الجمعة، أبريل 19، 2013

ناس بتقول بداية النهاية و انا بقول نهاية البداية...

اولا..... متخلونيش احس انني مجنون او عبيط ولا مبرشم و لا فعلا مهلوس و مش دريان باللي بيحصل في مصر لمجرد انني بعيد و لا ايديا في المياه الباردة و مش في النار و مش حاسس بحالة الناس في مصر.... لأن ده اللي بسمعه كل ما اقول لحد انني متفائل و شايف ان مصر حتتصلح و الثورة حتنجح و و مصرنا سوف تصبح دولة نظيفة من الفساد و الاخوان و ده كله حيتحقق اول ما نبتدي نحارب الجهل و نهتم بالتعليم ثم التعليم ثم التعليم... فخلونا نتفق علي حاجة.... انا مش المختل الوحيد في الدنيا و المتفائل الوحيد باكتمال و نجاح الثورة بتاعتنا.... ماشي ؟ مش مختل .... يعني يمكن مهلوس بس مش بهلوس في الموضوع ده ... اتفقنا؟.... معلش ... اصل الموضوع ده واجعني حبتين...

نرجع لعنوان البلوج 'المدونة' : ناس بتقول بداية النهاية و انا بقول نهاية البداية...

تيجي ازاي؟ اقولك، اسمع بقي ياسيدي و يا ستي.... هل ممكن نتفق ان برغم ظاهر الشر في حكم الاخوان الا ان له جانب خير؟ الناس 'و هنا انا بقول ناس تجاوزا لانني مؤدب' الناس دول عاشوا و ماتوا و هما بيغنوا اغنية واحدة لمدة ٨٠ سنة... انا مظلوم لالاااا انا مسجون لالاااا انا لو حكمت حاصلح حال الناس لالالااااا انا حاطبق الدين الحق.... لالاللللااااااااااااااا 
دي الاغنية اللي هرونا بيها و صدعونا بيها و فعلا صدقناها و امننا بيها و خصوصا انه كل الغنا ده كان مغلف و محاط باحاديث و ايات و قصص كلها او معظمها ماخوذة من سياقها و مفرغة من محتواها و تم وضعها في سياق و ملأها بمحتوي مناسب للهدف و جعلها حجة و برهان....من الاخر كدة لعبوا في دماغنا و مشاعرنا بقصص الاضطهاد و تغلغلوا في قلوب الناس بكلام الله و رسوله اللي استخدموه كالفاظ و الفاظ فقط و غيروا معناه لخدمة اهدافهم.... 
دلوقت بقي بقينا في الجد....
مسكوا الحكم يا سيادنا و بقالهم حوالي السنة و اتحقق حلمهم.... و بعدين؟ في زمن قياسي و بصراحة يحسبلهم التفاني و الاجتهاد الغير مقارن...... في فضح  نفسهم و اظهار كذبهم و تدليسهم لمدة ٨٠ سنة و نيتهم السودة للكام السنة اللي جايين و لسؤ حظهم فأاسوا نفسهم و فشلهم الذريع في اي حاجة حاولوا يعملوها.... 
بس استنوااااا استنوا....
قبل ما اكمل الحدوتة احب نفتكر حاجة مهمة جدا قبل ما نغوص في سواد المرحلة الحالية...  يا ريت نفتكر ولا ننسي سوااااد المرحلة اللي كانت قبل الاخوان.... زمن المخلوع... ليه؟ اكيد مش علشان احسن صورة الاخوان لا سمح الله.... ابسليوتلي نوت... و لكن علشان عقلنا ما يهفناش و نفتكر ان اللي فات كان احسن من اللي احنا فيه..... ابسليوتلي نووووت... حاذكر معالم زمن المخلوع عالسريع كدة:
- رخص قيمة المصري جوة و برة
- مرض
- فقر
- جهل
- اقتصاد تابع و مهلهل
- ديون
- فساد سياسي، اجتماعي، اقتصادي
- وشوية حاجات تانية ... حطها كلها فوق بعض تطلع الصورة سودا و مهببة...
- اااه حتقولوا كان فيه أمن .... يا سلاااام ...امن ليه هو و حاشيته و امن مستعفي علينا ... داخلية بتغتصب الناس و تقتلهم... طيب بلاش نقول أمن بس... مش حازود عن كدة و روحوا اقروا اخبار الحوادث في جرايد زمن المخلوع...
ده اللي خلعناه و اتعشمنا و حلمنا اننا نخلص منه و نلون الصورة بشوية بياض.... و لكن.... اااااااه من لكن دي...
و لكن من ورث المخلوع حاجة مهمة جدا....  تركة 'الجهل' و نجاحه التام و المطلق في زراعة ثقافة الجهل حتي اصبحنا من اجهل  شعوب العالم عندنا دكاترة و مهندسين و مدرسين و غيرهم و كلنا متعلمين بشهادات و كلنا برضه جهلة بشهادات ... معايا شهادة جامعية و ربما دكتوراه و برضه جاهل يعني مخي مقفل... شاطر اكاديميا و خايب و فاضي ثقافيا ... جهلنا صورلنا ان الصح هو ان غيرنا يفكرلنا لأنه عارف اكتر و ان اللي يخالفني في الرأي ده عدوي لأن متعودتش و معرفش اتناقش لأنني كتابع لا يجوز ان اناقش المتبوع و كمتبوع لا اقبل الاختلاف معايا غير لو كنت عدوي بقي....
اللي احنا فيه دلوقت هو النتيجة الطبيعية لجهلنا ... حكم الاخوان لينا ده نتاج جهلنا و فشل الاخوان الذريع ده برضه نتاج جهلهم و الفضل يعود ثقافة الجهل ... حايتعلموا و حنتعلم الصح من مين بذمتكم!!؟؟؟ 
الجهل محاصرنا في كل حتة و ركن...
المخلوع تعمد زرع ثقافة الجهل لضمان السيطرة.... دلوقت الاخوان مشيوا علي نفس الخط و بيطبقوا نفس السياسة الزراعية لثقافة الجهل و زودوا عليها تجهيلنا بديننا فدلوقت بعرفونا و يعلمونا دين اسلام جديد و معدل و حلو من وجهة نظرهم و لخدمة اهدافهم ... هما ما غيروش القرآن و لكن فسروه للجهلة مننا بما يناسب اغراضهم هم....
دلوقت سواد ايام المخلوع هو سواد ايام الاخوان لا فرق... الفرق ان الاخوان كشفوا نفسهم بسرعة عبقرية و الناس عرفت ان استمرار الحال من المحال ... مبارك - مرسي=  واحد... بس بدقن.

نهاية حكم الاخوان القريبة  هو بداية الثورة الحقيقية.... خلصنا من المخلوع الفاسد سياسيا و اقتصاديا و دلوقت اتاكدنا من ضرورة تخلصنا من الاخوان الفاسدين سياسا و دينيا... الفنان محمد نوح قال حاجة علقت في دماغي و لزقت:
اللي حصل ده بروفة ثورة.... الثورة لسة ما ابتدتش.... لان الثورة لما بتحصل الثورة بتحكم و ده محصلش لحد دلوقت....الله يرحمه.
و ده معناه ان البروفة حصلت و عرفنا غلطاتنا ايه و حنتفادها في الثورة الحقيقية اللي حتحصل. 

توقيع
علي حسني