كلمتين جداد في السوق الثوري... الكلمة الاولي: خط و الكلمة الثانية: احمر ... حطهم جنب بعض = خط احمر.... و جمعهم خطوط حمراء... كلمتين كنا بنسمعهم زمان علي فريق الزمالك : ابيض و خطين حمر... خطين اتنين بس مش خطوط!!!
ايه موضوع الخطوط الحمراء دي؟؟؟
سؤال و كنت عاوز إجابته... و لما عرفت إجابته زعلت و ندمت و يريتني ما عرفت الاجابة...
اكتشفت ان حرمانية العبث بالأديان و حرمانية تمثيل شخص الرسول و الأنبياء و حرمانية كل حاجة محرمة بامر الدين تم زيادة بند جديد ليها ... بند ايه.. ده تم اضافة فصل كامل من المحرمات.
اسم الفصل المضاف: الخطوط الحمراء... و برضه للتوضيح مش خطوط فانلة الزمالك... ركزوا معايا شوية بقي...
المحرمات الجديدة او الخطوط الحمراء هي خطوط لا يجوز تجاوزها و الا... موضوع و الا ده موضوع قديم كلنا عارفينه... و للي مش عارف : والا حيطلع ميتين اهلك (انا اسف ده كان مجرد مثال و الله مثال لا اكثر ولا اقل و علي فكرة لو كان حاجة غير كده كان حيكون فيه ذكر للست الوالدة) ما علينا و حقكم عليا... نكمل بقي.....الخطوط الحمراء عبارة عن الآتي:
١- انتقاد القضاء المتباطئ = خط احمر
٢- انتقاد المجلس العسكري = خط احمر
٣- انتقاد طنطاوي = خط احمر و بشرطة
٤- انتقاد مين ولا مين و لا حتي مين اصبح حرام و في مقولة اخري خط احمر....
فاكرين قبل الثورة كان المعارض الغضنفر يطلع في التلفزيون و ينتقد الحكومة و يبستف الوزارة و يتنطط و يتشنج اعتراضا علي رئيس الوزراء و بعدين يوجه الشكر و الدعوة بطول العمر لبابا مبارك... ليه ؟ لان في خط احمر و مش اي خط لَا ده خط احمر عمولة.
المهم و الخلاصة ان وجود الخطوط الحمراء له معني واحد.... وواحد فقط...
بابا مبارك بقي اسمه بابا طنطاوي و ماما سوزان بقي اسمها المجلس العسكري و جيمي بأه اسمه القضاء المتباطئ
و علاء بقي اسمه اللي ميتسماش....
و كل اللي حيكفر و يتجاوز الخطوط الحمراء حتبقي..... تيته حمراء...
تعليق:
المهلوس
- Posted using BlogPress from my iPhone
