الأحد، يونيو 12، 2011

المعونة... و كلنا صبيان المعلمة...



أخيرا فهمت حاجة... يمكن اكون انا الوحيد اللي فهمتها وده أكيد لأ... بس الأكيد ان انا اخر واحد فهمها... اصلها بصراحة واضحة وضوح الشمس بس انا اللي مش مصحصح...
ايه بأه اللي انا فهمته؟ فهمت حدوتة المعونة ... اه و ما ادراك ما المعونة...من يومين كان في سؤال علي فيسبوك عن المعونة و هل هي مذلة ام لا؟ و النهاردة شفت بلال فضل في حلقة من الشهر اللي فات و برضه جاب سيرة المعونة.... و ده خلاني افكر (و ده يعتبر إنجاز لما انا افكر... اصله قليل أوي لما بيحصل)
المهم قبل ما نكمل و نرجع لاصل الحدوتة... احب اسأل، هل من المعقول ان ال مبارك و الحاشية ممكن يخرجوا المبالغ و الاموال اللي سمعنا و قرينا عنها علي مدار السنين من غير دول العالم الغربي ما تعرف؟؟؟؟ فكروا في الاجابة لحد ما احكيلكم حدوتة المعونة اللي عرفتها (لأني فتك و افهمها و هي طايرة) .... اصل الحدوتة: مصر كانت دولة لها صوت في يوم من الايام و كان البعض بيعتبرها دولة قائدة... صح؟ صح ...بس ده كان زماااااان و خلص... ليه و ازاي؟ هو ده اللي انا بمفهوميتي اكتشفته... لما دولة تكون مكتفية اقتصاديا تقدر تكون مستقلة و صوتها عالي، انما لو دولة فقيرة تبقي ساعتها ماشية جنب الحيط و راسها في الارض.
الغرب (و مش حادخل في ليه و عشان ايه؟ ده موضوع تاني) الغرب قرر ان مصر لازم تكون دولة فقيرة... بس ازاي؟ ده كان السؤال الاول و الاجابة كان ممكن تكون سهلة لبلد تانية تكون اصلا فقيرة في الموارد لكن مصر... لأ.... مصر مليانة موارد طبيعية و بشرية جبارة... مصر ممكن يخشلها فلوس و هي نايمة (علي فكرة ده اللي حاصل من سنين) فلوس من قناة السويس، السياحة، المصريين بالخارج، البترول، الغاز، الدهب، الملوخية ... احمدك يارب...
و ده خلق أسئلة كتير، اولها ازاي نفقر و نفلس مصر؟ الاجابة كانت سهلة: حاميها حراميها. و ده اللي حصل (من يوم ما مسك العسكر... لكن خلينا في اللي إحنا فيه) مبارك و العائلة الغير كريمة و الحاشية قاموا بالمهمة خير قيام...
مصر بقت علي الحديدة (فاكرين بابا مبارك لما وقف و قال اجيبلوكم منين؟) مصر بقت عايشة علي الشحاتة (يعني المعونة بالانجليزي ولا..... بالامريكاني)... معونة أمريكية، و معونة ألمانية و معونة من الاتحاد الاوربي و منح من اليابان و ده غير قروض البنك الدولي.... يعني مصر اصبحت دولة عشانا عليك يارب و حسنة او معونة قليلة تمنع بلاوي كتيرة... و يارب تتجوزوا يارب... مصر كان لازم توصل لمرحلة انه لو مركب القمح الامريكي اتاخرت ان المصريين يجوعوا... و لو المعونة الالماينة اتوقفت ان السكة الحديد تخرب... و ياريت ان المعونة كانت بالدولار او اليورو بس... لا... ده احنا شحتنا من بلاد الريال و الدينار و الدرهم و ما ادراك الذل و المهانة ... ما علينا... الخلاصة انه دولة شحاتة = دولة دلدولة.
و بفضل نظام ال مبارك مصر اصبحت دلدولة (مش عاجبكم التعبير السوقي ده، خلاص ما تزعلوش...) مصر اصبحت دولة تابعة (مبسوطين كدة؟) تابعة لأمريكا و تابعة لاوروبا وتابعة لدول الخليج و تابعة لدولة اولاد العم... اقفلي الحدود يا مصر... مصر تقفل الحدود جري... امنعي قوافل الإغاثة يا مصر و علي طول تتمنع القوافل من مرور الحدود و حاجات زي كدة كتير.... فاكرين المشهد ده، من فيلم لعادل ادهم و سناء جميل لما البوليس كان بيقبض عليهم و عادل ادهم قال الافيه الشهير ده: كلنا صبيان المعلمة... المعلمة تقول ادبح يا زكي قدرة... يدبح زكي قدرة...
مصر اصبحت زكي قدرة و المعلمة هي صاحبة المعونة مرة امريكا و مرة اوروبا و مرة .....
دلوقتي أكيد عرفتوا إجابة السؤال ... طبعا ماما امريكا و الغرب عارفين من زمان انهم بيسرقوا و يهربوا و أكيد عرفتوا دلوقت ليه سابوا بل و شجعوا ال مبارك و الحاشية علي سرقة و نهب أموال البلد.... ادبح يا زكي قدرة.... يدبح زكي قدرة.

توقيع:
المهلوس
- Posted using BlogPress from my iPhone