الجمعة، سبتمبر 20، 2013

بحب اتنين سوا... ليلي مراد قالت كدة...

انا برضه بحب اتنين سوا...
مشكلة، صح؟
'القديمة' هي الماضي بتاعي كله و  بعض الحاضر و ممكن المستقبل كمان...
'الجديدة' بعض الحاضر و ممكن المستقبل كمان....
اكيد بتقولوا ايه الهبل و اللخبطة دي.... انا كمان بقول كدة....
حاحاول اشرح و افهمكم و يمكن افهم انا كمان....
القديمة، هي الاصل، هي الجمال الطبيعي و الروح الحلوة....
الجديدة، هي الراحة، هي الاستمتاع و الحياة اللي اتمنيتها....
القديمة، ماخترتهاش ... هي قدر و عيشته...
الجديدة، اخترتها... وبقت قدري...
القديمة، بحبها بجنون...
الجديد، وقعت في غرامها...
القديمة، قدمتلي كتير...
و الجديدة، اخدت منها كتير...
القديمة، في حاجات حلوة كتير بس حرماني منها المشاكل اللي من ساسها لراسها...
الجديدة، في حاجات حلوة كتير و بتشركني معاها من غير مشاكل و لا وجع دماغ...

فهمتم؟ اي حاجة؟ خالص!!؟
شكله ولا انا فاهم برضه...

نحاول تاني....
واحدة شغلاني بيها و بمشاكلها و انا مش معترض لانني بحبها...
واحدة بتقوللي خليك انت كويس اكون انا كويسة و الحياة تمشي...

فهمتم؟ برضه ولا الهوا!؟
بصوا بقي...
اللي فتح الموضوع لما اتسألت، لو وقفوا ضد بعض تاخد صف مين؟ 
ساعتها ابتديت افكر.... و زي ما قلت زمان موضوع التفكير ده قلما ان يحدث...
المهم اقعدت افكر... 
لو لعبوا ماتش كورة ضد بعض، حاشجع مين؟ اه كورة.. عادي يعني.... 
طيب، لو حاربوا بعض، حاحارب مع مين؟

مصر و لا كندا؟

اه مصر و لا كندا.... انتم افتكرتم بتكلم عن ايه يعني؟؟؟؟
والله العظيم يا جدع...!!! الناس دي غريبة...!!!

مصر في دمي و عروقي و كندا بقت حياتي... 
هو ده بقي جزء من تمن الغربة اللي بتسمعوا عنه...

تبص ورا للماضي ولا تبص قدام للمستقبل؟ 
انا بقي نفسي ابص ورا للماضي و الاقيني شايف مستقبلي...

فهمتم؟
طبعا لأ....
انا نفسي مش فاهم... ماشيها بقي.... ما هي هلوسة في هلوسة في هلوسة...

توقيع:
علي حسني