الاثنين، ديسمبر 26، 2011

رسالة الي لميس جابر عن مقال الاستربتيز.

 هذه الرسالة موجهة الي الاخ لميس جابر ردا علي مقالته التي خلت من اي علامة علي الانسانية و قد زاد استغرابي عندما علمت انه طبيب امراض نساء وولادة و يعد من الكتاب المقرؤ لهم. لقد تناول مقال الاخ لميس (واعذروني انني لا اخاطبه بلقبه كدكتور حيث انه اسقطه عن نفسه بمجرد ان طالب باسقاط حقوق الانسان) ولن اعلق علي المقال بأكمله و لكن علي نقطة واحدة و هي صميم المقال... الواقع المؤلم انه انسان (تجاوزا) مثله و في ثقافته يتناول موضوع ضرب و سحل و تعرية الفتاة المصرية "ست البنات" بمنطق ذكوري بحت ... هذا المنطق الذي يلوم الضحية و خاصة لو كانت امرأة علي اخطاء الجاني ... و الامثلة كثيرة في افغانستان تغتصب الفتاة و تسجن و يطلق سراح الجاني و في السعودية تغتصب الفتاة و تطالب بالقصاص فتجلد و في مصر ينتهك عرض البنات و يتم الكشف علي عذريتهم علي الملأ للتأكد من طهارتهم و يضربوا و يسحلوا و يتعروا لانهم نزلوا مظاهرات تطالب بحقوقهم الانسانية و التي يطالب هو باسقاطها.... ده علي فرضية انها موجودة اساسا علشان تسقط... و تبعا للمقالة فالفتاة "ست البنات" كانت تقوم بعرض استربتيز و سهلت امكانية تعريها بارتدائها ملابس بكباسين و انها تستاهل ما تعرضت له من قبل من سنلقبهم تجاوزا "برجال" العسكر ..... و الامثلة كثيرة و كلها تنبع من نفس المنطق الذكوري البحت حتي و لو حاول البعض زورا الصاق هذه التصرفات بالدين و اصباغ صبغة شرعية تشريعية لفرضه علي المجتمع بلا نقاش. و للاسف ان العديد من المشايخ المسموعين و المقرؤ لهم ينتهجوا نفس المنهج و الذي يصل الي القاء اللوم علي المرأة كالجانية الاولي حتي في واقعة الزنا...
الخلاصة و حتي لا اطيل عليكم و تأكدي من ان الاخ لميس جابر لم يبني اراؤه علي اسس دينية كما نعرفها نحن عموم المسلمين او المسيحين او اليهود والا ما كان اتهم فتاة لا يعرفها بالباطل و طالب باسقاط حقوق الانسان في التعامل مع الانسان.
النقطة التي تؤكد موقف التحيز الذكوري هو تعارضه مع موقف كل نساء مصر بل و في انحاء العالم تعاطفا مع "ست البنات" ..... القلة التي لم تري جريمة فيما حدث تضم اعضاء المجلس العسكري الملقبين تجاوزا "برجال" العسكر.... واذا كان الاخ لميس لا يري جريمة فيما حدث و لا يري غضاضة في لوم و ايلام المجني عليه و التماس الاعذار للجاني فيجب الا نستغرب موقف الجاني نفسه حين يلوم الظروف.

و علي فكرة بيقولولي  لميس جابر واحدة ست بس عقلي رافض تصديق ان فيه ست ممكن تكتب هذا المقال الخالي من الانسانية عن اي انسان و خاصة عن ست تانية.

توقيع:
علي حسني

السبت، ديسمبر 24، 2011

انا اللي ضربتها .... اه انا... ليه؟؟؟

انا المجند ... ... من الوحدة رقم .... سلاح ..... في الجيش المصري.
انا اتولدت في دسوق ولي خمس اخوات شباب و اخت واحدة و انا كبيرهم ....ابويا عامل باليومية في بلدنا وانا بقالي اقل من سنة في الخدمة... و خدمتي كانت دايما برة البلد ... مش حاقول فين لأن دي اسرار عسكرية.... و لما جابونا هنا علشان اللي عاملين ثورة علي الجيش و الحكومة و بيخربوا البلد، التعليمات كانت واضحة ومحددة .... اول ما تشوفوا المخربين تجروا وراهم و تضربوهم لحد متعدموهم العافية.... و البت اللي اتعرت دي اه انا اللي ضربتها و هاضربها تاني و تالت هي و كل الخونة اللي معاها ... انا عسكري مصري في الجيش المصري و واجبي اني احمي مصر...
سيادة العقيد اللي عمره ما كلمنا جه و اتكلم و عطانا تعليمات اننا نواجه الخونة دول و هو لما عطانا التعليمات الصبحية قبل ما نخرج من الثكنة قال ان الخونة دول خطر علي امن البلد وان القيادة عندها معلومات اكيدة انهم مدفوعلهم من برة مصر فلوس كتير قوي بيقول بالملايين .... يعني فلوس كتير قوي علشان يبيعوا بلدهم.... سيادة العقيد قالنا كمان ان مصر و المشير بيطالبونا اننا نقاومهم و نمنعهم بأي طريقة و نكسر عظمهم و الا البلد حتقع في ايدين الامريكان و اليهود... ولو ماعملناش كدة نبقي احنا كمان خونة و لازم نتعاقب و نتحاكم عسكريا.... سيادة العقيد قال كمان ان العيال اللي بيقفوا في التحرير نصهم او اكتر كمان مش بيحبوا مصر و ولا واحد فيهم خدم في جيش مصر علشان بيكرهوا البلد و علشان كده عاوزين يمشوا الجيش من البلد و يبيعوها للاجانب.... و العقيد قال كمان ان الريس مبارك عيان و مريض انما المشير طنطاوي ماسك البلد محله و مش حيسيبها للعيال دي يخربوها و اننا لازم نساند المشير لانه ريسنا دلوقت...
اه و انا اتاكدت انهم خونة و اعداء للبلد اول ما شفت السادة القادة بدأ من سيادة العقيد ووراه سيادة المقدم و معاه سيادة الرائد بتوع الوحدة عندنا و هما بيضربوا بالسلاح و الذخيرة الحية علي الخونة دول و ضرب النار ده وقع كام واحد منهم و خلاهم يتلموا و يرجعوا... انا جريت وراهم بالخرزانة و لسوعتهم بيها و هات يا شلاليط و البيادة عملت شغل ١٠٠/١٠٠ و فين يوجعك يا مؤمن.... العيال الكفرة دي كانت بتجري زي الفراخ... و النسوان كانت ... هو الصراحة انا استغربت ان البت دي محجبة و ماشية مع العيال الخونة الكفرة دول... بس دي اكيد حركة و ملعوب ... انما علي مين ... كلام سيادة العقيد اكيد صح... القيادة مستحيل تكون غلطانة او بيكدبوا.... يكدبوا ليه؟ دول بيخدموا في الجيش... العيال دول فعلا مخربين و خونة ... العقيد اكيد كلامه حقيقي... يعني اصدق شوية خونة و مصدقش القيادة... العقيد اكيد كلامه صدق.... صح؟

توقيع:
علي حسني

السبت، ديسمبر 17، 2011

لا تعليق ...غير إن عسكر الصهاينة مش أسوأ من عسكر مصر..



عارعلى كل من يلبس الزي العسكري .... لا مجال للفخر عندما يقوم العسكر بضرب أهلهم بالاحذية على الرؤوس .... عار على كل مصري وعار على كل عسكري وعار على البشرية... إن في بشر بهذه الحيوانية والوحشية..... عار....عار....عار...

توقيع:
علي حسني

نرجع لايام زمان... ايام المنشورات





الثورة قامت علي اكتاف الشباب و دلوقت علي جثثهم و اتنظمت عن طريق فيسبوك و تويتر... الثورة انبعثت في القاهرة و الاسكندرية و السويس و المدن "الكبري" بمحافظات عديدة .... حلو و جميل جدا.... دلوقت بقي راحت السكرة و جاءت الفكرة... و لأننا ساعات بننسي ان ٤٠٪ من الشعب تحت خط الفقر و نفس النسبة و اكتر بكتير اميين و نقدر نقول لا يعرفوا الانترنت و لو عرفوها فلا يستخدموا لا تويتر ولا فيسبوك ولا يشاهدوا اي تليفزيون غير التليفزيون و الاعلام الحكومي .... و بلاش و النبي نتكلم عن الاعلام المصري و كذبه و تضليله.... المهم...
دلوقت الثورة شكلها محصورة في اهل النت.... (لان النت هي وسيلة الاعلام الوحيدة المتاحة للثورة) و معاهم بعض من كانوا في الميدان و بعض من كانوا في المدن الاخري و هم من الاخر برضه اهل النت...
لازم كمان نقر و نعترف ان المجلس و النظام نجحوا في تفتييت و تقسيم الناس عن طريق:
- استقطاب البعض بوعود سياسية (منهم بعض الشباب)
- الانتخابات و قناعة البعض انها طريق الحرية و برضه طمع البعض في مكاسب انتخابية/سياسية
- التغييرات الوزارية بوجوه قد يتعشم البعض منها الخير بعد تلميعها في الاعلام او مسح تاريخها القديم
- و .... و .....
الاسئلة هي:
اولا- ليه و ثانيا- ازاي نجح المجلس في مخططه....؟؟؟؟؟
- ليه؟ لانها مسألة مصير و حياة او موت للمجلس و بواقي النظام .. في الحقيقة ... للنظام القديم كله لانه مازال يحكم.... و المجلس عارف ان مصيرهم حيكون زي مصير كل فاسد و اللاحقون حيحصلوا السابقون ... فقط لو الشعب اتحد علي كلمة واحدة و هدف واحد زي ما حصل في ٢٥ يناير و ١١ فبراير...
- ازاي؟ لانه المجلس هو اللي مسيطر علي قنوات الاعلام الوحيدة الواصلة لعموم الناس في كافة اقطار مصر ... و الثورة لا تملك هذه الرفاهية... و علشان كده نجح المجلس في الاستفراد بعقول الناس و مشاعرهم... و بكدة قسموا الناس في الشارع و لحد دلوقت هما ناجحين في مخططهم لانهم المسيطرين علي الاعلام التقليدي (التليفزيون، الراديو، الجرائد) و ذلك رغم فشلهم في السيطرة علي الاعلام علي النت (المدونات و التويتر و الفيسبوك و اليوتيوب) و لكن للاسف نسبة المشاهدين للاعلام التقليدي اكبر و بكثير جدا جدا من مشاهدي او مستخدمي النت... بصوا بقي من الاخر يعني ... في مشكلة.....
المشكلة في التواصل مع باقي الشعب ... صح؟ الحل للوصول للمواطن في الشارع هو العودة بالزمن و استخدام ما يتفق مع وضع الناس (معظم الشعب يعيش بزمن ما قبل الانترنت فلازم الثورة تستخدم ادوات هذا الزمن) مثلا طباعة المنشورات ... مش لازم يعني مطبعة البالوظة (مطبعة قديييييمة) لأن تصوير المستندات دلوقت مفيش اسهل منه و لازم تبقي المنشورات بالصور مش كلام و بس و الصورة بمليون كلمة ... بعض الناس حتقول ايه ده قديم قوي و يمكن فعلا .... بس حنخسر ايه لما نجرب و نحاول وانا واثق من النجاح ... و احب اقولكم ان الاعمال و الشركات التجارية في العالم كله لما تحب تكسب و تكتسح سوق بتغرقه بالاعلانات المطبوعة (الفلايرز) و بتنجح لانها طريقة الوصول لمن لا يشاهد الاعلام العادي او الانترنت... خلينا نطبع منشورات و بالصور علشان نكشف جرائم العسكر و نوحد الناس ... و لما نتواصل مع الشعب حنجمع الناس تاني علي اهداف الثورة.

اللي عايز يقرا قصة قديمة عن المنشورات (ايام مالشعب هو اللي فعلا ساند و حمي انقلاب ١٩٥٢): http://www.almatareed.org/vb/showthread.php?t=69673

توقيع:
علي حسني

الاثنين، ديسمبر 05، 2011

ديمو الكراسي حراااااااااااام!!؟؟؟ لأ ... دي كفر

الباشمهندز الشحات افتي ان الديموقراطية مش بس حرام لا.... دي بالاسلوب الامريكي او البريطاني او حتي التونسي قبل الثورة تصبح كفرا... و ان الديمقراطية بالمفهوم المصري تصبح حلالا بلالا.... طيب انا حتسائل عن حاجات كتير و عن وضعها الحلالي طبقا للمفهوم الواعي بتاع الباشمهندز...
هل الابحاث العلمية الغير مصرية، حلال و لا حرام؟
مثال: علاج لمرض ما مثلا...
هل الاختراعات الغير مصرية، حلال و لا حرام؟
مثال: الطيارة او السيارة او جهاز اشعة طبي
هل اللغات الغير (عربية) مصرية، حلال و لا حرام؟
مثال: الانجليزية او ال C++
هل الملابس الغير مصرية، حلال و لا حرام؟
مثال: البدلة و الشراب
هل النظم الانتخابية غير المصرية، حلال و لا حرام؟
مثال: انتخابات البرلمان
الاجابة حتكون ان الاسئلة دي تافهة و سفسطة و كلام مرسل لا قيمة له... و في الحقيقة... هي فعلا اسئلة تافهة بل و اتفه من التفاهة و ضحلة المستوي و سطحية... بس بصراحة لما سمعت كلام الباشمهندز ده اللي خطر علي بالي علشان لازم اكون علي مستوي القعدة....
لأن الخلاصة عن الديمقراطية او كما قال الاخ القذافي : ديمو الكراسي...
و من بعده الاخ الشحات: انها كفر...
يبقي الكلام ذو القيمة لا مجال له في هذه القعدة...

توقيع:
علي حسني

السبت، ديسمبر 03، 2011

العلبة فيها ايه؟ فيها فيل... فيييها اييه؟ فييل.


انا مسلم ... مؤمن.... اشهد ان لا اله الا الله وحده لا شريك له وسيدنا محمد عبده و رسوله و حاجج بيت الله و باصلي و بصوم و بزكي و  ..... اه....  ولا أدخن ولا اشرب الخمر ولا أحشش ولا أكل الخنزير ومتزوج وبصون بيتي وبراعي أهلي وبأصل الرحم ..... 
و بالرغم من كدة حاسس اني كافر واستحق القتل أو الرجم واني خارج عن الملة واني لازم يقام علي الحد (أي حد وخلاص) ....
جالي الاحساس دة بعد ما شفت كام فيديو على النت لبعض الشيوخ.... إللي بيلعبوا سياسة وبيشغلوا الدين لخدمة ال......
المفروض اننا أبناء ملة وحدة والمفروض اننا كلنا مسلمين و كنت فاكر اننا موحدين و مؤمنين إنه في إله واحد وأن سيدنا محمد أخر الرسل.... لكن....  أول ما أسمع بعض 'بعض' الشيوخ يجيلي الاحساس انهم نصبوا أنفسهم الهة (إستغفر الله) وكمان إبتدو يطلقوا الاحكام بالكفر والخروج عن الملة على الناس (على العموم وعلى الخصوص) بناء على انهم يعني مطلعين على مافي القلوب والنية و كل ده بدون أي دليل انهم الهة (إستغفر الله)  وبدون دليل أيضاً على كفر الناس... و بعض 'بعض' الشيوخ نصبوا أنفسهم رسل (بعد سيدنا محمد) ومريديهم اصبحوا ينزهوهم عن أي خطأ ويكادوا يقدسوا كلامهم أكثر من القران ..... وبما اني لا اتبع أي من الشيوخ فده يضعني في قائمة الخوارج (أو حاجة زي كدة).... والمصيبة الكبرى لو انتقدت حد منهم... يعني مش كفاية اني مش باتبعهم لا ده أنا كمان بنتقد.... يبقى أنا أكيد كافر ...كافر لأني مؤمن بالله وحده لا شريك له.... ومؤمن إن سيدنا محمد أخر الرسل و باتبع تعاليم القران الكريم وسنة رسوله..... بس... وبس يعني بس... يعني أنا لا أؤمن باي من هولاء الشيوخ ولا أؤمن بأحاديث هولاء الشيوخ ولا أضع انسان (ايا كان) بيني وبين ربنا... لن أعود إلى الوراء في الزمن وأعيش النسخة الاسلامية من سيطرة الكنيسة في القرون الغابرة وصكوك الغفران وأقبل وسيط بيني وبين ربي... لن أقبل أن يكون اتصالي مع الله عن طريق الشيخ الفلاني والجماعة الفلانية ... ربنا خلقني لأعبده ... هو فقط.... وحده لا شريك له.... ليه لو شغلت مخي يبقى أذنبت .... لو تشغيلي لمخي وداني النار يبقى ده ذنبي وأخدت جزائي.... انما لو مشغلتش مخي ورحت النار هتسئل ليه مشغلتش مخي؟.... مش ربنا قال لنا في القران : وتبينوا.... وتعقلوا.... و..... كله دعوة لي لتشغيل مخي مش لتشغيل مخ حد تاني.... مخي أنا .... 
ليه بعض 'بعض' الشيوخ بيفكروني بمشهد  توفيق الدقن وعبد المنعم ابراهيم في فيلم طاقية الإخفاء : توفيق زنقه في الحيطة وماسكله علبة  فيها خاتم وبيقوله:  العلبة فيها ايه؟ فيها فيل... هه.... فيها ايه؟ فيل...... مش عارف ليه بيفكروني بالمشهد ده... مش عارف !!!! بس لو تخيلتوا توفيق الدقن 'بدقن' يمكن الصورة تقرب شوية....

توقيع: 
علي حسني
أخدتم بالكم من 'بعض' إلي حاطتها كذا مرة.... دي للدقة في المعلومة ....