سؤال غريب شوية!!!
مش اوي لما تعرف ايه المقصود...ده انا عايز أخدمك...
مش الجزمة... لا مش القميص.... لا برضه مش البنطلون...
تحت شوية... لا مش الشراب ... مش تحت اوي كدة... هو بس تحت البنطلون يعني...
ايوة، هو ده مقاسه كام؟
ليه؟
علشان حيقلعوهلك قريب... لو مش بكرة يبقي بعده و لو مش بعده يبقي بعد بعده... قدامه ست سنين يقلع براحته.
المقاس بقي؟ علشان ابعتلك واحد بدل اللي حيقلعوهلك.
صلاح: صباح الخير يا عمي.
ابو هالة: صباح الخير يا صلاح يا ابني... مراتك لسة نايمة؟
صلاح: لا يا عمي هي بتلبس الولاد علشان اوصلهم في طريقي للشغل.
ابو هالة: معلش يا صلاح استعجلهم يطلعوا من الحمام بسرعة شوية لحسن عمك محصوووور.
صلاح: حاضر يا عمي... انا اسف و الله اننا متقلين عليكم و عاملين زحمة في شقتكم.... بس ان شاء الله نستلم شقتنا قريب و نخف عنكم يا عمي.
ابو هالة: الحماااام يا صلاااااااح.
صلاح: ايوة يا عمي... حالاً. هااااااالة يلا بسرعة طلعي الولاد من الحمام... بابا محصور.... معلش يا عمي هما ست سنين بس خلاص حنستلم الشقة قريب و حضرتك تسترد الحمام بتاعك.
ابو هالة: استرد ايه و نيلة ايه ... الحماااام.... حاعمل علي روحي يا صلاح... عمك حيغرق الدنيا يا صلاح.... انتي يا هالة اطلعوا بقي.
هّالة: خلاص يا بابا الحمام فاضي... اتفضل حضرتك.
ابو هالة: .............................................. هاااااااااااااااا.
----------------------------------------------------------------
صلاح: هالة.... هالة.... افتحي الباب بسرعة... جاتلي المكالمة... المكالمة جاتلي....كلموني يا هالة.
هالة: صلاح، مالك يا حبيبي؟ مروح من الشغل بدري ليه؟ خير!!! مكالمة ايه و مين اللي كلموك؟
صلاح: العمارة... خلصت... العمارة خلصت ... خلصت العمارة... و حنستلم من المقاول علي اول الشهر و ممكن ننقل بعديها بكام يوم بعد الكهربا و المياة و خلافه ... خلافه اه... خلافه ايه.... خلافه اه...اه... اااااااه. اخيراً يا هالة حنروح بيتنا.... يااااااا عمي... حنروح بيتنا... و الحمام حيفضي..... و الحمام حيفضي و تهيص يا عمي يا جميل... يا راجل يا طيب انت.
هالة: صلاح، اهدي يا حبيبي... الحمد لله لك يا رب.... الحمد لله..... الحمد لله.
صلاح: بكرة الصبح حاروح اسحب الفلوس من البنك و ادفع اخر دفعة... اخر دفعة.... ترللللا ... اخر دفعة ... و نستلم الشقة.... الشقة... الشقة...
ابو هالة: مبروك با بني... مبروك يا هالة... ربنا يجعله بيت السعد ان شاء الله.
هالة: الله يبارك فيك يا بابا... انا عارفة تقلنا عليكم شوية... الكام السنة اللي فاتوا.
ابو هالة: قصدك الست سنين يا بنتي... لا معلش... المهم ان الشقة خلصت و حتنقلوا قريب... هو مش قريب برضه؟
صلاح: ايوة يا عمي، اسبوعين تلاتة بالكتير و ننقل يا عمي.
ابو هالة: الحمد لله يا ابني.
---------------------------------------------------------
صلاح: مبروك يا هالة، ادخلي برجلك اليمين....
هالة: مبروك علينا يا صلاح.....
صلاح: أنا مش مصدق يا هالة... ده حلم و لا حقيقة؟
هالة: حقيقة يا صلاح... حقيقة.
---------------------------------------------------------
هالة: صلاح...
صلاح: يا عيون صلاح... يا روح صلاح... يا قلب صلاح....
هالة: بطل بقي... عايزة ادهن اوض العيال... الوان و كدة...
صلاح: و ماله يا مهجة صلاح... ندهن.
هالة: اوضة مني تبقي بمبي . فيها دواريات و حاجة زي الكواكب و النجوم و كدة يعني...
صلاح: بمبي بمبي بمبي ... الحياة بقي لونها بمبي و انا جنبك و انت جنبي....بمبيييييييي.
هالة: و اوضة خالد....
صلاح: لا... انا اللي حختار لون اوضة خالد...
هالة: اختار يا صلاح... اه يا خوفي.... افكرك بس انك عندك عمى الوان.
صلاح: ماااااشي يا هالة... انا عندي عمى الوان.... طييييب.... خالد بيحب ايه؟
هالة: بيحب العربيات.
صلاح: ايوة ... بس بيحب ايه تاني؟ بيحب يشرب ايه؟
هالة: يشرب ايه؟ !!! اه، لبن بالشوكلاته.
صلاح: ايون، لبن بالشكولاته... هو ده لون اوضه خالد.
هالة: !!!!!!!!!!!!!!
صلاح: اصبري و حتشوفي.... طيب و اوضتنا يا احلي هالة؟
هالة: اوضتنا يا صلوحتي عايزاها بيضا... لا مش بيضا.... عايزاها صفرا.... لا مش صفرا... عايزاها ابيض مصفر.
صلاح: !!!!!!!!!!!!! من عنيا.
---------------------------------------------------------
---------------------------------------------------------