الأحد، أغسطس 28، 2011

فزورة رمضان؟ الجدع يحلها...

كنا متجمعين مجموعة اصحاب وواحد منهم قالنا حكاية جحا و ابنه و الحمار... حكاية قديمة و هي للي مش عارفها ان جحا و ابنه كانوا خارجين و مشيوا هما الاتنين جنب الحمار... جاله واحد قاله مش حرام عليك يبقي عندك الحمار و تمشي انت... فقام جحا ركب حماره و ابنه ماشي جنبه... جاله واحد قاله مش حرام عليك تركب الحمار والولد الصغير هو اللي يمشي... قام جحا نزل من علي الحمار و ركب ابنه و مشي هو... جاله واحد قاله مش عيب الولد الصغير يركب و ابوه هو اللي يمشي... قام جحا ركب ورا ابنه و استمروا في طريقهم... جاله واحد قاله مش حرام عليكم تركبوا انتم الاتنين الحمار الغلبان ده... قام جحا نزل من علي الحمار وقام هو و ابنه شايلين الحمار و مشيوا بيه فاتجمعت الناس و قالت شوف الراجل و ابنه المجانين دول اللي شايلين الحمار و ماشيين بيه....
لما فكرت (و ده نادرا ما يحدث) لقيت ان الحدوتة دي بتحصل كل يوم و كل لحظة عاطل علي باطل... الفزورة بقي: مين جحا؟ ... و مين ابنه؟ .... و مين الناس؟ ... و الأهم مين الحمار؟ مين الحمار؟ مييييين الحمار؟

توقيع:
المهلوس

- Posted using BlogPress from my iPhone