السبت، ديسمبر 28، 2013

كلام في ....... السياسة

نحن في المرحلة الحالية محتاجين نتعاون جميعا عن طريق الاستقواء المركزي و بناء علي الخطة المحورية للوصول الي الاهداف اللا تطبيقية في الزمن العابر و الغابر علي السواء.
و لكن استكمالا للحوار البؤري المنطبق و المتطابق مع الميول الاساسية و الثانوية للمحاورين النخبويين و بناء علي الايدلوجية المؤثرة في الكيان الاجتماعي و النخبوي علي السواء لابد من ان يكون الحوار "علي مستوي القاعدة" الشعبية و ذات التأثير الاساسي في تكوين الايدلوجية.
كمرحلة اولية و ابتدائية للحوار سيتقم تقسيم المتحاورين الي:
- نخبويين فشلة
- سياسيين فشلة
- عسكريين فشلة
- ثوار 
- شهداء
- باقي الشعب المطحون
هذه المجموعات تكون في كينونتها ذات تأثير في أهداف الحوار المثالي، و لكن بالشروط التالية:
- الاساس يكون  متطابق مع الأسلوب المبدئي 
- ثانيا ان تكون ثانويات المرحلة متجانسة مع الاساسيات
- و اخرا و ليس اخيرا ان تنطبق الشروط السابقة في سياقها المحدد و المقرر للابعاد المذكورة فيما يلي:
  - البعد الاول:     ميتفازيقيات المرحلة 
  - البعد الثاني:   اندماج الاضلاع الثلاثة لتكوين هرم او مثلث الاندماج الكامل

لو نجحنا و لو جزئيا في تطبيق ما سبق و حتي لو جزئية ضمنية غير كاملة حينتج عنه حوار بؤري و منهجي يضيف الي الزخم الحالي و بالتالي سيؤدي الي تواصل الاطراف المتحاورة و يكون منظومة هيكلية ذات ابعاد ثلاثية و متنامية.

و محدش يسألني اي حاجة عن اللي كتبته لأني مش فاهم حاجة و هو مش مهم نفهم... انما المهم و كما قالت النخبة: العوالم جم ....العوالم جم.

توقيع:
علي حسني



الخميس، ديسمبر 12، 2013

وصية عم محمد... او عم أحمد مش فارئة...

انا محمد او زي ولاد الحلال ما بيندهولي عم محمد و ساعات عم احمد.... مش فارئة ماهو كلها اسامي سيدنا النبي...
لو بتقروا الكلام ده فمعني كدة انني مت فلازم وحياة اغلي عزيز عندكم تعرفوا ان دي وصيتي و ربنا يكرمكم تنفذوا اللي فيها لو امكن... و علي فكرة هي حاجات مش صعبة او مستحيلة... دي حاجات عادية يعني ولا مؤاخذة...
اعرفكم بنفسي الاول لجل ما يبقي البساط احمدي...
انا محمد او احمد مش فارئة... سني ٣٠ او ٤٠ سنة و برضه مش فارئة... انا متعلم ثانوي صناعي بس برضه التعليم من عدمه مش فارئة...
كنت شغال عامل في مصنع و لا مؤاخذة بعقد مؤقت و كان الباشمهندز صاحب المصنع كل كام شهر يمشينا لما العقد يخلص و بعديها بشهر نرجع بعقد جديد... كنت انا و شباب كتير شغالين معايا كدة.... عمري مافهمت ليه الغلبة دي!!؟ لحد ما واحد من الشباب فهمني... الموضوع له علاءة بالتأمينات او حاجة زي كدة ... المهم الباشمهندز بيوفر مصاريف كتير اوي بالطريقة دي.
عالعموم نحمده شغالين و عايشين.
كنت مأجر أوضة تحت سلم عمارة شرك مع اتنين زمايلنا جايين من الارياف... الاوضة الصراحة كانت تغم النفس، متر في مترين ولا منفد هوا و لا يحزنون بس الحمدالله سترانا و لمانا... دورة المياة ولا مؤاخذة كانت عالسطح و الصراحة كانت نضيفة و زي الفل لأن ام سماح اللي ساكنة عالسطح مراعياها... اصل ولا مؤاخذة كنا بتاع ٣ -٤ اوض اللي بنستخدم نفس الدورة... كلهم عالسطح ما عدا احنا بس اللي تحت السلم.
الحياة الف حمد وشكر ليك يا رب كانت ماشية و عايشين نحمده....
لحد ما ربنا ابتلا واحد من الشباب بمرض والعياذ بالله هد حيله و رقد في الاوضة... خدناه مستوصف الجامع اللي في اخر الشارع و الدكتور قال مفيش فايدة.... و الشاب راح فطيس.... الله يرحمه و معرفناش فين اهله عشان نبلغهم و يدفنوه ... اصله كان كتوم اوي الله يرحمه... المهم اهل الخير في الجامع قاموا بالواجب و دفنوه مكان ما الغلابة كلهم مدفونين...
اتاري ايه المرض اللي عند الشاب ده ولا مؤاخذة كان مُعدي و لطّني... نفس الكحة و كرشة النفس و حاجات كتير... اول ما حسيت بيه افتكرت اللي قاله دكتور المستوصف انه لو كان الشاب الله يرحمه جاله بدري و في اول العيا كان ممكن الدوا يشتغل و يخف... فجريت جري علي المستشفي العام بتاع الحكومة... ووصفولي دوا.... رحت المصنع لجل ما فّهم الباشمهندز انني عيان و محتاج كام يوم علاج و لو ممكن يساعدني في العلاج لو امكن... يلا ربك يسامحه و يسامحنا معاه... طردني و قاللي عقدك خلص بس ربنا يكرمه قالي لما تخف حنبقي نرجعك تاني و عطاني عشرة جنيه و هما دول اللي جابولي الدوا ربنا يكرمه... ابتديت اخد الدوا و لكن بعد ما العلبة خلصت لسة التعب هوا هوا و يمكن زاد التعب شوية و هدة الحيل كسرتني و لا مؤاخذة... رجعت المستشفي و دخلوني ربنا يكرمهم و شافني الدكتور و قالي الدوا من غير غذا ما ينفعش... اصله معرفش ان المصنع رفدني و الفلوس خلصت و حتي الاوضة مش راجعها تاني فالغذا حيجي منين و لا مؤاخذة .... دلوقت ماليش غير ربنا و المستشفي...
الحمدالله حجزوني بالمستشفي و الدكتور اللي دخلني قاللي ممكن بالعلاج اخف و هو اللي دخلني المستشفي الله يكرمه... هو مكانش في سرير صحيح بس واحد ابن حلال كان عامل عمليه و حالته بتتحسن رضي الله يكرمه يشركني في سريره.... و الدكتور وصفلي الدوا و غذا... حمدت ربنا ان كله حيبقي تمام و انشأ الله حاخف و كله يرجع زي الاول و احسن...
المستشفي كانت و العياذ بالله وسخة اوي ... عمرهم ما كنسوها ولا مؤخذة و دورة المياه و العياذ بالله ...
و الباش ممرضة مرة تجيب الدوا و الغذا و عشرة لا و نجري كلنا وراها لجل الدوا و في الاخر فهمت انها الله يسامحها بتاخد الدوا تبيعه للعيانين او برة المستشفي... لولا ان كان في ممرضة ربنا يكرمها بيقولولها ابلة مني كانت بتدينا الدوا و بتعامل ربنا ... والله كانت الوحيدة ربنا يكرمها.... و في دكتور تاني كنا بنشوفه مرة كل كام اسبوع و كان ربنا يكرمه بيكشف علينا برضك...
لما تعبت مرة اوي وملاقيتش حد يغيتني و قدرت اوصل للباشا مدير المستشفي و عم سيد اللي علي باب الاوضة عمل نفسه مش شايفني و دخلت المكتب و حكيتله ان التعب زاد اوي و ان الدوا نقص اوي و الغذا راح خالص و مانسيتش اقوله ان دورة المياة وسخة اوي.... و الصراحة الراجل سمع و نادي الدكتور الله يكرمه اللي شافني كام مرة و رطنوا مع بعض بس مش بالعربي و كلام كتير و في نهاية الكلام الباشا المدير قاللي ارجع سريرك دلوقت واحنا حنحل الموضوع.... قلتله يا باشا ده السرير شرك مع عيان تاني... قاللي ارجع دلوقت و احنا حنحل الموضوع ده كمان.... رجعت.
يومها بالليل عطوني الدوا و نمت.... صحيت لقيت نفسي بردان و نايم علي الرصيف قصاد المستشفي...
ازاي وامتي ده حصل و ليه ده انا لسة تعبان ...طب و الدوا!!؟؟ لما قدرت اقف علي رجلي وقفت عالبوابة و الحاج حسين عالباب قالي امشي انت ممنوع تدخل المستشفي و الدكتور المدير بيقولك علاجك مش عندنا و روح مستشفي تاني...
مستشفي تاني فين؟ و ازاي اروح و انا حافي و عريان و مفلس.....!؟؟؟
من هدة الحيل قعدت عالرصيف ... حد ابن حلال عطاني قماشة قديمة فرشتها تحتية.... و عدا يوم و مفيش لقمة و لا دوا مفيش غير شربة مياه من كوز جابهولي واحد بيمسح جزم فارش عالناصية... ربنا يكرمه شاب جدع... و عشان كدة ربنا كرمه بيمسح الجزمة بجنيه...  في ناس عطتني علبة عصير و ستات بتبعت عيالها يعطوني ربع جنيه و ساعات لقمة عيش... و كل ماسأل عم حسين عالبوابة يقوللي مالكش دخول غور بقي...
مش حاحكي كنت باصّرف فين ولا مؤاخذة ... ماهو مفيش دورة مياه في حتة و من هدة الحيل معدتش باتحرك... و ربنا ما كنت باشحت ولا بطلب حاجة من حد و لا عايز حاجة من حد.... ربك هو اللي بيعطي و هو اللي بيبتللي و هو اللي بيشفي و بيرزق.
 كفاية كدة لحسن تعبت و نفسي راح.... و مش عارف بقالي كام يوم عالرصيف...  و خلاص مش فارئة... بس لو ممكن طلب صغير اوي، لو ممكن وحياة سيدنا النبي لو حيتكتبللي اتغسل و اتكفن لزوم الدفنة مع الغلابة فلا مؤاخذة لو ممكن يعني ان الكفن يكون قماشه تقيل شوية و تلفوه لفتين تلاتة علي قد ما تقدروا ربنا يكرمكم... اصل البرد كان شديد... شديد أوي.

قصة خيالية.... من الواقع.

توقيع:
علي حسني

السبت، ديسمبر 07، 2013

كنت حأسأله....

شوية هلوسة... لو اقدر اقابل بعض الناس اللي ماتت حاسألهم ايه؟

سيدنا محمد: و كنت حاسأله ليه المسلمين وحشين اوي كدة بالرغم ان الاسلام دين جميل فعلا؟
عبد الناصر: و كنت حأسأله ليه ساب الناس تتعذب في عهده و هل ده كان تمن مناسب للحكم؟
ليوناردو دافنشي: و كنت حأسأله هو ايه بالظبط، رسام ولا مخترع ولا مفكر و لا ايه بالظبط؟
خوفو: و كنت حأسأله هو بني الهرم ليه؟
هتلر: و كنت حأسأله ليه يا عم الحاج؟
شكسبير: و كنت حأسأله القصص دي حقيقية و لا خيال المؤلف؟ عايز اسمعها منه...
خال أبويا حمدالله بك سلطان: مش حاسأله حاجة كنت بس حاسمعه لأنه بينه كان دماغ عالية اوي.
احمد فؤاد نجم: و كنت حأسأله ندمان علي اي حاجة؟
جلال عامر: و كنت حأسأله .... هي مصر فعلا رايحة علي فين؟
صلاح چاهين: و كنت حأسأله هل الابداع ده كله بسبب الاكتئاب؟ ام بسبب حساسية المبدع حصل الاكتئاب؟
د. مصطفي محمود: و كنت حأسأله ازاي اتأكدت انك فعلا امنت و ان الرحلة كانت في الاتجاه الصحيح و مش بالعكس؟
(لو مفهمتوش السؤال مش مهم، الدكتور كان حيفهمه)
طه حسين: و كنت حأسأله غضبت من ربنا علشان فقدانك لبصرك؟
صلاح الدين الايوبي: و كنت حأسأله لو كان عايش في زماننا ده كان عمل ايه؟
الام تيريزا: و كنت حأسألها البؤس اللي شفتيه في الدنيا سببه الرب ولا الانسان؟
ابويا: و كنت حأسأله يا تري انت راضي عني؟

انا عارف انني مش حاقابل حد و لا حاسأل حد و لا عمري حاعرف الاجابات بالرغم ان قايمة الاسامي و الاسئلة اطول من كدة بكتيييير.... انما...

دول بقي ناس موجودة و لسة ممكن أسالهم:
عبد الرحمن الابنودي: و كنت حأسأله ايه احلي حاجة كتبتها و أعزها لنفسك؟
خيري رمضان و مصطفي بكري و عكاشة في قعدة واحدة : و كنت حأسألهم انتم عايشين كدة ازاي؟
چورچ بوش الابن: و كنت حأسأله الناس اللي ماتت دي مش بتمر عليك في احلامك تقلبها كوابيس؟
نوارة نجم: و كنت حأسألها بتحبي انهي مصر؟ مصر بتاعة ابوكي و بتاعتنا و لا مصر بتاعة ولاد الوسخة و ليه؟
علاء عبد الفتاح: اقرأ سؤال نوارة و جاوب...
احمد دومة: و كنت حأسأله ليه مطلعتش اخوان؟ 
مني سيف: : و كنت حأسألها.... ليه كل ده؟
مبارك: و كنت حأسأله وفاة حفيدك لم تؤثر فيكم؟ و تخليكم تحسوا بالناس اللي بتموت يوميا؟ ازاي؟
عم محمد (ابو الثوار): و كنت حأسأله شايف ايه النهاية؟
نجيب ساويريس: و كنت حأسأله هل خطر علي باله يوم يوزع كل فلوسه علي الفقراء؟
د.مجدي يعقوب: و كنت حأسأله ازاي عارف تعيش في مصر بعد السنين دي كلها في الغرب؟ هل عزلت نفسك عن المجتمع علشان تقدر تبقي في مصر؟
بتوع تمرد و ٦ ابريل: و كنت حأسألهم انتم فعلا امنجية و تبع المخابرات؟
الشيخ علي الجفري: و كنت حأسأله ازاي ارضي ربي؟ و ليه الموضوع صعب اوي كدة؟

كفاية كدة...

توقيع:
علي حسني