السبت، نوفمبر 05، 2011

يلا نعمل دولة...


امشوا معايا شوية.... أنا واحد مهلوس أه...  بس مش خطر ..... يعني مش مشكلة... 
حد فكر إننا نعمل دولة جديدة... يلا نحسبها سوا... احنا شعب على قطعة أرض.... عاوزين نكون الدولة... هفكر بناء على نظرية 

(هرم ماسلو للاحتياجات الانسانيه (مش هـنتكلم على كل النقاط


ولتحقيق هذا الهدف وبناء الدولة هابتدي من اسفل الهرم وطلع لفوق.... وحاكلم  على أول مستويين في الهرم ومش كلهم كمان. ...
1- الحاجات الفسيولوجية
2- حاجات الامان
لو عايزين تعرفوا باقي النقاط والمستويات روحوا اقراوها أنتم بقى...
3- الحاجات الاجتماعية
4- الحاجة للتقدير
5- الحاجة لتحقيق الذات

نرجع لموضوعنا .... 
علشان نعمل الحاجات دي هنحتاج لفلوس علشان ندفع ونمول الكلام ده... حنجيبها من هنا:
- ضرائب من كافة أفراد الشعب.
- ريع مبيعات الموارد الزائدة عن حاجة الدولة.

1- الحاجات الفسيولوجية:
- الطعام - محتاجين مزارع - محتاجين مخابز.  (1000 جنيه لزوم أجرة الفلاح والخباز و قمح ودقيق وخميرة وكده يعني)
- الماء - محتاجين توصيل مصادر مياه نقية للناس.  (1000 جنيه علشان أجرة السباك المواسير والذي منه) 
- الجنس - محتاجين توفير مقومات الزواج.  (1000 جنيه علشان أجرة  المقاول نبني بيوت ...كبداية)
2- حاجات الامان:
- الأمن الصحي - محتاجين مقومات علاج صحي شامل.  (1000 جنيه علشان نعين دكاترة ونجيب ادوية)
- أمن الموارد - محتاجين جيش لحماية الحدود والموارد.  (1000 جنيه علشان نعين عساكر وظباط جيش)
- أمن الممتلكات - محتاجين أجهزة امنية.  (1000 جنيه علشان نعين عساكر وظباط ... بس شرطة المرة دي)

يعني محتاجين 6000 جنيه.... ماشي لمينا 6000 جنيه.... نعرف منين إن كل بند اتصرف عليه  ال 1000 جنيه المطلوبة ليه؟
يبقى لازم يبقى في ميزانية معلنة وكل واحد يقبض لازم يمضي اسمه.... سواء كان فلاح, خباز, سباك, مقاول, دكتور, ممرض أو عسكري أو حتى .... ظابط جيش أو شرطة... كله كله ...يعني حتى اللي هيتعين رئيس دولة ........ مفيش فرق كل واحد الشعب عينه في وظيفة يبقى لازم يمضي جنب مرتبه.... مادام هو موظف لدي الشعب.... مفيش حاجة اسمها ميزانية سرية.... أُمّال نعرف محتاجين ضرايب اد ايه منين ؟
يعني مصروفنا كام  و ايرادتنا هتكفي ولا لأ.... ولا نبتدي نشحت علشان بندفع مرتبات  للظباط وللريس...  جامدة وعالية منعرفشي هيه كام  بالضبط.... علشان ده سر .... واحنا شعب مايعرفشي يكتم السر...

الخلاصة ....ان الشعب هو الدولة.... و .... الدولة هي الشعب... اللي له احتياجات معينة.... قامت الدولة كونت  أجهزة وعينت ناس من الشعب لتقديم خدمات للشعب بهدف كفاية احتياجات الشعب.... يعني من الاخر كله لخدمة الشعب والشعب فقط...

اللي حصل في مصر من زمان.... ان الدولة كونت  أجهزة وعينت ناس من الشعب لتقديم الخدمات بهدف كفاية الاحتياجات .... يعني من الاخر كله للخدمة فقط... اه بس الخدمة هنا كانت لال مبارك وكام واحد هما شلة الفساد اللي معاهم ولكفاية إحتياجاتهم هما فقط لا غير.... وبس....

بس خلاص.... وعلى فكرة قبل مااقفل.... الموظفين اللي بتعيينهم الدولة لخدمة الشعب لو مش كفؤ ومش بيعملوا شغلهم كما يجب يبقى يتغيروا و مش مهم قوي يكونوا من الشعب..... في بعض الدول العربية الشقيقة ..... عساكر المرور من باكستان أو الهند.... وبعض طيارين دولة تانية عربية شقيقة برضه كانوا من باكستان .... اللي يقول : بس كده مافيش ولاء ووفاء للدولة... ممكن نقولهم: هو يعني اللي كانوا عندنا كان عندهم ولاء ولا وفاء ....ولا حتى سناء ؟؟؟

مش قلتلكم هلوسة.... ماتركزوش  .... سلام...

توقيع:
المهلوس