الجمعة، يوليو 21، 2017

انا شاب و لكن عمري ولا الف عام...

....مش حاكتب حاجة و لكن الپوست ده لقيته عالفيسبوك و عملي اكتئاب و فكرني برباعية صلاح چاهين اللي في العنوان...
النهاية.

توقيع:
علي حسني


السبت، يوليو 15، 2017

انا الشعب... احا

الست كان لها أغنية بتقول انا الشعب.... بلاه بلا بلاه بلاه
الحقيقة هي كانت تقصد تقول انا الشعب.... العنصري، الطائفي، الطبقي، الجاهل اووووي و بعدين تختمها بشعبي الجميل المهاود (علي رأي معرص مشهور اقصد ممثل مشهور اول حرف من اسمه محمد صبحي)... كان المفروض يختمها بشعبي الجميل المنافق.... آه المنافق... المهم... اننا من المؤكد شعب جاهل و غير مثقف و معاه شهادات جامعية و بعضهم معاه ماچستير و دكتوراه تثبت جهله.... 
حيجي واحد صاحبي يشتمني و يقول أيه الهبل اللي بتقوله ده؟ احنا أطيب شعب في الدنيا، احنا اجدع شعب في الدنيا، احنا .... بلاه بلاه بلاه بلاه
و انا حأقوله أيه دليلك يا روح أمك ؟؟؟ فحيسألني هوه راخر: أيه دليلك يا روح أمك؟ نظرية برضه، صح؟
انا عندي دلائل مش دليل واحد (شاخدلي بالك من دلائل دي، جمع دليل.... مثقف بأه)... و لكن للامانة فالتصنيفات دي لا تنطبق علي ١٠٠/١٠٠ من الشعب و لكن انت قرر تنطبق علي كام واحد و لو حتي في حدود دايرة علاقاتك الشخصية أو العملية أو الملوخية.... 
الدلائل:
١- كام مرة سمعت حد بيقول: احنا مش عرب... احنا فراعنة اللي بنينا الهرم و الخ الخ الخ.... ده لما بنزعل مع دولة عربية. موضوع اننا بنتكلم عربي و نفس الدين ده كلام بخ.... احنا اللي علمنا البدو دول و لبسناها جزم و المهم اننا احنا اللي بنينا الهرم! اخر إنجاز مصري و من بعده بخ. .... لاااا صحيح، في قناة السويس الجديدة، كنت حانسي، و دي اسميها أيه...؟ . يا اخي احا 🖕
٢-كام مرة سمعت حد بيقول: احنا مش افارقة ... دول برابرة سود ، بيتنططوا عالشجر لسة ... إنما احنا عرب اصلنا من الإشراف حتي لغتنا العربي و ديانتنا زي كل العرب الاسلام... ده لما بنزعل من دولة أفريقية، موضوع اننا في أفريقيا و بنشاركهم النيل و الكلام ده بخ .... موضوع ان مصر هبة النيل و كدتشة بخ... لاااا صحيح، اصل لا مؤخذة مصر بقت هبة البترودولار .كل ده و مش عنصري...؟ يا اخي احا 🖕
٣-كام مرة سمعت حد بيقول: احنا بلد مسلمة ١٠٠/١٠٠ ... المسيحين دول كام واحد و بيخزنوا سلاح في كنائسهم و بيخطفوا ولادنا ينصروهم و بيوتهم ريحتها وحشة و كله من الاكل اللي بالزيت... آه دول عضمة زرقاء ، أربعة ريشة، كوفتس متتعاملوش معاهم اصلهم كفار... ده لما بنزعل عالمسيحين أو بمعني أصح بنسخن عليهم... موضوع انهم أصل الشعب المصري و انهم فعلا أقلية مضطهدة (حوادث كتير تأكد ده) و الكلام ده بخ (اييييه!!! ده اغني واحد فيكي يا مصر مسيحي - ساويرس) كل ده و مش طائفي...؟ يا اخي احا 🖕
٤-كام مرة سمعت حد بيقول: ابن البواب لا ممكن حيبقي قاضي... مستحيل بنتي تتجوز واحد ابوه مش غني، ده تبقي فضيحة... انسي انك تتجوز واحدة من الأقاليم، دي فلاحة.... الفلاحين جم بوظو إسكندرية في الصيف ... حتي اكبر فريقين كورة فيكي يا مصر بيشتموا بعض ازاي؟ فريق البوابين و فريق البقالين... سمعت اخر نكتة عن الصعايدة... كل ده و مش طبقي...؟ يا اخي احا 🖕
٥- نوصل للجهل... سعادتك معاك بكالوريوس او ليسانس بس و لا مؤخذة حمار... اسمعني بس زمبؤلك كدة حمار و حصاوي كمان... مترافسشي بس كدة و اهدي... هسسسسسس... عارف ليه حمار؟ علشان لهلوبة تصُم الكتاب و المنهج و تروح تفضي دماغك في ورقة الامتحان و خلصنا... الوقت و الزمن مابين الصم و بين الامتحان اتحداك لو مخك اشتغل و لو مرة واحدة... عافكرة مش انت بس اللي حمار كلنا يا عزيزي حمير و كلنا اتعلمنا بنفس الطريقة و في نفس الزريبة... و اللي علمنا من مدرسين و دكاترة شرحه... من الزريبة نفسها واكلين نفس التبن... برضه بترفس و مش عجبك؟!؟ طب قوللي امتي سمعت فكرة و حللتها بموضوعية و مصداقية و عملتلها علي الاقل SWAT (مش حاشرح ايه ده، روح دور علي جوجل) و عرفت نقط القوة و الضعف للفكرة او الموضوع... لا طبعاً ... عارف ليه؟ انت اتعلفت و اتربيت علي انك تصدق اي حاجة بابا او مدرسك او مديرك او رئيسك او اللي حاكمك يقولها حتي لو كانت كفتة (مقصدش حاجة يعني) ... انا واثق في الشخص و بكدة اركن مخي و اريحه (ده فابريكة يا با) و اللي يقوله مهما كان هلفطة حاصدقه... حتي لو كلام ميخشش العقل برضه حاصدقه... حتي لو كان ضد مصلحتي حاصدقه... اصل هو ادري مني بمصلحتي و بعدين لو شغلت مخي الشيطان يخدني سكة تانية... ال اشغل مخي ال ... يا أخي احا 🖕
٦- اخر نقطة قبل ما تجيلي النقطة و انا باكتب.... تبقي النفاق... في نفاق اجتماعي، و في نفاق في العمل و في نفاق في الدين و ثق اننا اكتشفتا طرق و مجالات للنفاق لا يمكن الجن الازرق يفكر فيها...
٦-أ- كام مرة سمعت حد بيقول: حضرتك من أفضل المديرين اللي اشتغلت معاهم... و من وراه: الحمار ده انا اللي معلمه الشغل و جايبنه مدير عليا و هو ولا فاهم حاجة.... انا اللي ممشي الشغل كله....
٦-ب- كام مرة سمعت حد بيقول: مش ممكن جمالك ده ... احلي عروسة و ست البنات كلهم... جمال و عقل و خفة دم.... و من ورآها: يا كبة... انا والله ماجئت الفرح ده غير علشان اشوف المغفل الي أتجوزها.... يا خراشي علي تقل دمها...
٦-ت- كام مرة سمعت حد بيقول: الله اكبر.... نويت الصلاة..................... السلام عليكم و رحمة الله.... و اطيعوا الله و اطيعوا الرسول و اولي الامر منكم ... وولي الامر مهما فشخك اسمع كلامه... متستغربش لو شفت الواد المؤمن بعدها علي طول علي كوبري قصر النيل: عليا النعمة إنتي مُزة و صاروخ ... لو تيجي أجي و لو تروحي اروح... حاظبتك يا جميل...  

خلاصة الكلام ... احنا شعب مليان عيوب و عيوب بنت لذينة و لكن عمره ما كان باختيارنا اننا نبقي جهلة و لو حتي طبقين أو عنصريين... ده واقع أتفرض علينا علي مدار السنين و و بيتهأيلي ان الاوان نغير الواقع الخرا و نصحي بقي... كفاية نفاق... كفاية تطبيل... كفاية جهل...
كفاية كدة...
احا... ده احنا الشعب... 🖕

توقيع
علي حسني


الثلاثاء، يناير 31، 2017

دولة الموز يحكمها القرود...

موقفين حصلوا في الشهور اللي فاتت كشفولنا ان الدول الديمقراطية و دول العدل و الحرية زي بريطانيا و امريكا مهماش جنة الله في ارضه و لا هما اصحاب الحقيقة المطلقة...
و لكن كشفولنا برضه ان مفيش حاجة اسمها حكم الفرد المطلق و لا الحاكم الاوحد و لا ابو العريف اللي عارف كل حاجة و مسيطر...
كشفولنا ان بالرغم ان عندهم مشاكل في تطبيقهم للديمقراطية و لكن عندهم حاجة عمرنا ما عرفناها و هي...

بريطانيا
جه واحد سياسي كان عمدة لندن و قرر انه انه مش مقتنع بمزايا وجود بريطانيا في الاتحاد الاوروبي... طلع و قال الكلام ده و نادي بالخروج من الاتحاد... رد عليه رئيس الحكومة (كبير القعدة عندهم - بعد الملكة اللي لا بتصد و لا بترد) و قال ده كلام فارغ مفيش خروج من الاتحاد... 
كلمة من ده و كلمة من ده قالوا نسأل الناس... و حصل... و النتيجة كانت اغلبية : نخرج من الاتحاد... البعض زعل و خرج معترض و كبير القعدة استقال علشان الاتجاه ده لا يتفق معه و لكنه لا يستطيع منعه و لكنه لن يشارك فيه وخلاص... 
و خلاص بريطانيا في طريقها للخروج من الاتحاد الوروبي.

الصور المختلفة اللي اترسمت في خيالي لو حصل الموقف ده عندنا:
  • كبير القعدة حيكلم العمدة و تاني يوم العمدة يعمل مداخلة تليفونية لبرنامج تليفزيوني شهير و يعلن انه تم اساءة فهمه و تحوير كلامه و هو كان يقصد الخروج من اتحاد الكورة بس
  • العمدة كان حيقعد في بيتهم اول ما يعلن الكلام بتاع الخروج ده و كدة يبقي قفلنا الموضوع بدري بدري.
  • كبير القعدة كان حيمنع الكلام بتاع العمدة ده انه يتنشر و ينتشر عن طريق سد طريقه لقنوات الاعلام 
  • يتم تشويه سمعة العمدة و اغتياله سياسياً و يبقي مكانه الوحيد عالقهوة
  • عدم سماع صوت الشعب او تخويفهم بأن الخروج من الاتحاد يساوي الخروج من الجنة و دخول النار
  • لو محصلش حاجة من كل ما سبق فأن كبير القعدة كان مش حيستقيل و يستمر في الحكم عادي خالص و يخرج من الاتحاد يومين لحد ما الناس تنسي و يرجع يدخل تاني من سكات.
امريكا:
جم انتخبوا واحد لاسع و عنصري و الكلام اللي انتم عارفينه ده...  المهم الاخ ده طلع قرارات بمنع بعض الجنسيات و اللاجئين من دخول امريكا... قوم ايه، 
عدد كبير من الاعلام و الاعلامين يبتدوا يهاجموا القرارات و حتي بعض الفنانين كمان هاجموه علنا في مهرجان سينمائي و بعض الناس ابتدت تعترض و ترفض و تتظاهر و كدة يعني... عادي و لا حد اتمسك أو اتسجن...
مين كمان كان من المعترضين؟ و هي دي المفاجأة الكبري (لنا احنا اهل العالم التالت)
بعض عُمد المدن (جمع عمدة) و بعض حكام الولايات (جمع حاكم) و بعض اعضاء الكونجرس و غيرهم الكثير او حتي القليل من المسؤلين الحكوميين اما علي مستوي الولايات او الحكومة الفدرالية (تفاصيل مش مهمة)
لدرجة ان في حكم محكمة بابطال القرار الرئاسي العنصري ده و كمان احدي الولايات رفعت قضية علي الاخ الرئيس لمخالفة قرارته للدستور و حاجات تانية كتير، الخ الخ الخ...
اهم حاجة في الموضوع ده ان اللي بيعترض هو مسؤلين حكوميين يعني الباشا الكبير رئيس الجمهورية يبقي بصورة مباشرة او غير مباشرة رئيسهم في العمل...
الصور المختلفة اللي اترسمت في خيالي لو حصل الموقف ده عندنا:
  • كل المسؤلين الحكوميين ... كلهم... حيطلعوا علينا في التليفزيون و الراديو و الجرايد و النت و من كل شباك و بلكونة و حتي الحنفيات علشان يأكدولنا ان قرارات الرئيس المنزه دستورية و سليمة و صح و ١٠٠/١٠٠
  • التوك شو كلهم حيبتدوا يعلمونا عن مزايا القرار و خطورة عدم اتخاذه في المرحلة الحرجة دي اللي مرتبطة بكونها محورية بؤروية حلزونية و مدورة
  • و المشاهير كانوا حيتمسكوا مخدرات او دعارة او شذوذ او اي حاجة كدة و لا كدة و لا كدة
  • و كانت الناس العاديين حينزلوا يعترضوا و يتلموا في السجون و انتهينا.
بيتهأيلي كدة كلنا اتأكدنا اننا نعيش في دولة الموز...

توقيع:
علي حسني