الخميس، أكتوبر 27، 2011

ما ينوب المخلص الا تقطيع هدومه...


مصر بلد الأمثال و الأقوال و العجائب... الناس انقسمت و انقلبوا علي بعض و علي رأي نوارة نجم في احد تغريداتها ان مبارك زرع في الناس كرههم لبعض. و لو ممكن ازود عليها و اقول جت الثورة و خلقت حالة مؤقتة و جمعتهم و خلعوا مبارك بس مقدروش يخلعوا الزرع اللي زرعه...و هو الكره للغير...
و دلوقت البعض ابتدئ حتى يكره الثورة و دول غير اللي كانوا ضد الثورة من اول يوم... النهاردة حرمنا المصون زعلت و اتقهرت لما قرأت و لما سمعت رأي بيلوم الثوار و الثورة علي حالة الفوضي و عدم الامان و الشرطة اللي زي قلتها... و لما فكرنا لقينا ان الفوضي كانت موجودة قبل الثورة و عدم الامان كان برضه موجود قبل الثورة و حتي الشرطة كانت زي قلتها بالنسبة للشعب و كانت تعمل للنظام و حماية النظام فقط لاغير يعني زي قلتها برضه... المهم كل المساوئ دي كانت موجودة قبل الثورة... مصر لم تكن جنة الله علي ارضه و بعد الثورة اصبحت جهنم في الارض... كل حاجة كانت موجودة ... الا الثورة هي التي لم تكن موجودة قبل الثورة...
و دلوقت الناس لقت الشماعة اللي تعلق عليها كل المساوئ و دي الحالة النفسية اللي بتنتج عن التوهان و الخوف من المستقبل و مجئ الفكرة بعد ان راحت السكرة...
دلوقت الثورة هي اللي جت مابين النظام السابق و الشعب اللي كان النظام مطلع عين و بوز امه... الثورة هي اللي خلصت الشعب من ذل مبارك.... و في وسط المعمعة يا حرام الثورة هي اللي اتبهدلت و اتقطعت و اتلعنت و دعوا عليها و علي اللي عملوها كل ده لانها فوقتهم من الاحساس الوهمي بالأمان و بما انها  ام تكتمل بعد و فعلا لم يتوفر الامان الحقيقي فهي ملعونة ملعونة ملعونة... كما لو كانت الثورة هي سبب إن أفراد الشرطة فقدوا انتمائهم للبلد.... كأن الثورة هي اللي خلقت البلطجية.... مش مهم ... المهم إننا لقينا الشماعة ...خلينا نعلق عليها كل فشلنا .... سيبنا كل حاجة الثورة قامت من اجلها .... بس مسكنا في خناق بعض على حاجات لا قيمة لها... وفي الاخر نلوم الثورة هي اللي لخبطت حياتنا.... فعلا ماينوب المخلص الا تقطيع هدومه وكمان تطليع عين أمه....

توقيع:
المهلوس

الثلاثاء، أكتوبر 25، 2011

لو مش عاجبكم ميزاننا روحوا إوزنوا برة....


خلينا نتكلم بصراحة شوية... علي المستوي الدولي....
امريكا قتلت بن لادن في قلب بيته و وسط أهله و لم يتهمها احد من برة ولا من جوة و لا سمعنا صوت اوروبا و الغرب بيتهمها بانتهاك حقوق الانسان لانها قتلت شخص لم يحاكم و لم يحكم عليه قاض بل هو شخص متهم بقتل حوالي ٤٠٠٠ بني ادم (امريكي). انما في ليبيا و في وسط الحرب قام الثوار بقتل القذافي علي ارض المعركة لانه قتل عشرات ألوف البني أدمين (الليبين) و قامت اوروبا و اتهمت الثوار بانتهاك حقوق الأسري و امريكا زعلت و طلبت تحقيق و جمعيات حقوق الانسان و الذي منه هاجت و ماجت... اسميه ايه ده بقي غير انه استهبال و كيل بمكيالين .... لما الغرب يرتكب جريمة تصبح حلالا بلالا و لما الشرق يرتكب نفس الجريمة تصبح وحشية و بربرية.... ده في رأيي المهلوس و رأي المهلوسين أمثالي اسمه ..... (كلمة ابيحة).


علي المستوي المحلي... المصيبة اعظم و اكثر وضوحا... لما مبارك و حاشيته يقتلوا بالأمر المباشر مئات الثوار و يجرحوا ألوف الثوار و بالأمر الغير مباشر يقتلوا ملايين المواطنين و يدمروا صحة أجيال من اهل مصر... و المصيبة انه تقوم ضدهم ثورة و الناس تخلعه و تقلب القعدة علي دماغه هو و أهله و شلتهم الحرامية و... و... و نلاقي في الاخر انه نايم احلي نومة و بيتعالج احسن علاج و مرآته شريكة حياته و جرائمه حرة طليقة ترتع في اجناب المحروسة (ياتري بتعمل ايه؟ فكروا انتم...) وولاده اه في السجن ... استفدنا صلاة النبي... بصوا بقي أنا عندي شبه قناعة تامة (او هلوسة تامة) انهم في السجن حماية ليهم مش عقاب... فكروا كدة احسن مكان يستخبي فيه الحرامي فين؟ جنب القسم... فما بالك بقي لو مسموح له يستخبي جوه القسم/السجن ... مفيش حماية اقوي من كدة... لانه وقت الثورة ولو الناس وصلتلهم كانوا قطعوهم و هو فعلا كان في كلام يطلعوا شرم الشيخ يجيبوهم من قفاهم... و علشان كدة مجمعينهم كلهم في سجن واحد و بكدة تكون الحماية اسهل و اقوي و في نفس الوقت يضحكوا علينا و يوهمونا انهم ممسوكين... و إحنا نلبس العمة او السلطانية... واحد يعني...نكمل موضوعنا... كل العصابة معروفة و معروف جرائمها و لكن بيتحاكموا علي حاجات تانية خالص و حاجات ممكن يطلعوا منها و المصيبة انهم بيتحاكموا قدام محاكم مدنية و مطولة و ممطوطة و ملعوب في أساسها... و موت يا حمار... و علي الناحية التانية تلاقي الثوار بيتشدوا واحد ورا التاني و بيتلسعوا أحكام في السريع قدام محاكم عسكرية... و ياريت وقفت عند الثوار لا دي وصلت للمدونين و كمان دلوقت رسامين الحيطة (جرافيتي)... يعني تمشي في مظاهرة تتشد و تأخذ حكم... تكتب رأيك تتشد و تأخذ حكم... و حتي ترسم رأيك تتشد و تأخذ حكم... الخلاصة و الموعظة الحسنة من الموضوع ده انكم بقي تروحوا اقتلوا و اسرقوا و أفسدوا و انت تبقوا في الامان و أهي دقني آهه لو أخدتم حكم... دي حتي حتكون فرصة تتعالجوا حلو و تناموا نومة مريحة و زي الفل .... اسميه ايه ده بقي غير انه استهبال و كيل بمكيالين .... لما الكبار اصحاب اهل المجلس يرتكبوا جريمة تصبح حلالا بلالا و لما الشعب اللي مش اصحاب اهل المجلس يرتكب فعل لايرقي حتي لمستوي الجريمة تصبح وصمة و جريمة شنعاء.... ده في رأيي المهلوس و رأي المهلوسين أمثالي اسمه ..... (كلمة ابيحة برضه).
في نهاية الامر الغرب و ماما امريكا بيعملوا اللي هما عايزينه و يحللوا و يحرموا زي ما هما عايزين بما يتناسب مع مصالحهم و مصالح شعوبهم ... و عندنا إحنا بقي بابا المجلس برضه بيحاكم قدام محاكم مدنية او محاكم عسكرية و يرزع أحكام و يمنع احكام زي ماهو عايز و بما يتناسب مع مصالحه... و مصالحه هو بس....

توقيع:
المهلوس

الاثنين، أكتوبر 24، 2011

أنا طيب . اه . لكن مش أهبل بريالة . يا مجلس مبارك.


هو إحنا فعلا مصدقين ان مجلس مبارك او ما يطلق عليه المجلس العسكري صادق في نواياه لتسليم السلطة و نقل مصر الي دولة مدنية؟
أفعاله و أقواله تعكس نوايا سوداء و مهببة... كل حاجة حصلت و بتحصل لها تفسيرات واضحة للي عايز يشوف الحقيقة:
- عدم ضرب الثوار: هو فعلا مضربش لانه ساب الداخلية تقوم بالمهمة القذرة دي و لو كان ضرب كان الرأي العام الدولي "وقتها" فضحه و يمكن قطع عنه الفلوس... كلام حماة الثورة ده كلام هجس لانه ساب الثوار يتقتلوا قدامه من البلطجية والشرطة و هو مصدر الطارشة.
- محاكمة مبارك: اللي اعرفه من كتر فرجتي علي التليفزيون و المسلسلات ان اللي بيتحاكم بيكون مسجون مش برة السجن و مصروف عليه ملايين لعلاجه في وقت ملايين من ضحاياه مش لاقيين حد يعالجهم...  و ان المحاكمة لرئيس فاسد بتكون علنية و علي عينك ياتاجر ده طبعا لو مش خائفين ان الكلام اللي حيتقال في المحاكمة ممكن يودي مجلس مبارك في داهية.
- العمل الدائم و الثبور علي استمرار حالة الفوضي و انعدام الأمن ... لا يمكن انه خلال العشر شهور جيش طويل عريض و لواءات فاهمين كل حاجة و فتكين زي بتوع مجلس مبارك دول مش قادرين يلموا الدور و يرجعو الامن للشوارع ... ده وضع مفيد لهم و الحاجة الوحيدة اللي تخليهم يفضلوا ماسكين ... فزاعة الفوضي... زي ما ريسهم قالهم قبل ما يتخلع و يعتكف للنقاهة (اصله بصراحة مش محبوس لو ماخدتوش بالكم) أنا أو من بعدي الفوضى... وهما نفذوا الوصية.
- محاكمة المدنيين أمام محاكم عسكرية  بقي هو اللي بيخلص صاروخ يا باشا... الواحد منهم يتشد، يتحاكم، يتسجن... كل ده قبل ما يمضي علي محضر اعتقاله... ما إحنا في عصر السرعة... عصر الظلم.... عصر العسكر.... عصر مبارك. مدنيين أمام محاكم عسكرية وعسكر أمام محاكم مدنية.
- و بعدين موضوع إلإستفتاء....تم على كام نقطة لتعديل الدستور والناس صدقت وقالت كلمتها وبعديها راح مجلس مبارك مطلع إعلان دستوري 62 نقطة.... حاجة تجيب النقطة.
- وأخيراً وليس أخراً موضوع ماسبيرو.... قتلو القتيل وبعدين اتهمو القتيل.... مينا دانيال الله يرحمه... مطلوب أمام النيابة العسكرية.... بصو بقى ... لا تعليق.... لأن دة تعر....

توقيع:
المهلوس

الأحد، أكتوبر 23، 2011

إنا حر ... أخيرا... لَا .... لسة....

حاحكيلكم حدوتة توتة و كمان ملتوتة... و أنا واثق أنكم حتفهموها.... صلوا علي النبي... كان في اسدين في جنينة الحيوانات واحد عجوز شوية و واحد اصغنن منه و كأي اسود مولودة في جنينة حيوانات بتبقي الحياة في القفص.... و القفص بيبقى هو الحياة... اكلهم بيجيلهم في ميعاده و هما نايمين طول النهار و الليل و آهه ماشية... و هما علي فكرة كان شكلهم بيخوف و صوتهم بيهز الجنينة كلها... اسود بقي... الملك... الليث... الغضنفر... ممكن اكمل باقي الأسامي لو قاعدين فاضيين لبكرة... ما علينا... هما عمرهم ما عرفوا ليه الكل بيخاف منهم!! هما عمرهم ما آذوا حد (و بيني و بينكم هما ما يعرفوش انهم ممكن يأذوا حد و لا حتي يعرفوا ازاي) هما كل اللي يعرفوه انهم يأكلوا اللحمة المتقطعة جاهزة اللي بيوكلهالهم الحارس (و على فكرة عمر ما كان الاكل كفاية)... في يوم وقف عصفور جنب قفصهم و ابتدأ يلاغي الاسود و يكلمهم... الاسد العجوز كان مطنش و مشتري دماغه و العصفور قاعد يتكلم و يحكي عن باقي المناظر في الجنينة و برة الجنينة و عن الحرية اللي بيتمتع بيها و ازاي هو حر يطير من غصن لغصن و من شجرة لشجرة و من جنينة لجنينة... كل ده و الاسد العجوز مصدر الطارشة... انما الاسد الصغنون فكان رامي ودن و مركز في حواديت العصفور ... ده حتي ابتدي يسأل العصفور أسئلة عن الحياة برة القفص و ايه هي الحرية اللي بيتكلم عنها دي... و العصفور بصراحة كان خدوم و جدع و انسجم هو و الاسد الصغنن و بقوا اصحاب... انما الاسد العجوز فكان مع نفسه ... مادام اكله و نومته متوفرة فخلاص هي دي عيشته و أهي ماشية... انما الاسد الصغنن فابتدأ يحلم و يتخيل انه حر و عايش طليق زي العصفور اللي حكاله الحواديت دي كلها... انما يخرج ازاي من القفص!؟ يهرب؟ صعب... و حتي لو هرب حيروح فين؟؟؟ العصفور كان حكاله انه مرة كان طاير و وصل مكان كبير و أراض واسعة فيها اسود و نمور و حيوانات كتير كلها بتتحرك بحرية و مش محبوسة في أقفاص ... الاسد الصغنن عجبته الفكرة و ابتدأ يحلم انه عايش مع الاسود الاحرار برة القفص... ده كان حلمه و قعد يمخمخ مع العصفور صاحبه عن طريقة للخروج من القفص الي الحرية... كل ده و الاسد العجوز بيضحك علي أحلامه و بيقوله يعقل و يرضي بنصيبه .... نصيبه اللي هو باقي الأكل اللي بيفضل من الاسد العجوز (اصل المقامات محفوظة ... الصغير يأكل بعد الكبير) و باقي نصيبه اللي هو الركن الضلمة في القفص (اصل العجوز كان وأخد الأركان الحلوة المنورة) المهم... الخطة اتخمرت و جهزت... الاسد الصغير ابتدأ يعلي صوته و كل يوم يعمل دوشة ... و ابتدأ يروش علي الحارس كل يوم وقت الأكل او التنضيف ... كل يوم علي كدة ... لحد ما إدارة الجنينة خافت و كشت و قلقت ليحصل مصيبة و الاسد يهجم علي حد و ياذيه و ساعتها الجنينة ممكن تتقفل و يتسرحوا كلهم و يتقطع عيشهم... لحد في يوم الاسد الصغنن كان عامل الدوشة بتاعة كل يوم و لقي جو لبش و قلق حوالين القفص و ناس كتير متجمعين و قبل ما يفهم ايه اللي حصل حس بشكة... لامؤاخذة في المؤخرة و قبل ما يروح في النوم سمع الحارس بيقول : اهو نخلص من دوشته و يمكن يهدي لما يعيش برة القفص... ودي كانت اخر حاجة سمعها و راح في النوم و ابتدأ يحلم ... برة القفص.. يعني حيبقي حر... طليق زي ما العصفور قاله... و ابتدأ يحلم ان حياته حتتغير و حيتحرك من مكان لمكان و حيختار المكان اللي يعيش فيه... و يأكل اللي هو عاوزه وقت ما هو عايز... حرية بقي...
(العصفور كان حكي للأسد انه هو اللي بيوكل نفسه بنفسه... يعني مفيش حارس و لا اكل)
فكر في عقل باله.. مفيش مشكلة هو صغنن و مخه شغال و صحته بمب فأكيد يقدر يوكل نفسه ولا الحوجة للحارس او غيره... كل ده و هو نايم بيحلم... فاتت شوية و ابتدأ يصحي... بص حواليه لقي اسود تانية كتير... بص شوية كمان ملقاش قفص ... قلبه دق جامد قوي من الفرحة... أخيرا برة القفص ... أخيرا حر... ياه ده إحساس الحرية ده حلو بشكل.... و لقي العصفور صاحبه بيدور عليه و لما لقاه ابتدئ يحكيله عن الاحساس الجميل بالحرية و ازاي انه نجح في الخروج من القفص و مستحيل يرجعله تاني بعد ما بقي حر طليق... و لسة حيخلص الجملة لقي عربية نص نقل فيها واحد لابس زي الحارس اللي فات و لقاه برضه بيرمي لحمة متقطعة و الاسود كلها بتجري تأكل منها (و برضه الكبير كان بيأكل الاول و الصغير في الاخر ياكل اللي فاضل ..ده لو فضل حاجة) وقف متنح مش فاهم حاجة!!! ايه اللي بيحصل؟؟؟ ازاي؟ أمتي؟ فين؟ مين؟ كان مذبهل ... العصفور صاحبه ابتدأ يفهمه الحقيقة ... المرة... و هي انه مش حر هو مجرد أتنقل من حديقة حيوانات مقفولة وودوه حديقة حيوانات مفتوحة... الاسد بصله و هو مش فاهم حاجة... العصفور شرحله ... ببساطة انت خرجت من القفص الصغير... بس دخلت القفص الكبير. هنا الاسد فهم و اكتئب... و قال خلاص الحرية حتفضل حلم و ده آخرها...
انما العصفور ابتدئ يحكيله عن مكان مش بعيد قوي ... لا هو جنينة مقفولة و لا هو جنينة مفتوحة انما هو المكان الحقيقي اللي كل الحيوانات فيه فعلا حرة .... الناس بتسميه الغابة... و هو العيشة فيها صعبة و احيانا خطرة و فيها خناقات بين الحيوانات و ساعات القوي بيأكل الضعيف... بس كلهم أحرار... و علي العموم انت اسد يعني انت حتكون الاقوي ... الاسد ابتدأ يحلم تاني بالحرية ... و افتكر الاحساس الجميل اللي حس بيه قبل ما يتصدم و  يكتشف موضوع القفص الكبير اللي أتنقل ليه... اااه كان إحساس جمييييل... الحرية فعلا طعمها حلو .. و دي حتي كانت حرية مضروبة فما بالك بقي بالحرية الاصلي... و فاق من الحلم مقرر انه مش حييأس و لازم يكمل المشوار للحرية و ابتدأ هو و العصفورة التخطيط ... ازاي يخرج من هنا و يوصل الغابة؟... ازاي؟ ... ازاي؟
ما تفكروا معانا بدل مانتم قاعدين تقروا و متنحين كده.... ازاي؟ ... ازاي نوصل للحرية؟؟؟

توقيع:
المهلوس

الاثنين، أكتوبر 17، 2011

هو باين اوي علي وشنا اننا بنحب نتليزء علي قفانا...



أكيد طبعا... و الا مكانش الباشا اللواء/ العصار و الباشا اللواء اللي كان معاه كلمونا او اتكلموا عنا كدة... أبنائي الطلبة إحنا حندفعلكم مصاريف المدرسة- أسف - مصاريف الترشيح و لو كنتم حلوين يمكن نخليكم تنجحوا كمان... يلا يا حلويين هييصوا و خدوا البنبوني ده عمو احمد شفيق بعتهولكم...
ولما تكبروا شوية و تبقوا جاهزين للديمقراطية حنبقي نديهالكم لأنه زي ما عمو عمر سليمان قالكم قبل كدة أنكم مش جاهزين لسة...
لَا .... ده احنا أكيد هبل و الهبل من النوع الوراثي كمان... بجد بقي لانه فعلا بقالنا ٣٠ سنة بنسمع نفس الكلام و كان مسمع معانا و دلوقت ايه اللي يمنع انه يستمر؟؟؟
ايه؟ الثورة..!! اه الثورة اللي مات فيها شباب زي الورد ... اااااه الثورة اللي انجرح فيها ناس من كل شكل و لون.... اه الثورة اللي حققت مطلب الملايين و خلعت اللي ميتسماش و حبست الفاسدين و المفسدين.... الثورة اللي ... مفيش اللي ... اصله بصراحة ده هو المطلب الوحيد اللي أتحقق ... خلع المخلوع... ايه؟ حل البرلمان ده كمان كان مطلب و حصل؟.. ماشي يا خويا حلينا البرلمان ...بس علي فكرة شكله حيرجعلنا تاني .. اصل الفلول لسة حرة طليقة و تغرد تغريد العصافير...
و بناء لما سبق ذكره يهمني ان أأكد لكم انه باينه اننا هبل او علي الاقل شكلنا كدة... و تستأهل نتلزق علي قفانا و الدليل اهو ...المجلس مازال مقتنع ان الثورة دي كانت سحابة صيف و حتعدي و كله حيرجع زي زمان... باختلاف الأسامي... و اطلقوا انتم بقي للخيال العنان... (أنا قلت أسامي مش سامي ... اللهي يجعل هلاوسنا خفيفة عليهم).

توقيع:
المهلوس


الأحد، أكتوبر 09، 2011

احمد صاحبي قاللي...



أنا كنت فاكر انني فاهم كل حاجة و فتك.... زيي زي كل المصريين... لكن اكتشفت انني فاهم حاجة بس مش فاهم كل حاجة و أني فتك بس مش فتك قوي يعني... أنا دلوقت مش حاكتب عن اللي حصل عند ماسبيرو... اللي حصل ده عار علي كل من شارك في تسجيل هذه النقطة السوداء في تاريخ مصر...
انما عايز اكتب علي سبب هذه الاحداث و المتسبب فيها و يعني من الاخر مين اللي ورأ كل البلاوي اللي إحنا فيها من اول ايام الثورة لحد دلوقت...
في ناس بتقول الثورة هي السبب... ده رأيهم ولا اعتقد انه يستحق الرد عليه... انما في ناس كتير بتقول العسكر هما سبب كل المشاكل و أنا متفق معهم في ان العسكر اساس المهزلة اللي إحنا فيها و انهم بيلعبوا لعبة مش نظيفة... و لكن لما كنت ابص ابعد من كده و افكر مخي الضارب بياخدني سكة من اتنين، و هما:
١- نظرية المؤامرة ... بمعني ان العسكر طمعانين في الحكم و كل اللي بيحصل ده دلوقت تخطيط هدفه التقسيم من اجل السيطرة... و أخربها لحد ما كله يسلم و يقبل حكم العسكر والا الفوضي حتعم و البلد حتبوظ و مفيش منقذ غير العسكر 'اللي مش عاوز يحكم!!! بس مضطر والا البلد حتبوظ' و إحنا اللي حنتحايل عليهم يحكمونا بدل ما نموت بعض... دي نظرية المؤامرة...
٢- نظرية المزنوؤين... ان اللي ماسكين البلد دول عالم مش فاهمة حاجة و بيتخبطوا و العملية باظت و ضربت منهم... و انهم في حيص بيص و انهم مش عارفين يخرجوا من الوضع اللي حطوا نفسهم فيه و اتزناؤا فيه زنئة سودا...
و لحد هنا و أنا كنت سعيد بنفسي و مقتنع بالنظرية رقم واحد و هي المؤامرة و ان كل اللي بيحصل ده تخطيط للحصول علي الكرسي... لحد ما كلمت احمد صديقي العزيز... احمد رجل اعمال دماغه موزونة و تفكيره بيعجبني ... هو طلع عينه من خسارة اعمال و أموال نتيجة اللي بيحصل .... الله يكون في عونه...
احمد زود نظرية تالتة و هي...
٣- نظرية (أنا حاسميها التنقيط)... نظرية التنقيط انه المجلس بيلعب بمطالب الناس و ده تخطيط كبير و شغل دماغ عالية... الثوار يقدموا ٣ مطالب و ينتهي الامر ان المجلس يديهم طلبين بس و التالت 'حين ميسرة' و ايه كمان تاني يوم يسحب واحد من الطلبين اللي وافق عليهم و الثوار ينتهوا بانهم اخدوا طلب واحد و هما بيحمدوا ربهم انه قدروا يخدوا حاجة... و ده ليه بقي؟ علشان سقف المطالب يفضل وااااااطي و الفترة تطول الي ما لا نهاية و الثوار عمرهم ما حياخدوا كل اللي بيطالبوا بيه و نقعد بقي في شد و جذب .... مطلبين لا واحد ... ثلاث مطالب لا مطلبين... طب مطلب واحد... حنفكر و ندرس و نرد عليكم ... و عيش بقي... نقطة نقطة ...و نشوف مين حيتنقط ... اللي نفسه أطول هو اللي حيكسب
بعد تفكير عميق وصلت للتفسير النهائي الشامل الكامل للبلوي اللي إحنا فيها...
النظرية الشمولية (جامدة دي) و هي كوكتيل من التلاتة... مجموعة مش فاهمة حاجة بتنفذ نظرية مؤامرة اللي مخططلها حد ما و الهدف القضاء علي الثورة و تكريه الناس فيها و في اللي عملوها و ان العسكر هو الحل و ده بشهادة الجماعة أياهم بتوع الاسلام هو الحل...

توقيع:
المهلوس

أنا مصري برة بس مش مصري براني... ومن حقي انتخب...


عشت طول عمري في مصر ولكن أول مرة اصوت في إنتخابات كانت لما عشت برة مصر... حاجة تكسف.... دولة ذي مصر تاريخها عريق وقديم ولكن اولادها لا ينتخبوا ....ليه؟ (لحد إستفتاء ما بعد الثورة)
لأن الجميع كان مقتنع إن صوته لا يؤثر ولا يطلع ولا ينزل ولا يودي ولا يجيب.... واللي الحكومة عايزاه يكسب (أل يعني كسب فعلاً .... الحقيقة هو هيكسب فلوس دة أكيد)  هيكسب ويمسك الكرسي سواء كرسي في مجلس الشعب أو الشورى (إلي ذي قلته) أو حتى الرياسة ... المهم... لما مريت بتجربة الانتخاب برة مصر اكتشفت انها حاجة حلوة وكويسة ومش عيب ومش حاجة حرام اني اختار ....
الاختيار كلمة قصيرة و صغيرة لكن تأثيرها رهيب... أنا لا أتذكر اني في مصر مارست حقي في الاختيار بالصورة المطلقة اللي شفتها في بلد الفرنجة...
عندهم اختيارات معينة كانت غريبة اني مجرد أسمع عنها... مثل:
إختيار الدين... في ناس كتير هنا اختارت دينها ... دي كانت حاجة جديدة ... في اختيارات أخرى مكن اتفهمها أكتر مثل: إختيار التعليم وتوقيت التعليم بمعنى إن الطالب ممكن يدخل الكلية اللي عاوزها طالما هو يصلح أكاديميا لأنه هو كمان اللي هيدفع مصاريفها.... وممكن يأجل سنة دراسية من غير أمه متنتحر وأبوه يتشل بعد ما يقتله.... و دة مثال على الاختيارات اللي بيمارسوها هنا... وفي اختيارات شخصية كثيرة .....
وبعدين والأهم وهو ده موضوعنا، الناس هنا بتختار بدءًا من حاكم الدولة ومروراً بنواب المجلس ووصولاً للمحافظين وحتى العمدة بتاع مدينتنا....
في الغرب في عيوب كتير وفي مزايا كتير بس كلها تقريباً مبنية على ألاختيارات إلي بنعملها.... وعلى فكرة موضوع الاختيار دة صعب جداً... لأن معناه إننا على طول بنعمل اختيارات وبنتخذ قرارات.... ودي مسؤلية كبيرة ...علشان كدة حكومتنا في مصر كان قلبها علينا فوفرت علينا مجهود إتخاذ القرار... وحرمتنا من الاختيار.... في كل حاجة ماعدا
إختيار فودافون ولا موبينيل ولا إتصالات..... نرجع لموضوعنا....
الاختيار واتخاذ قرارات فعلاً صعب لأنه هيكون قرارك و إنت المسؤول عنه و عن تبعاته.... يعني علشان تختار لازم تكون مستعد تتحمل نتائج الاختيار طالما دة كان قرارك... علشان كدة لم جينا ننتخب برة و بما إن تجربة اختيار اللي يحكمنا كانت جديدة علينا فكان لازم نجهز لها كويس .... حاجة جديدة بقى...... وخصوصاً إن الاختيار ده قرار حنعيش نتيجته لسنين قدام...على الأقل أربع سنوات لحد الإنتخابات الجاية.... فاستعدينا ...ازاي؟ أقولك....
قرأنا عن الأحزاب الموجودة على الساحة السياسية وعرفنا برنامج كل واحد فيهم... وبعدين عملنا مقارنة بين البرامج السياسية وشفنا من أكتر برنامج يصلح للي احنا عايزنه واللي من وجهة نظرنا هيخدمنا ويخدم البلد أكتر... يعني من الاخر مصلحتنا مع مين... بالبلدي كدة.... اللي هيخدمني هو اللي ياخد صوتي... (مش نظام مصر قبل الثورة ... إن أنا اخدم اللي أخد صوتي حتى من غير مدهوله)
وبرضه علشان كنا جداد في البلد فسألنا الناس هنا عن تاريخ الاحزاب دي في حياة البلد السياسية... ومين كان أحسن من مين ومين نجح ومن فشل في تحقيق أحلام الناس...
و يعني أيه حزب ليبرالي وايه حزب محافظين وأيه حزب أخضر ...اه وأيه هو باءة الحزب الوطني الديمقراطي  ...اه والله في حزب هنا إسمه كدة... بس سبحان الله حاجة تانية خالص.... يعني المشكلة مش في الإسم ..... المشكلة في من شوهوا معنى الاسم و غيرو مفهومه عندنا .... وكمان ذي ما الاحزاب مهمة برد لازم نعرف مين رؤساء الاحزاب دي وخلفيتها أيه؟ المهم في الناس دي هو مدى قدرتها على تنفيذ برامج احزابهم... والتعامل مع الأحزاب الاخرى... وكدة يعني...  وفعلاً مفيش إنتخابات حصلت إلا واحنا بننتخب ...مسبناش يا باشا....
الخلاصة إن الناس في مصر دلوقتي كلهم بيتكلموا سياسة وكله فاهم و اللي مش فاهم بيحاول يفهم.... حجة إن الناس غير قادرة وغير مؤهلة دة كلام فارغ.... لو توفرت السبل والسياسات إلي تضمن نزاهة الانتخابات  كل واحد سوف يؤدي دوره ويحافظ على حقه في الاختيار... يعني على الطريق الصحيح...
أي مواطن من حقه إنتخاب من يمثله في بلده... 
احنا بقى اللي برا مصر أيه موضوعنا؟ ماهو برضه من حقنا ننتخب اللي هيحكم بلدنا طالما القانون يعترف بنا كمواطنون مصريون يبقى لابد أن نأخذ حقوقنا كاملة و علينا أن نقوم بواجباتنا كاملة و مسؤليتنا إختيار من يحكمنا..... احنا مصريين برة مصر...اه... لكن مش مصريين براني....

توقيع:
المهلوس

الأربعاء، أكتوبر 05، 2011

البيان الاخير الذي يتمني المجلس إعلانه..

البيان اللي قبل قبل .. قبل الاخير ...
رسالتنا الي شعبنا الحبيب و ابناء وطننا الغالي و العزيز علينا جميعا.
انه بتاريخ ٢٥ يناير٢٠١١ قامت الثورة المصرية الشريفة و قام بها شباب مصر الشرفاء و ساندهم الشعب و الجيش المصري حين قامت الثورة بالخروج الي الشارع.

البيان اللي قبل قبل الاخير...
رسالتنا الي شعبنا الحبيب و ابناء وطننا الغالي و العزيز علينا جميعا.
انه بتاريخ ٢٥ يناير٢٠١١ قامت الثورة المصرية الشريفة و قام بها شباب مصر الشرفاء و ساندهم الشعب و الجيش المصري حين قامت الثورة بالخروج الي الشارع لتمشية الكلب يوم ١١ فبراير ٢٠١١.

البيان اللي قبل الاخير...
رسالتنا الي شعبنا الحبيب و ابناء وطننا الغالي و العزيز علينا جميعا.
انه بتاريخ ٢٥ يناير٢٠١١ قامت الثورة المصرية الشريفة و قام بها شباب مصر الشرفاء و ساندهم الشعب و الجيش المصري حين قامت الثورة بالخروج الي الشارع لتمشية الكلب يوم ١١ فبراير ٢٠١١ حتي حدث ما حدث و راح الكلب.

البيان الاخير...
رسالتنا الي شعبنا الحبيب و ابناء وطننا الغالي و العزيز علينا جميعا.
انه بتاريخ ٢٥ يناير٢٠١١ قامت الثورة المصرية الشريفة و قام بها شباب مصر الشرفاء و ساندهم الشعب و الجيش المصري حين قامت الثورة بالخروج الي الشارع لتمشية الكلب يوم ١١ فبراير ٢٠١١ حتي حدث ما حدث و راح الكلب... مات الكلب بعد ما خبطته العربية و الثورة كانت ماسكة الكلب... الثورة ماتت.

ده بقي البيان بتاع الثورة الي المجلس العسكري...
اقعد احلم لانه مش حيحصل... الثورة مش حتموت.... الثورة مشت الكلب و قاعدة علي كلبك ... اقصد قلبك.

توقيع:
المهلوس

الأحد، أكتوبر 02، 2011

أمام محكمة الشعب مع ...


تخيلوا معايا اننا في قاعة محكمة و ان المشير واقف و بيتسئل و بيجاوب.....

على فكرة الاسئلة سهلة جدا وكل المصريين عارفين موضوعها وعارفين اجابتها كمان....

يا سيادة الشاهد، بما انك كنت وزيرا لاقوى وزارة إستراتيجية في حكومة مبارك لمدة تقترب من  ال ٢٠ عاما، فنحن نثق انه في قدرتك إلاجابة علي بعض الأسئلة... فلنبدأ:

س- اسمك؟
ج: محمد حسين طنطاوي

س- سنك؟
ج: حاجة و سبعين سنة.

س- مهنتك؟
ج: وزير دفاع جمهورية مصر العربية.

س- رتبتك؟
ج: مشير.

قول: والله العظيم أقول الحق و لا شئ غير الحق و الله علي ما أقول شهيد. (يا ريت تحلفوا أنتم كمان علشان هتجاوبوا أنتم كمان)

س١- هل كنت تحضر اجتماعات مجلس الوزراء و مؤتمرات الحزب الوطني وهل كنت تتعامل وتختلط بباقي الوزراء ؟
للتسهيل علي سيادتك، اختر من الإجابات التالية:
أ- نعم لقد حضرت العديد من الاجتماعات و المؤتمرات.
ب- نعم لقد حضرت العديد من الاجتماعات و المؤتمرات لكني لم اكن اتحدث مع احد خلالها.
ت- نعم لقد حضرت العديد من الاجتماعات و المؤتمرات و قد حاولت عدم حضورها و لم اقدر.
ث-نعم لقد حضرت العديد من الاجتماعات و المؤتمرات و لقد استفدت منها و لذلك لم اعترض
ج- لا اعلم شيئا عن هذا الموضوع .. و من الاخر معرفشي حاجة.

س٢- هل نما الي علمك خلال سنوات خدمتك في حكومة الرئيس السابق انه قد وقعت تصرفات و افعال تعد من اعمال الفساد و استغلال النفوذ مثل تخصيص اراضي او مشاريع لفئة من الناس المقربين لعائلة مبارك؟
اختار:
ا- نعم لقد علمت عن بعض التصرفات.
ب- نعم لقد علمت عن هذه التصرفات و لكني لم افعل شيئا حيالها.
ت- نعم لقد علمت عن هذه التصرفات و قد حاولت منعها و لم اقدر.
ث- نعم لقد علمت عن هذه التصرفات و لقد استفدت منها و لذلك لم اعترض
ج- لا اعلم شيئا عن هذا الموضوع .. و من الاخر معرفشي حاجة.

س٣- هل شهدت او حتي سمعت عن تضخم ثروة كل من:
- محمد حسني مبارك
- سوزان ثابت
- جمال مبارك
- علاء مبارك
- أحمد عز
- فتحي سرور
- صفوت الشريف
- حبيب العادلي
- ابراهيم سليمان
- آخرين من الوزراء و القيادات السياسية و خاصة من اعضاء الحزب الوطني
اختار:
أ- نعم لقد علمت عن تضخم بعض هذه الثروات.
ب- نعم لقد علمت عن تضخم هذه الثروات و لكني لم افعل شيئا حيالها.
ت- نعم لقد علمت عن تضخم هذه الثروات و قد حاولت منعهم و لم اقدر.
ث- نعم لقد علمت عن تضخم هذه الثروات و لقد استفدت منها و لذلك لم اعترض
ج- لا اعلم شيئا عن هذا الموضوع .. و من الاخر معرفشي حاجة.

س٤- هل لاحظت نوع من انواع البذخ الواضح في اسلوب حياة افراد اسرة مبارك و موظفي الدولة من كل من سبق ذكر أسماءهم و القيادات الأخري من المقربين لعائلة مبارك، بذخ مثل: فيلات سكنية، شاليهات صيفية، سيارات خاصة فارهة، الخ... الخ... الخ... لا يتناسب مع الدخل المقرر لوظائفهم.
اختار:
ا- نعم لقد لاحظت بعض انواع البذخ.
ب- نعم لقد لاحظت هذا البذخ و لكني لم افعل شيئا حياله.
ت- نعم لقد لاحظت هذا البذخ و قد حاولت منعه و لم اقدر.
ث- نعم لقد لاحظت هذا البذخ و لقد استفدت منه و لذلك لم اعترض
ج- لا اعلم شيئا عن هذا الموضوع .. و من الاخر معرفشي حاجة.

س٥- ما مدي علمك بمستوي الفساد الاداري في مصر؟ و ان مصر احتلت المركز ٦٩ من ١٨٠ دولة عام ٢٠٠٩؟
اختار:
ا- نعم اعلم بوجود الفساد الاداري و انتشاره.
ب- نعم اعلم بوجود الفساد الاداري و انتشاره و لكني لم افعل شيئا لتغييره.
ت- نعم اعلم بوجود الفساد الاداري و انتشاره و قد حاولت التدخل لتغييره و لم اقدر.
ث- نعم اعلم بوجود الفساد الاداري و انتشاره و لقد وافقت عليه و لذلك لم اعترض
ج- لا اعلم شيئا عن هذا الموضوع .. و من الاخر معرفشي حاجة.

س٦- هل تعلم مدي سوء الحالة الصحية للشعب المصري؟ و وصوله الي اعلي المستويات الدولية في الإصابة بأمراض فيروس سي، فشل كلوي، السرطان و الامراض المستوطنة؟
اختار:
ا- نعم اعلم نسبة المرض و مستوي الإصابة بالأمراض المستوطنة.
ب- نعم اعلم نسبة المرض و مستوي الإصابة بالأمراض المستوطنة و لكني لم افعل شيئا لتغيير الوضع.
ت- نعم اعلم نسبة المرض و مستوي الإصابة بالأمراض المستوطنة و قد حاولت التدخل لتغيير الوضع و لم اقدر.
ث- نعم اعلم نسبة المرض و مستوي الإصابة بالأمراض المستوطنة و لقد وافقت عليها و لذلك لم اعترض
ج- لا اعلم شيئا عن هذا الموضوع .. و من الاخر معرفشي حاجة.

س٧- هل تعلم مدي سوء مستوي التعليم المصري؟ و وصوله الي ادني المستويات الدولية؟ و ان نسبة الأمية وصلت الي ما يزيد عن ٤٠٪ من الشعب؟
اختار:
ا- نعم اعلم نسبة الجهل و مستوي التعليم المتدني.
ب- نعم اعلم نسبة الجهل و مستوي التعليم المتدني و لكني لم افعل شيئا لتغيير الوضع.
ت- نعم اعلم نسبة الجهل و مستوي التعليم المتدني و قد حاولت التدخل لتغيير الوضع و لم اقدر.
ث- نعم اعلم نسبة الجهل و مستوي التعليم المتدني و لقد وافقت عليها و لذلك لم اعترض
ج- لا اعلم شيئا عن هذا الموضوع .. و من الاخر معرفشي حاجة.

س٨- ما مدي علمك بمستوي الفقر في مصر؟ و ان نسبته وصلت الي ٤٠٪ من الشعب؟ وان متوسط دخل الفقراء وصل الي ٢ دولار في اليوم؟
اختار:
ا- نعم اعلم نسبة الفقر و مستوي دخل الفقراء.
ب- نعم اعلم نسبة الفقر و مستوي دخل الفقراء و لكني لم افعل شيئا لتحسينه.
ت- نعم اعلم نسبة الفقر و مستوي دخل الفقراء و قد حاولت التدخل لتحسينه و لم اقدر.
ث- نعم اعلم نسبة الفقر و مستوي دخل الفقراء و لقد وافقت عليه و لذلك لم اعترض
ج- لا اعلم شيئا عن هذا الموضوع .. و من الاخر معرفشي حاجة.

س٩- ماهو مستوي دخلك كوزير الدفاع لجمهورية مصر العربية؟ (دخل وزير الدفاع الامريكي ٢٠٠ الف دولار في السنة - حوالي مليون و ٢٠٠ الف جنيه مصري في السنة)
اختار:
أ- الف الي ٥٠ الف جنيه مصري شهريا.
ب- ٥٠ الف الي ١٠٠ الف جنيه مصري شهريا.
ت- ١٠٠ الف الي ٢٠٠ الف جنيه مصري شهريا.
ث- ٢٠٠ الف الي مليون جنيه مصري شهريا.
ج- لا اعلم شيئا عن هذا الموضوع .. و من الاخر معرفشي حاجة.

سؤال أخير يا سيادة المشير... 

س١٠ -منذ بداية الثورة و خاصة في الايام الاولي، هل تعتقد انه يوجد مواطن مصري واحد لم يري او يسمع اي من الاحداث التي دارت في الميدان من اعتداء الشرطة علي المتظاهرين؟
اختار:
ا- نعم لقد تابع الجميع هذه الاحداث.
ب- نعم لقد تابع الجميع هذه الاحداث و لكني لم افعل شيئا لوقفها.
ت- نعم لقد تابع الجميع هذه الاحداث و قد حاولت التدخل لوقفها و لم اقدر.
ث- نعم لقد تابع الجميع هذه الاحداث و لقد وافقت عليها و لذلك لم اعترض
ج- لا اعلم شيئا عن هذا الموضوع .. و من الاخر معرفشي حاجة.

تفتكروا الاجابة عن اي من الأسئلة ممكن تخرج من الاختيارات الخمسة المطروحة لكل سؤال؟؟؟ بيتهأيلي لا ... كدة ولا كدة الاحتمال الاكبر ان الموضوع حيمشي : س و ج (يعني المشير حيختار الاجابة 'ج')

أنا عارف ان الموضوع ده هلوسة و ان المشير عمره ما حيتسئل الأسئلة دي... لكن إحنا ممكن نسأل نفسنا و نشوف المشير ممكن يجاوب بأيه...
و ساعتها يمكن.... يمكن نعرف مين بينتمي الي النظام السابق (وافتكروا إن الساكت عن الحق شيطان اخرس) و بالبلدي (من عاشر القوم ٤٠ يوم صار منهم) و مين مع الثورة و مين ضدها لان الثورة لو كملت مين حينضر و يتأذي و يمكن لا سمح الله ينضم لأصحابه....

توقيع:
المهلوس