السبت، ديسمبر 31، 2016

ريزوليوشنز ٢٠١٧ و الخاصة فقط بصفحتي عالفيسبوك

سخرية القدر... كنت بأفكر ازاي ابتدئ كتابة الريزوليوشنز و شاءت الاقدار ووقعت عالفيديو ده.... سبحان الله ميسر الأمور ....

الفيسبوك عندي عامل كدة بالظبطططططط.
اتفرجوا علي الڤيديو ده....



عندي أصحاب و أصدقاء و كلهم حبايبي و عمري ما زعلت و لا حازعل منهم و لكنهم يمثلوا الڤيديو ده بالظبط.... موجود من هم مثل الراجل اللي أتكلم و بكي و موجود من هم مثل الست اللي اتكلمت و شتمت و موجود من هم مثل المذيعة اللي اتشتمت.
و انا بالرغم من ان ظروفي كويسة (نحمد ربنا) و قد تكون زي ظروف الست و لكن الاختلاف عنها اني مش بأنكر وجود الملايين زي الراجل ده و مش بأتهم الناس اللي بتشتكي أو اللي بتتكلم عن الناس اللي بتشتكي أو اللي بيقولوا ان في مشاكل و المشاكل مش بتتحل باتهامات زي: أنهم مش فاهمين حاجة و شغالين عند حد بهدف التشويه زي الست ما قالت أو انهم بيخلقوا مناخ تشاؤمي (في ناس بتُحاكم بالتهمة دي علي فكرة) و أو انهم عميان عن الحقيقة و مش شايفين الفراشات في الحديقة المزهرة و الورود المنعشة (إعلانات مسحوق الغسيل ستايل)
و هي دي المشكلة عند البعض...
انك طالما بتتكلم عن المشاكل فأنت مش فاهم حاجة أو انت مش بتحب البلد أو انت مضحوك عليك أو مش بتشوف اَي حاجة حلوة أو كئيب أو.... اَي حاجة غير انك بتنقل الواقع أو انك بتحاول تناقش احداث و مشاكل بهدف وضعها علي السطح ليسهل علاجها و حلها مش بتخبيها و تنكر وجودها و بالتالي هي مش موجودة فتبقي مش محتاجة حل.... (البؤيين بتوع: أنتم بتهدوا البلد بالكلام ده)

عن نفسي شايف و عارف ان الملايين بتعاني و ربنا وحده يعلم.... و كتير غيري شايفين نفس الحاجات دي و بيتكلموا عليها و بينتقدوها و بيحاولوا يعرضوا حلول و يناقشوا و برضه بيتشتموا و لكنهم مصممين و عندهم البتاع اللي اسمه الأمل ده.
و لكن في ناس تانية فيهم اللي شايف و عارف بس بينكر حتي لا يُتهم بانه غير متفائل و يفضل حلو و كيوت (عامل نفسه عبيط يعني).
و في اللي مقتنعين تماما ان كل حاجة حلوة و جميلة و ده حقهم و لكن ذوقياً المفروض يعني ما ينكروش علينا حقنا لو شفنا العكس و هما نفسهم اللي مش بيردوا لما تسأل: اشرحولنا مقتنعين ليه؟ حقهم برضه زي ما هو حقنا لما نسأل.
و في بقي اصحاب نظرية طالما بعيد عن ط..ي و لا مؤاخذة يبقي خلاص نو پروبلم.
و في اللي عارفين المشاكل و بتواجههم و بيشتكوا منها و لكن بوضعهم الاقتصادي و الاجتماعي بيقدروا يتعاملوا بطريقة أو اخري و عارفين وجود الغلابة و عارفين ان مشاكل الغلابة مش بتتحل و لكن علي العكس بتزيد و لكن ..... ال لكن دي هي الحدوتة كلها....
 لكن ازاي حد يقول ان في مشكلة!؟ ده تشائم .....ما يصحش كدة، زي الشريك المخالف، ازاي ما بتقولش أمين  و تصقف/تصفق، ده الأمل موجود...  ٦ شهور كمان. 
و كلنا عارفين ان بالامل يحيا البتنجان...
و ان البتنجان اهم حاجة في الدنيا و خصوصا لعمل المسقعة و بما ان انا بحب المسقعة فإذا انا بحب الأمل.

 و عليه فقد قررت الآتي...

ريزوليوشنز ٢٠١٧ و الخاصة بصفحتي عالفيسبوك
-------------------------------------------------------

و رغبة مني في بقاء الأمل و حرصا مني علي سلامة الأمل و صحة الأمل و روشنة الأمل و خفة ديك أم دم الأمل (مرتضي ستايل) فقررت الآتي فيما يخص صفحتي علي فيسبوك: (فقط)
- صفحتي عالفيسبوك للكلام اللطيف أو الفارغ أيهما اسبق و بس
- صفحتي عالفيسبوك للحفاظ علي الصداقات و ليس فقدها و احياء العلاقات القديمة و عمل علاقات جديدة ميضرش برضه و بس
- صفحتي عالفيسبوك مش للسياسة أو المشاكل الحقيقية أم دم تقيل و لكن للفرفشة و النعنشة و اديني في الهايف احبك يا نننس و بس
- صفحتي عالفيسبوك للأصدقاء و القرايب و الحبايب و الكلام العائلي و الزواج و الطلاق و أعياد الميلاد و الطهور و المواليد الجديدة و الوفيات و يرحمهم و يرحمنا جميعا وبس
- صفحتي عالفيسبوك مش لصور الحاجات إلكخة (خريطة مصر و فيها تيران و صنافير مثلا) اللي تعكنن المزاج و لكنه لصور العربيات و و القطط و الكلاب و ممكن الفراشات و المناظر الطبيعية و ممكن شوية ڤيديوهات سما المصري و بس
- صفحتي عالفيسبوك للحقائق العلمية و الفنية و ناشيونال چيوجرافيك و مايضرش شوية x فاكتور أو حتي xxx و بس
- صفحتي عالفيسبوك لكل من يعيش في الباببل و بس

و علي فكرة سألتزم بالريزيليوشنز دي لمدة ٦ شهور و علي الرغم من اني مقتنع ان رأيي و رأيك لن يغيرا شئ.
و علشان مش عاوز أوصل لمرحلة انني اصدق حاجة كدة زي : مفيش فايدة (سعد باشا زغلول ستايل)

ميعادنا يوم ١ يوليو ٢٠١٧

توقيع:
علي حسني

پي أس: لما أحب افضفض و أتكلم في المواضيع السخيفة إياها (اللي بالي بالك) حكتب هنا في البلوج بتاعتشي اللي محدش بيقراها أو علي تويتر (ايوة مع الناس ولاد الكئيبة اللي هناك دول).

الجمعة، يونيو 24، 2016

هو أفندي كدة... باين عليه العظّمة

- أعصري مخك يا زينب، تقدري توصفيه يا زينب؟؟
- هو أفندي كدة... باين عليه العظمة
ده مشهد خطر علي بالي من مسرحية أنا و هو و هي، بطولة فؤاد المهندس و شويكار.

ايه اللي يخليني افتكر مشهد كوميدي من مسرحية قديمة؟
يعني اللي احنا عايشينه ده مش هو واقع كوميدي؟ ده كوميديا سوداء اه بس كوميديا..
ماشي، بلاش فلسفة و حاقولكم ليه افتكرت المشهد ده...

كلنا شفنا الاخبار بتاعة انفصال انجلترا عن الاتحاد الاوروبي، صح؟
يعني انجلترا لمت هدومها و خدت صيغتها و هدوم العيال و كام حتة من عفش البيت و خرجت جري من عش الزوجية الاوروبي.
الحقيقة هي خسرت كتير في اول يوم من الانفصال ده، عُملتها اتضحضحت، الاسترليني نزل بتاع ١٠٪ و لكن "اصون كرامتي من قبل حبي'

الفكرة بقي، ان اللي حصل ده هو اقوي و اجمد تعبير عن الديمقراطية في أبهي صورها... و خللي في بالك ان دي دولة بلا دستور مكتوب، يعني محدش حيقعد يقولك الدستور بيكفل الحق ده و بلا بلا بلا...
لا مش الدستور يا كابتشن، ده حقك كمواطن في دولة بتحترمك كمواطن و نظام عارف انهم موظفين عند المواطن ده... عايز اشرح حتة صغننة مهمة...
الانفصال ده تم ازاي؟ حاجة بسيطة جدا... قرب قرب قرب .... قرب يا افندي، قرب يا استاذ، قربي يا مدام و انت يا انسة... ايوة اتجمعوا او حتي اتقسموا كدة و خشوا اكتبوا انتم عايزين ايه؟ 
- نفضل مع الاتحاد الاوروبي؟
- و لا ننفصل عن الاتحاد الاوروبي؟

بمنتهي البساطة، عملوا استفتاء... حتقوللي عادي و ايه المفاجأة ما احنا عملنا استفتاءات كتير قبل كدة... دي كانت لعبتنا في الكام سنة اللي فاتوا... حاقولك: مظبوط ... لعبتنا لعبتنا يعني... بأمارة الرز و السكر و الزيت و الجنة و النار و خلافه... و بعدين توقفنا عن الاستفتاءات ، ليه بقي؟ (حارجعلك في الحتة دي بعد شوية، استني متتحركش من هنا)

نرجع لانجلترا، كل فريق مؤيد لفكرته عمل حملة قوية و استقطب المشاهير المؤيدين له من كل انحاء و البلاد و حاولوا يقنعوا العباد ان رأيهم هو الصح و كدتشة يعني... الحكومة ذات نفسيتها كانت مع البقاء و ضد الانفصال... بس عافكرة يعني محدش وقف علي باب لجان الاستفتاء و قالهم ان الانفصال عيب و حرام او عدم الانفصال حيدخلهم الجنة ... فاهمين انا بلقح كلام علي مين؟ اكيد طبعا... ما علينا...

انجلترا من زمااااااااان حكمها مدني ديمقراطي و ده رغم انها ملكية و فيها ملكة و قصر و خدم و حشم.... و لكن رئيس الوزراء المدني هو الحاكم الفعلي للبلاد و العباد..(كان ضد الانفصال و لكن محبسشي بتوع الانفصال ولا علقهم من .... ). و مش محتاج اشرح نظام الانتخاب هناك... الفكرة انه منتخب من الشعب و عارف انه لما يكون في احتياج لقرار مصيري زي الانفصال ده يقوم يرجع للشعب (اللي مشغلينه) و هو عارف و معترف انه موظف عندهم و الناس كمان عارفين انه موظف عندهم... يعني علاقة عمل واضحة و صريحة... مش علاقة ابوية او روحانية او اي زفت..  هو موظف عند الشعب ... مفيش فيها ام فلسفة... موظف بياخد مرتب و يؤدي وظيفته و يحاسب لما يغلط... بيزنس اذ بيزنس يا خبيبي.

نعمل بقي لفة ١٨٠ درجة... يعني ادي ضهرك لأنجلترا و بص وركز في مصر...
مش حاحكي حواديت... حاتكلم عن موقف واحد، لا موقفين.. لا تلات مواقف... بصوا انا حاتكلم و زي ما تيجي...

اولها من اخرها: جزيرتين من اراضي البلد تم تقديمهم/بيعهم/التنازل/اي بتنجان و خلاص، المهم الريس المنتخب اداهم لبلد تانية. و مش عاوز يتكلم في الموضوع ده تاني. و عيب و ميصحش كدة و متصدقوش حد غيره... تصدق بالله... قول لا اله الا الله... الشعب معرفش بالموضوع غير بعد ما الطبخة تمت و اتاكلت و هضموا بعديها بشاي بالياسمين. 

وصلنا لكدة ازاي؟ من اول ما اعتبرنا اننا شغالين عند الريس المنتخب و انه بابا و ماما و انه المنقذ الاوحد و انه الاقوي و مفيش غيره فاهم كل حاجة و خبير في اي حاجة... و هنا بقي مفيش داعي للاستفتاءات و الكلام الفارغ ده و بطلنا نسأل الشعب او ناخد رأيه في المواضيع دي... ده هو طبيب الفلاسفة زي ما قالنا عن نفسه و هو اللي عارف علاج كل حاجة و لازم العالم كله يسمعله (مش هو اللي يسمعلنا)... و احنا صدقنا و هو مصدق و قراراته من دماغه و الشعب اللي بيشتغل عنده (مش العكس) المفروض يصقف و يهلل و يقول أمين و ١٠٠/١٠٠ يا بابا يا منقذنا و حامينا و محمينا و مليفنا و منشفنا... طويل العمر يطول عمره و ينصره علي من يعاديه... هاي هيه.

المهم بقي، صدقنا ليه انه سوپرمان و حينقذنا من أهل الشر؟ علشان خايفين... خايفين ليه؟ علشان هو قال لنا خافوا من أهل الشر فخوفنا.

المشكلة كلها ابتدت هنا: اننا معندناش نظام حكم مدني. احنا عندنا نظام حكم عسكري.
عسكري ازاي؟ امال الريس ابو بدلة شياكة ده و كرافتة يبقي ايه؟ مدني ولا مش مدني يا متعلمين يا بتوع المدارس.
هو اينعم البدلة المدنية ممكن نعتبرها مقياس علي مدنية الريس ( لأننا و لا مؤخذة سطحيين شوية)، ده ممكن و لكن التصرفات و اسلوب الحكم و القرارات و تجاهل الشعب و اتخاذ القرارات المصيرية بطريقة فردية و اقصائية هي المقياس الحقيقي لمدنية او عسكرية النظام الحاكم. 

العسكري مينفعش يكون مدني و ميعرفش يكون ديموقراطي و لا عمره ما كان و لا حيكون و حتي لو لبس بدلة عظّمة و زينب قالتلك انه افندي.

توقيع:
علي حسني



الجمعة، مارس 25، 2016

يلا كويس ... الله يرحمهم... عفارم عليكم

المشهد الاول
- عباس، الموضوع باخ اوي و ديوله بتطول... خلص الموضوع ده النهاردة او بكرة بالكتير 
- موضوع ايه يا فندم
- عباس... ركز معايا... موضوع ايطاليا
- تمام يا أفندم ... اعتبر الموضوع منتهي

- صباح الخير يا سيادة اللواء
- اهلا معاليك... ازاي حضرتك يا عباس باشا؟
- كويس، بقولك يا سيادة اللواء... الموضوع باخ اوي و ديوله بتطول... خلص الموضوع ده النهاردة او بكرة بالكتير
- تمام يا أفندم ... اعتبر الموضوع منتهي

- ازيك، انت فين؟ مش مهم... بقولك الموضوع باخ اوي و ديوله بتطول... خلص الموضوع ده النهاردة أو بكرة بالكتير
- تمام يا فندم... اعتبر الموضوع منتهي
- حنشوف

- ايوة يا ابني، اسمع و ركز معايا ... الموضوع باخ اوي و ديوله بتطول... خلص الموضوع ده النهاردة او بكرة بالكتير
- تمام افندم... اوامرك حتتنفذ

- اسمعوا بقي... الموضوع باخ اوي و ديوله بتطول... خلصوا الموضوع ده النهاردة مش بكرة
- موضوع ايه يا فندم
- موضوع ايه!!! الموضوع... اقفل دلوقتي حاكلمك بعدين

- الو ... الو ... تعرف الريس كلمني علي انهي موضوع اللي عايزه يخلص النهاردة؟ متعرفش!! طب اسئله كدة تكسب فيا ثواب...

- الو... الو... الموضوع اللي لازم يخلص النهاردة اوبكرة... ايوة هو كلمني عليه ... طب اسئله هو موضوع ايه كدة؟ تكسب فيا ثواب...

- الو ... الو... سيادة اللواء كان طلب نخلص موضوع كدة بسرعة...  ايوة النهاردة او بكرة بالكثير... تسمح بس تسأل سيادة اللواء هو انهي موضوع بالظبط تكسب فيا ثواب...

- عباس باشا الجماعة بيستفسروا هو انهي موضوع اللي معاليك عايزه يخلص النهاردة او بكرة؟
- ايطاليا
- شكرا معاليك

- ايطاليا

- ايطاليا

- ايطاليا

- ايطاليا... تمام يا افندم

المشهد الثاني
- ااه يا مغفل منك له!! حتودونا كلنا فداهية... حبكت يعني الواد من ضمن الناس اللي فالشارع دول كلهم؟؟؟!!!
- يا باشا ده نصيب... مرديش يرد علي الاسئلة يا باشا... و طلع فافي و سيس مستحملش التحقيق سعادتك
- خلاص خلاص ... مش مهم ... بصوا بقي لازم نقفل الملف ده النهاردة
- سهلة اباشا... سيبها علينا و علي ربنا.
- ورينا يا اخويا

- اسمع يا ابني انت و هو... هاتولي الحاجة اللي كانت مع الواد 
- كلها؟
- طبعا كلها...

- عبده، انت معاك النظارة بتاعته؟
- باين، انا الاسبوع ده لميتلي كذا واحدة... مش فاكر انهوا بتاعته
- هاتهم كلهم

- سيد فين محفظة الواد
- موجودة ... بس الفلوس... 
- رجعها زي ما كانت و هاتهالي

- ساعته فين؟
- اديتها لسعيد ابني.. اصله نجح في المدرسة عقبال اولادك
- هاتها منه

- باسبوره و اوراقه فين؟
- مجدي اخدهم...
- يا زفت هاتهم لي حالا

- شنطة الواد؟
- منعرفش... بس سهلة... هو مش طالياني؟ خلاص مشوار للعتبة و الشنطة تبقي رجعت

- فاضل ايه؟
- بص احنا حنجيب شوية حاجات من اللي لميناها الاسبوع دوكهها واكيد فيها حاجات بتاعته..

- ناسيين حاجة؟ اه من اللي حيشيل القضية!!!
- تايهة ولقيناها... 

- دشششششششش طاخ طوخ دششششششش طوخ طاخ
- ماتوا
- كلهم
- ١٠٠/١٠٠ يا رجالة

- خود الشنطة حط فيها حاجة الواد كلها و حطها في الميكروباص
- مفقوسة اوي يا افندم
- اومال فين؟
- بيت حد منهم.. سهلة يا افندم
- لا حطها في بيت حد من عيلة حد فيهم ... 
- صح أفندم كدة تبقي مستغطية
- بس ما نعرفش حد منهم افندم...
- اتصرفوا شوفو هما مين و اتصرفوا
- كله تم افندم

المشهد التالت
- تمام افندم ... الموضوع اتففل سعادتك
- مسكتوهم؟
- عيب يا باشا ... تلامذتك... قاوموا و تم التعامل و للاسف ماتوا كلهم
- يلا كويس ... الله يرحمهم... عفارم عليكم

- تمام افندم... الملف اتقفل
- ازاي؟
- تم التعامل و القضاء علي الجناة
- يلا كويس ... الله يرحمهم... عفارم عليكم

- كله تمام يا سيادة اللواء
- طمني
- قاوموا و ماتوا يا افندم
- يلا كويس ... الله يرحمهم... عفارم عليكم

- عباس باشا. تم يا فندم
- سمعت... يلا كويس ... الله يرحمهم... عفارم عليكم

- معاليك
- خلاص يا عباس عرفت... يلا كويس ... الله يرحمهم... عفارم عليكم.... كمل شغلك و انت عارف ازاي

المشهد الرابع
- الو... اكتب يا احمد

المشهد الخامس 
- افندم... يا افندم... 
- ايه يا زفت؟
- المحفظة بتاعة الواد أفندم
- مالها ازفت
- سعادتك انا لما رجعتها نسيت فيها حاجة ظغيرة 
- انت مش حطيت فيها نفس المبلغ اللي كان مع الواد؟
- تمام سعادتك بس كان في تمناية في وسط الفلوس و دلوقت بقت في المحفظة..
- يخرب بيتك يابعيد
- محلولة سعادتك... احنا نقول انه ديلر
- ديلر؟!
- هو مش طالياني سعادتك... مافيا و كدة يعني
- عفارم عليك

النهاية ... النهاردة... حنشوف بكرة


توقيع:
علي حسني


الجمعة، يناير 22، 2016

يا لذيذ يا بارد...

في بلاد برة كتير منها بلاد برد و تلج و حاجة عذاب و ناسها ملفوفين في هدوم كتير زي الكرنبة و خروجاتهم محدودة من جوة لجوة يعني من البيت للمطعم و كله لازم يكون في الدفا... عيشة يتحكم بها الجو و التلج و المطر ... يقعدوا يحلموا بالشمس من الصيف للصيف و لما يحصللوه يبتهبلوا يا حرام و يبقوا بيجروا يمين وشمال علشان يلحقوا يستمتعوا به... و بالرغم من كدة محدش منهم لعن بلده و شتمها و سبلها الدين علي الجو القاسي و الحرمان من متع الدنيا اللي ربنا خلقهالنا زي الشمس و الهوا و الدفا و الخضرا اللي طول السنة... ليه؟
عالم هبلة مثلاً؟ مش عارفين يشتموا؟ (نعلمهم احنا - سهلة قوي ده احنا اساتذة الشتيمة و سب الدين و الام و الاب - اصلنا ولا مؤاخذة شعب متدين بطبعه)...
الخلاصة مشتموش ليه؟ لييييه؟؟!!!
علشان في توازن. 
يعني ايه؟
 اقولك انا... جو قاسي و عيشة الطبيعة مخلياها مش مريحة و متعبة و خصوصا للمفاصل و الركب... اخرابي عالبرد و اللي بيعمله في الركب...
نرجع لموضوعنا ... التوازن حاصل لان الدولة بتلعب دور الراعي الواعي و المتفهم و الحنين (بتكلم عن النظام الكامل الحنين مش الريس المهسوك ولا مسهوك... مش عارف انهي صح... المهم...) النظام في البلاد دي اتصمم لخلق التوازن مع الطبيعة ... يعني ميبقاش طالع دينك من البرد و كمان الاتوبيس او القطر يتأخر عن مواعيد جدوله... متبقاش مدارس عيالك بعيد عن البيت و العيال تتسوح في البرد... دكتورك و مستشفيتك جنب بيتك... دخلك مغطي مصاريف حياتك و يسمحلك تشتري هدوم تقيلة و تدفع فاتورة الكهربا اللي بتدفيك من غير ما تتقطع كل شوية... الشوارع و الزبالة بتتلم في عز البرد و التلج شغال لأن حياتك لازم تستمر برغم قسوة الطبيعة... النظام موجود لخدمتك مش لخدمة الباشا... و كل من يعمل بما فيهم انت بتكونوا المنظومة اللي بتحرك و بتحافظ و بتطور النظام ده...
ممكن استمر كدة الي ما لا نهاية... و لكني زهقت من الكتابة.
كنت ناوي اعمل مقارنة بين بلدنا و البلاد البرد الوحشة دي (بلاد الكفار) و بعدين لقيت ان مقارنة الجو هي الحاجة الوحيدة اللي في صالحنا... عندنا احلي جو طول السنة و ده من نعمة ربنا علينا... الباقي بقي كله عليه العوض و منه العوض... كل ما افكر اعمل مقارنة تانية اكتئب... مش لاقي حاجة تانية احنا فيها احسن... قوليلي انتم، احنا احسن في ايه من 'الناس الاشرار - الكفار - البردانين الوحششششييييييين' ؟؟؟

توقيع:
علي حسني