذنب له في ذلك... الرجل نادي بالديمقراطية و اعلن ترشحه علي امل ان تقام انتخابات نزيهة في جو ديمقراطي و قد يكسب الانتخابات و قد يخسرها ... مكنش مغسل و ضامن جنة يعني....(ولو كان خسرها كان حيبقي خذلكم برضه؟) انما الواقع اللي كلنا عشناه في الشهور الماضية بدأ من يوم التنحي و حتي تاريخ كتابة هذه المدونة يؤكد ان النظام السابق مازال حالي و الديمقراطية مازلت حلم و فكرة التغيير مازالت فكرة و لذلك وجد انه لا يمكن ان يلعب دور في المسرحية الهزلية المعروضة حاليا و قرر يخرج عن النص...و يكمل الثورة... بس خلاص... انت زعلان دي بقي مشكلتك... لكن لا تلومه هو.

الخلاصة انه بعد قراءة البيان و مشاهدة فيديو اعلان الانسحاب و قراءه الكثير علي فيسبوك و الاكثر علي تويتر و مشاهدة اكثر من برنامج تلفزيوني يناقش القرار و بعد ما استوعبت القرار و فكرت في مضمونه تأكدت انه مش انسحاب بل علي العكس تاكدت انه انطلاقة جديدة لانقاذ ثورة شعبية تتعرض لمحاولات اغتيال شبه يومية.... اطلاق لشرارة جديدة لشعلة الحرية ... مين بقي اللي حيمسك الشعلة و يجري بيها؟ البرادعي قال الثورة حتستمر و تنجح بالشباب و بالشعب ... يعني مش هو اللي حيجري بيها لوحده و ينجحها لوحده علشان محدش يقول خذلني و مجريش.

توقيع:

علي حسني