الاثنين، ديسمبر 13، 2010

شط أسكندرية يا شط ال...

الحمدلله ان مفيش مسئول كبير طلع و سمع الاسطوانة بتاعة كل مصيبة و هي:
العاصفة علي الاسكندريه و اللي غرقت الشوارع ووقعت البيوت و كسرت عواميد النور هي عاصفة إسرائيلية زيها زي سمك القرش بتاع شرم .... يا إخوانا مصر مستهدفة... الحكومة بتعمل كل ما في وسعها لراحة الشعب بس اسرائيل الله يجازيها بقي بتبوز شغل الحكومة الله يجازيها حندعي عليها و نمسح عليها السيدة ....
و يارب تغرق هي كمان ... ياااااررررب...

توقيع:
المهلوس

- Posted using BlogPress from my iPhone

الخميس، ديسمبر 09، 2010

يارب قرش يارب...

الحكومة المصرية قررت تعويض السواح الروس عن الأضرار التي إصابتهم نتيجة هجمات اسماك القرش عليهم.... بكام يا تري:
اقعدوا الاول و أمسكوا اعصابكم... مسكتم...... $٥٠،٠٠٠
ايوة خمسون الف دولار ...... دولار ينطح دولار
أيوة يا سيدي دولار أمريكاني...
يييي...
أيوة يا ستي الدولار اللي الواحد منه يجي ببتاع سته من الجنيه بتاعنا...
علي فكرة ده مش الخبر...
الخبر انه في حوالي ثمانين مليون مواطن مصري حاليا ألعيين بلابيس و بيعوموا في شرم الشيخ و كلهم بيدعوا : يارب خللي القرش يعضني... حتي لو عضة صغيرة بخمسة الاف بس وبالمصري كمان...

توقيع: المهلوس

- Posted using BlogPress from my iPhone


انتخابات هايتي الحره النزيهة

إليكم الخبر التالي:

اعلنت دولة هايتي رغبتها في دعوة خبراء "الانتخابات" المصريين من اجل ترتيب و اعداد (و توضيب) خطة الانتخابات (اصل حصل عندهم مشاكل و مظاهرات و تخريب و حرائق و الذي منه بعد ما حصل تزوير في الانتخابات و الفرز و الذي منه.... غريبة جدا فكرة تزوير الانتخابات دي!!!!). المهم ... لذلك قررت هايتي و بتأييد من المجتمع الدولي الاستعانه بالخبراء المصريين من اجل اعادة الانتخابات ولكن بمساعدة الخبرات المصرية ستكون انتخابات حره و نزيهة.

هاهاهاهاهاهاهاهاأأوووو
تعليق: المهلوس

- Posted using BlogPress from my iPhone

السبت، ديسمبر 04، 2010

الانتخابات الحرة النزيهة...

هاهاهاهاهاهاهاهاهاهاهاهاهاهاهاهاهاهاها
هاهاهاهاهاهاهاهاهاهاهاهاهاهاهاهاهاهاها هاهاهاهاهاهاهاهاهاهاهاهاهاهاهاهاهاهاها هاهاهاهاهاهاهاهاهاهاهاهاهاهاهاهاهاهاها

- Posted using BlogPress from my iPhone

الأحد، نوفمبر 14، 2010

أنشطة نووية وأل أيه سرية كمان...

بقي مصر فيها انشطه نوويه سريه....
تقرير عبيط بشكل ... هو مصر فيها انشطه أه .... لكن نوويه .... هأأو ... واسعه شويه... هو الغرب حيخلينا يبقي عندنا ذريه ولا نوويه... الا لو كانوا يقصدوا نوي البلح... يمكن ....
و الإحلي من كده لَأ و سرية كمان ...
بأه مصر فيها حاجه سرية... احنا نسينا محطة المطار السري ولا أيه؟

توقيع: المهلوس

- Posted using BlogPress from my iPhone


الاثنين، نوفمبر 08، 2010

رسالة إلى البرادعي

موجهة الي د/ البرادعي

نحن هنا و حولك لا يهمنا ان ترشح نفسك و لكن يهمنا ان تظل انت نفسك متفائلا و لا تيأس. اذا يأس القائد... انفرط العقد...نحن حولك حتي لو كنا بعيدين عن أرض الوطن...لا يجب ان نعطيهم الفرصة ليحبطوا من عزيمتك أو عزيمتنا...التغيير أمر حتمي مهما طال الزمن...لو دامت لغيرك ماكنتش وصلتلك...صح؟

توقيع: المهلوس

- Posted using BlogPress from my iPhone

الأربعاء، سبتمبر 29، 2010

الحرية لا تكيل بالبتنجان.... أو الكوسة....

اليكم الخبر التالي:
قررت الحكومة المصرية اعادة بيع أرض مشروع مدينتي إلى المستثمر (مجموعة شركات طلعت مصطفى) الذي قام بشراء الأرض مسبقاً و قام ببناء المشروع الشهير - مدينتي - مقابل مبلغ 10 مليار جنيه.

وكمان خبر:
في قرار مفاجئ حكمت المحكمة بالسجن 15 سنة على هشام طلعت مصطفى في القضية اياها...بدلاً من الاعدام.

وكمان خبر:
إرتفاع أسعار الخضراوات في السوق المحلي و خاصة الكوسة إلى مستويات غير مسبوقة. ربنا يستر علينا....

توقيع:
المهلوس


- Posted using BlogPress from my iPhone

السبت، أغسطس 21، 2010

لكم الله يا أهل مصر...

الشعب المصري كل يوم بيأكد انه مابيطمرشي فيه حاجه و مش عاجبه العجب و لا الصيام في رجب (أو رمضان)
المهم ... ايه يعنى:
انه مافيش كهرباء
أو انه مفيش دقيق
أو انه مفيش هواء نظيف
أو انه مفيش مياه نظيفه (او مفيش مياه خالص)
أو مفيش لحمة
أو مفيش فراخ (اه طبعا انفلونزا الطيور )
أو مفيش خضار يتاكل (نسيتوا مياه المجاري ولا ايه)
أو مفيش أمن و أمان
أو مفيش فلوس
أو مفيش حرية
أيه يعنى بقي...
عايزين الحكومه تعمل ايه يعنى... ما هو كل ده مش ذنبها...ده في كل الدنيا كده
بس أستنوا بقي و تعالولي هنا...
.... بقي كل المسلسلات الرمضانيه دي و برضه مش عاجبكم
...بس أحنا شعب مثال لنكران الجميل
رمضان كريم...

توقيع: المهلوس

الثلاثاء، يوليو 20، 2010

شعب ناكر للجميل....

الشعب المصري ده شعب شرير و وحش (وحش زي قبيح مش وحش زي متوحش - فقط للتوضيح) و ده طبعا نتاج طبيعي للرفاهيه العاليه جدا جدا. ما هو لما الواحد تجري الفلوس في ايده ويتمرمغ في العز يبتدي يفتري. تخيلوا الشعب المصري يطلع رقم ١١٥ من ١٥٥ اسعد شعوب الارض و طبعا مش عاجب حد.... أل أيه دي مشكله و أن الشعب تعبان و الكلام اللي انت عارفه بقي...كله كدب طبعا...خليك معايه شويه... النتيجه دي كانت بناء علي اجابات لمجموعة أسئلة الناس جاوبت عليها.صح؟ المشكله
بقي ان الناس لما جاوبت علي الاسئله كذبت و جاوبت غلط. أصل الشعب بتاعنا ده كداب و غشاش و ابن ...
طول النهار و الليل يتبلي علي الحكومه الغلبانه ... الشقيانه لراحته و هناه ....الشعب الناكر للجميل ده.
ليه كده يا ناس. دي الحكومه مهنياكم و مدلاعكم علي الآخر. بطلوا بقي نكران الجميل ده.
ولا عايزين تتفسحوا زي المرحوم خالد سعيد؟
أنا مهلوس أه.... بس مش عبيط....مش عاوز اروووح في الكازوزه يا عم....

توقيع: المهلوس
- Posted using BlogPress from my iPhone

السبت، يونيو 05، 2010

وكمان دولة متخلفة... هما كلهم متخلفين ولا ايه؟؟؟

أكشن ثالث مرة - و أخر مرة....
الخبر بيقول: رئيس أوروجواي كان رجل عصابات في الستينات و السبعينات و تاب عقبال كل الحراميه واللصوص
المهم،....ده مش موضوعنا.... الراجل ربنا تاب عليه و مرت السنين وبقي رئيس جمهوريه زي الفل لبلد تعتبر عالم ثالث برضه بس شوف التخلف الراجل العبيط ده بيحكم بلد تعتبر ظروفه زي مصر....صح؟ الي حد ما دوله نايمه (أسف ...دوله ناميه...أنا مش عارف يعني غلطت في البخاري ...ما هو لو كان الكلام بيفرق كان الحال بقي غير الحال) المهم.. بطلوا تقاطعوني و خلوني أخلص بقي...
الراجل يا سيدي سجل في إقرار الذمه انه لا يمتلك الا عربيه واحده أل أيه موديل ١٩٨٧ فولكس خنفسه قيمتها حوالي ٢٠٠٠ دولار (يعني ١٠،٠٠٠ جنيه)...و إيه كمان لا يمتلك أي أصول أخري و مرتبه حوالي ١٢،٠٠٠ دولار شهريا و كمان رفض ينتقل الي مقر الرئاسه وفضل عايش في بيته...يعني كل حاجه منشورة علي الملأ و مفيش اسرار.....دوله متخلفه زيها زي امريكا و اليابان و أكيد في بلاد تانيه كتير.....
هبل إحنا بقي؟؟؟؟
أنا راضي ذمتك...... بقي في عربيه موديل ١٩٨٧ بعشرة الاف جنيه بس!!!!!؟؟؟؟؟ حتي لو خنفسه ..... واسعه شويه.....صح؟

توقيع: المهلوس
- Posted using BlogPress from my iPhone

الأربعاء، يونيو 02، 2010

و اليابان كمان دولة متخلفة...

و كمان مرة..... دوله ثانيه تثبت تخلفها..... آه وحياة خالتي تخلف ..... ماشي .... لو أنا مجنون و بهلوس فكون انت يا سيدي العاقل الرصين (حلوه الرصين دي، صح؟) المهم.... نرجع للدوله المتخلفه نامبر تو - اليابان....
شوفت الراجل الاهبل رئيس الوزراء بتاعهم ال إيه العبيط استقال علشان شعبيته قلت هاهاهاهاهاهاهاه....... عالم هبله......حد يسيب العز و الفخفخه و السلطه (بالضمه - مش السلطه اللي هي خيار وطماطم و الذي منه - اه... اللي مرويه بالمجاري.... ايوه هي دي) المهم الناس دي كل يوم بتثبت لنا اننا فعلا دوله رايقه أسف راقيه (ال يعني بأه خلاص جت علي كلمه)
ماهو لو كان الكلام بيؤثر كنا خلصنا من زمان ........هاهاهاهاهاهاهاه راجل عبيط خالص هاهاهاهاهاهاهاه هاموت من الضحك هاهاهاهاهئ اهئ اهئ مش عارف الدموع دي من الضحك ولا من .........اهئ اهئ اهئ......أههههههههههههههههههههههههه

توقيع: المهلوس
- Posted using BlogPress from my iPhone

الخميس، مايو 27، 2010

امريكا دي دولة متخلفة....

قرأت خبر غريب جداً جداً .....
أل إيه يا محترم....قرأت ان الاخ أوباما ...أه أوباما بتاع ماما امريكا... ال إيه نشر علي الويب سايط (شكلها غلط خالص) علي الموقع الشبكي الخاص بالبيت الابيض (حلو كده) المهم بينشر تفاصيل دخله بالدولار و السنت و مش كده و بس لا ده كمان ناشرتفاصيل الأسهم و السندات التي يمتلكها وأسماء الشركات و كله كله ......كله .... تخيل.....
الحقيقه التصرف الطائش ده اثبت و اكد علي ان امريكا دي دوله متخلفه....
يعني إيه رئيس دوله ينشر تفاصيل شئونه الماليه كده علي الملأ....مش خائف من الحسد ... ده الحسد مذكور في القرآن
....

توقيع: المهلوس
- Posted using BlogPress from my iPhone

الأحد، أبريل 18، 2010

ماهو برضه موظف حكومة.... غلبان

الأخبار الكام يوم اللى فاتوا فيها نوع من الحقد و الغل بلا أى مبرر....
ايه يعنى ان واحد زير راح اتعالج فى بلاد بره (اى بلاد الفرنجه) و اتصرف عليه مليون جنيه و فى مقولة أخرى مليون أخضر ( دولار أمريكانى يعنى) مفيش فرق الجنيه ربنا يخليه شديد قوى ....
و شوف الغل البيّن أل ايه واحد زير تانى مراته اتعالجت برضه فى بلاد بره و اتصرف عليها كام مليون (يقال 2 مليون) و أل ايه أنه يمتلك أكبر مستشفى فى البلد و الواحد زير الأولانى يمتلك قصر بالشىءالفلانى (شاخدلى بالك من السجع)..... حقد غريب....أيه يعنى لما يكونوا مليونيرات ...هى يعنى الفلوس دى جت منين يعنى ؟؟؟
ما علينا...هو مش كان فى حد تانى سافر بره يتعالج من المراره و لا حاجه زى كده برضه :)

أه نسيت أقول ان الجرايد الحقودة بتقول ان الملايين دى كانت و ما زالت من أموال الدوله (الشعب يعنى) كلام فارغ و هو الشعب عمل ايه بأه علشان نقول أن الفلوس دى فلوس الشعب ...
غريب قوى الحقد ده و غير مبرر بالمره....
الأخبار الغريبة دى كتبت عن ناس غريبه جدا أوى خالص...مين عم عبده ده و غيره اللى بيموتوا يوميا علشان مفيش مكان فى المستشفيات الحكوميه (اللى هى أحسن المراكز الطبيه فى العالم) والغريب ان فى ناس بيسافروا يتعالجوا بره !!!!؟؟؟؟ غريبه ... صح؟؟
المهم مين عم عبده ده؟ ايه هى انجازاته اللى قدمها للوطن...ده فلاح غلبان...قدم ايه للوطن؟؟؟ ايه قيمته للبلد؟؟؟
علشان يتصرف عليه من اموال الدولة...اللى المرضى (السابق الكلام عنهم) عرقوا و تفحوا الكوته (اللى معرفش ايه هيه) و طلع عينهم و عين عائلتهم ايام و ليالى طويله من الشغل الشاق.....
ده يا راجل حاجه تفقع المراره.

توقيع:
المهلوس

الأحد، مارس 14، 2010

ال يعني حتفرق.....

امبارح سمعت كلام جامد طحن (كان من زمان نفسي استخدم التعبير ده في جملة مفيدة و أهو حصل - دلوقت ممكن أموت مرتاح) ما علينا، إيه هو الكلام ده؟
هو انه اثناء غياب كبير القعدة المفروض ان رابسو (عارفين مين طبعا) هو اللي يمشي المسائل، صح ؟ لأن ده هو المكتوب ( دستور ياسيادنا دستور). لا مش صح، هو المفروض لكن مش هو ده اللي حاصل (ده مش كلامي ده كلام الناس التانين ....الوحشين ؛)
المهم مين اللي ممشي المسائل دلوقت؟
بتقول عز...... يبقي انت اللي قتلت بابايا... ااااه يابابايا....(ده برضه مش كلامي ده كلام الناس التانين .... ال ايه؟ ايوه الوحشين)
أنا "و العياذ بالله من كلمة أنا" عندي رأي تاني خالص مالص، رأيي المتواضع انه لا رابسو ولا زيزو ولا ؟مال (كمل الحرف الناقص تكسب طفاشه)...... علي بلاطه ولا حد خالص.... اصله لو كان حد بيمشي المسائل ماكانش ده الحال (الناس حتقطع بعضها يا واد يا مرسي)... اصله المسائل مش ماشيه خالص مالص.

توقيع:
المهلوس
- Posted using BlogPress from my iPhone


الاثنين، مارس 08، 2010

دكتور الحمير....

اخر خبر... في مدينة الرحاب قبضوا علي دكتور بيطري بيعالج الناس في عيادة تخصصية. لا والراجل كان متخصص بجد ... بيعالج فيروس سي و سرطان بدوا هو عامله. وناس رايحه و ناس جايه...حاجه اخر حلاوة.... الخبر لم يذكر صاحبنا ده بقاله فترة قد إيه (حلوه قد إيه دي شكلها لغه عربيه فصحه) شغال طبيب بشري.
عرفتوا ليه بقي في ناس بتسافر المانيا علشان تتعالج .... هو العمر بعزقه.

توقيع:
المهلوس


- Posted using BlogPress from my iPhone

الأحد، فبراير 14، 2010

حلم ولا كابوس؟؟؟؟؟

النهارده مراتي صحيت مبسوطه شويه زياده فانا قلت في عقل بالي (مش فاهم يعني إيه عقل بالي)
لكن ما علينا .... أنا قلت في عقل بالي ده أكيد علشان فالنتين داي ( اي بالعربيه يوم فالنتين و في مقوله اخري عيد الحب) لكن برضه ما علينا ... اصل مش هوه ده موضوعنا. علشان اقصر عليكم طلع ان الموضوع لا فالنتين ولا يحزنون الموضوع و ما فيه ان المدام اتفرجت امبارح علي د. احمد زويل في التليفزيون طبعا انبهرت بيه زي ما كلنا مبهورين بالراجل ده.... ما علينا برضه مش هو ده سبب موضوع انشكاح المدام..... من الواضح انها كمان حلمت بيه و مش هو بس... ده هو و البرادعي و د. محمد بتاع مركز كلي المنصوره(اصله طلع في ال TV من كام يوم و قال كلام كبير قوي) و ال ايه انهم هما اللي ماسكين البلد و ال إيه كمان .. البلد اتصلح حالها.
يارب اجعل كلامنا خفيف عليهم و بعدين ده كلام هلاوس محدش يأخذ عليه...
علشان تعرفوا ان الفاموليه كلها مهلوسين مس أنا بس.

توقيع:
المهلوس

- Posted using BlogPress from my iPhone

السبت، فبراير 13، 2010

أنا بحبها ...لأ أنا اللي بحبها....

من كام يوم اتقابلنا مع أصدقاء جدد عند بعض الأصدقاء القدام. المهم أخدنا الحديث عن مصر واراءنا في مصر وأوضاع مصر...

وطبعاً اختلفنا (كالعادة) :)

لكن اختلفنا ليه هو دة السؤال: اختلفنا لأننا كلنا بنحب مصر بس بردو (كالعادة) كل واحد بيحبها بطريقته.

احنا (أنا ومراتي و ناس تانية) شايفين إن مصر فيها مشاكل كتير جداً وإن الناس في مصر من غلبها أصبحت تصرفاتها جزء من المشكلة الاساسية. ابتدينا نتكلم على مواقف قابليتنا في زياراتنا لمصر.

الصديق الجديد لم يوافق على رأينا وكان شايف إن مصر جميلة مفيهاش المشاكل الجامدة اللي ممكن تؤدي إلى مصايب لا حل لها، كان في شي من إنكار للواقع... مصر جميلة مفيهاش مشاكل وكله زي الفل...

احنا شايفين العكس مصر مليانة مشاكل والناس أصبحت جزء من المشكلة علشان خلاص طلع عينهم وبوز أبوهم من اللي بيحصل فيهم.... الوضع أصبح كالتالي أنا بتسرق يبقى أنا كمان أسرق، أنا باتغش يبقى أنا كمان أغش، الناس ماشية ورا القدوة الحسنة .....اه .....الحسنة....إنته فاهمين وأنا فاهم....والحسنة القليلة تمنع بلاوي كتيرة....وعاشانا عليك يارب.....المهم...لما نتكلم على المشاكل يبقى ممكن نحلها انما لما تكون كل حاجة جميلة وزي الفل وسلملي على الترماي......ازاي نلاقي حل للمشاكل من غير ما نقر انها موجودة.

المهم، اللي أنا متأكد منه، إن كل المصريين بيحبو مصر بس (كالعادة) كل واحد بيحبها بطريقته...

توقيع:
المهلوس

الارض كروية...

مش عارف اكتب أقول أيه؟ لما تكون لعيبة الكرة يقبضوا بالملايين (ربنا يرزقهم) بس في المقابل الملايين من الناس عايشة على الحديدة.

أصله كمان مش مكن علشان الناس تعرف تعيش يبقى لازم تلعب كرة!!! والله ممكن ليه لا يمكن ساعتها الوضع يتعدل. ماهو لما كل حاجة تكون معكوسة يبقى الوضع معدول.

كفاية تعليم وقرف و مذاكرة و وجع دماغ. اديني كرة وسيبني العب باءة و خليني اكسب و أعيش.

توقيع:
المهلوس

الخميس، يناير 14، 2010

تعللي وانا أعلي...

كل الدنيا بتشيل الحواجز بين بعضها، وبتوحد الحدود. نيجي احنا نبني سور.

اعدنا نعيط لما إسرائيل بنت سور وفضحناهم في الاعلام المصري "الموقر"...

دلوقتي احنا إلي بنبي السور بينا وبين غزة... والاعلام المصري "الموقر"...بيقنعنا إن دة صح.

أيه الهلاوس دي...

توقيع:
المهلوس

اديني في الهايف وانا احبك يا ناننااس

الله ولا God ..
صباح الهيافه. إيه الي بيحصل في ماليزيا ده.... خلاص وصلنا للقاع و بحماس كمان. تخيل لما افندي محترم طول بعرض يروح مولع في مبني مسيحي او كنيسه علشان استخدموا كلمة الله و هما مش مسلمين ... اه و نسيت اقول انه شيخ بذقن يادي المصيبه ياولاد...آمال لو قالوا سيدنا محمد حيعمل فيهم إيه؟ اصل سيدنا محمد بتاعنا إحنا بس (المسلمين) مش بتاعهم هما.... علي فكره مش سيدنا محمد ارسل للبشريه كلها؟؟؟
ما علينا ... الله ..God... الرب - مش كلهم واحد؟

توقيع:
المهلوس
- Posted using BlogPress from my iPhone


الأربعاء، يناير 13، 2010

نلعب ماتش ونخلص...

كل برامج التليفزيون بتتكلم على الكرة. والناس كلها محموقة أوي علشان خسرو ماتش وراح يموتو بعض علشان الكرة.

علشان كدة أنا عندي الحال لمشكلة فلسطين...... نلعب ماتش مع إسرائيل.....

ساعتها الناس حتحس على دمها و تفوق و تعرف إن لو حد دمه حامي للدرجة دي ومستعد يموت علشان ماتش كرة يروح يموت في ستين داهية انما لو حيموت علشان قضية لها قيمة يبقى له الجنة.

توقيع:
المهلوس

الثلاثاء، يناير 12، 2010

صباح الهلوسه:

بصو باءة أنا بقالي فترة باقرا كلام هلاوس في الجرايد وعلى النت، يعني من الواضح إن كلو بيهلوس قلت اشمعنى أنا ؟؟؟
فقررت اني أهلوس أنا كمان. وأدي كله هلوسة في هلوسة
وسلملي على الهلاوس ...

توقيع:
المهلوس