الأحد، سبتمبر 20، 2015

متخافش من الهبلة و لكن خاف من خلفتها

صلوا عالنبي.... حاكيلكم قصة قصيرة جدا و هي قصة الدولة الهبلة اللي مسكوها طبلة.
الدولة الهبلة مش مرتبطة بمين بيحكم... هي هبلة علي طول و عمال علي بطال ...
و الهبل ده شكله وراثي او له علاقة بالمياه اللي بيشربها اهل البلد ...
القصة تبقي احلي لما نحكيها مش نحللها... انتم حللوا براحتكم بعد ما خلص الحدوتة....
الهبل بان علي اصوله لما:
- شعب بلدنا الاصيل سرق الكهرباء من عواميد النور في الشوارع (اعتقد القليوبية) فقام المحافظ الهمام حامي حما الوطن و حفاظا علي اموال الدولة و منعا لسرقة التيار الكهربائي قام شال عواميد النور... فتك صح؟ لا اهبل... فكروا فيها ثانية و انتم تعرفوا ليه.
- ناس شريرة و للدقة ٢ ولاد كلب و في مقولة اخري ٢ ارهابيين ركبوا موتوسيكل و عند الكمين او لجنة الشرطة قام اللي قاعد ورا السواق ضرب نار عالعساكر و قتل عدد منهم قامت الحكومة في المحافظة دي قررت منع ركوب الموتسيكلات لأكتر من شخص واحد، حل عبقري ينم عن غباء وراثي...
- التوكتوك من اكتر الحاجات المزعجة في المحروسة... و لذلك قررت الحكومة منعه من السير في الطرق و الازقة و الحواري و خلافه و ده طبعا بدون توفير اي بديل للناس اللي شغالة عليه و لا الناس اللي مستفيدة من خدماته... عادي قرار اهبل طبيعي خالص...
- الارهابيين في سينا راكبين سيارات الدفع الرباعي و غير ان الحكومة قتلت سواح لأنهم راكبين سيارات دفع رباعي لا و كمان منعت استيرادها و منعت سيرها في المناطق و منعت مرورها من نفق الشهيد احمد حمدي، يعني اللي عنده عربية من دول يلبسها او ياكلها او يرميها في البحر بكرامته بدل ما يموت فيها و بسببها او اضعف الايمان مش حيعرف يسوقها في اماكن كتير في المحروسة و ممكن مواطن شريف غيران منه يبلغ عنه انه ارهابي لمجرد انه راكب 'سيارة دفع رباعي' ... دولة الهبل في ابهي ضورها...
و لو ركزنا حنشوف حاجات كتير زي كدة من اختراع الكفتة الي اسر قائد الاسطول السادس الي الدستور اللي حيعدلوه من قبل ما يشغلوه ... مشوار طويل مليان امثلة لحد ما نوصل للمفاجأة الكبري... مجلس ادارة العالم و خطط تدمير العالم بجهاز 'هارب' و مخلوقات جوف الارض و المدن اللي تحت الارض و الكائنات اللي سلمت علي هتلر... بصوا الليستة طويلة ولا نهاية لها... 
جوجلوها انتم بقي براحتكم...كفاية كدة... خلاص اكتئبت من كتر الضحك...

توقيع:
علي حسني


السبت، سبتمبر 12، 2015

النسبية يا سنية

عمنا و استاذنا الكبير اينشتاين و قبله شيخنا الجليل جاليليو الله يرحمهم و يبشبش الطوبة اللي تحت دماغهم هما اللي نورولنا طريقنا و علمونا ايه هي النسبية... بس النسبية اللي حنتكلم عليها مش بتاعة الباشمهندسين دوكهما والا لو كانت هي نفسها النسبية بتاعتهم و شافوا احنا فاهمنها ازاي... كانوا و لا مؤاخذة قطعوا بت.... مشيها شرايين ايديهم.
النسبية بتاعة دوكهما: مبدأ النسبية (بالإنجليزية: Relativity Principle)
One of the most widespread is the belief that any law if nature should be the same at all times; and scientific investigations generally assume that laws of nature are the same regardless of the person measuring them.
بالعربي الفصيح ينص على : أن قوانين الطبيعة تظهر لجميع المشاهدين بنفس القوانين ، بغض النظر عن ماهية الشخص الذي يقوم بالقياس ".
اما مبدأ النسبية في زمننا الاغبر ده (بالإنجليزية: The Fuckedup Relativity Principle) 
و بالعربي الفصيح ينص على:
أن قوانين البلد لا تظهر لجميع المشاهدين كنفس القوانين ، نظرا لارتباطها بالشخص الذي يقوم بالقياس ...
و بالعربي الفصيح اوي:
يعني إذا كان الشخص عايش و مظبط نفسه مع النظام و بيتحرك مع النظام وفي خط النظام فيبقي ١٠٠/١٠٠ و فل و اربعتاشر انما لو معجبش النظام فساعتها القوانين بتتغير و بيلبس ١٠٠/١٠٠ و بيبقي هو البت فلة ذات نفسيها و اللي راح راح " . 
واضحة طبعا بس في ناس بتحب تعمل نفسها من بنها فهانشرح النظرية بالامثلة ... واحدة واحدة:
- ان واحد يكسر اشارة و ظابط يوقفه و يمشيه بعد دقيقة و يضربله تعظيم سلام مقابل واحد تاني يكسر نفس الاشارة و نفس الظابط يوقفه و يشده علي البوكس و ينفخه ده اوضح شرح لنظرية النسبية (بتاعتنا) السواق الاول له معارف واصلة و حصل تليفون و السواق تاني ملوش و اللي ملوش مايلزموش فبيتنفخ... و كل ده و المفروض ان القانون اللي مطبقش في الحالتين واحد ... بس العملية نسبية.
- ان واحد يجيب مجموع يدخله كلية في العاصمة و لكن القانون لا يجيز نقله و في المقابل ان طالب تاني مجابش مجموع يدخله بيتهم و لكن نفس القانون يجيز نقله لأن و لا مؤاخذة الوالد من الباشاوات و البهوات و مش حاقول اكتر من كدة (اللهم اجعل كلامنا خفيف عليهم) يعني العملية نسبية.
- ان واحدة يتم التحرش بيها فيجي واحد شهم يدافع عنها فيقوم الشعب الكريم و من وراءه الشرطة يمسكوا في خناقه و يسيبوا المتحرش و يشتموا الضحية و في المقابل ان واحدة عربيتها تتخبط من عربية تانية و بمكالمة تليفون تتحرك الشرطة و من وراءها الشعب الكريم يمسكوا السواق و ينفخوه... و كل ده و المفروض ان القانون اللي متطبقش في الحالتين موجود ويعني برضه ان العملية نسبية. 
- ان دولة تعداد شعبها ٩٠،٠٠٠،٠٠٠ (تسعين مليون و حبة زيادة كدة ملهومش لازمة) و بعدين تسألهم ازاي راضين بالهم ده (المقصود هنا شخص بعينه) تكون اجابة ال ٩٠،٠٠٠،٠٠٠ بني أدم (الحبة الزيادة لهم رأي تاني و عشان كدة ملهومش لازمة) اجابة ساحقة ماحقة لأنهم ببساطة بيقولوا: اصله مفيش حد تاني... يا نهار كوبية!!!!! تسعين مليون و مفيش حد تاني؟؟!!!! ده مفيهاش غير حدات تانييين.... او يتفلسفوا و يتذاكوا و يعملوها سؤال: و انت عندك حد تاني ينفع؟ أخ، كدة وقعوك الخبثة الواعيين!! رد انت بقي....  او يتخابثوا و يسألوها كدة: امال كنت عاوز حمدين؟؟؟ و هنا يقصدوا يقولوا هو انت انتخبت حمدين يا 'حمار' ؟ او يتمسكنوا و يقلبوها مناحة : مش أحسن من الاخوان اللي خربوا البلد و كانوا حيودونا في داهية.
فهمتوا بقي نظرية النسبية؟  فهو زي ما قولنا كل حاجة نسبية... حتي الخراب نسبي  و الداهية نسبية لأنه مرتبط بالاشخاص و هو ده اللي فشخ النظرية... صح يا سنية؟؟؟

توقيع:
علي حسني


الخميس، سبتمبر 03، 2015

الجريمة

فقدت القدرة علي الكتابة او التعبير بسخرية عن افكاري...
اطفال سوريا يقتلون بكل الطرق...
و الجميع يتفرج و لا يحرك ساكنا...
الصور دي الدليل علي اكبر جريمة في زمننا الحالي...
كلنا شركاء ... الصامتون عند رؤيتهم للجريمة شركاء فيها...
خلص الكلام.



توقيع،
علي حسني

السبت، يوليو 11، 2015

بيحبني... مش بيحبني... بيحبني... مش بيحبني...

نالحالة دلوقت بالظبط زي واحدة ماسكة وردة و قاعدة تخمن و مستنية بختها تقولهولها الوردة... بيحبني... مش بيحبني... بيحبني... مش بيحبني...
اللي بيستني بخته يبان له من قطع ورق الوردة ده انسان تعيس.لما بنشوفه بيصعب علينا و نقول يا حرام ده بينه مضحوك عليه و حد بيشتغله، صح؟ 
لا هو عارف راسه من رجليه و لا افاه من وشه و يا ضنايا قاعد يقطع في ام ورد الجنينة لحد ما شطب عليه و ملا الارض ورق ورد (شكلها من بعيد رومانسي الصراحة) بس لما تقرب تلاقي حالته تصعب عالكافر.
ليه بيصعب علينا (ملحوظة صغيرة: و احنا حتي مش كفار)؟ و ليه بنفتكره مضحوك عليه؟
ايوة السؤال لحضرتك... او للمدام اللي جنبك و ممكن الاخ اللي ورا يساعد في الاجابة برضه هو و المُززةمازيل اللي جنبه ...
السؤال مش صعب للدرجة دي... 
شوية اجابات للمساعدة (نقلب السؤال مالتيپال تشويس)
- الطرف الاول فعلا بيحب الطرف التاني (الله اعلم ليه و ازاي!!!)
- الطرف الاول مضحوك عليه بمزاجه
- الطرف الاول في عرض اي حاجة تفرحه
- الطرف الاول مستني الطرف التاني يصلح اللي انكسر
- الطرف الاول اتصدم قبل كدة كتير ووصل لمرحلة انه بقي حلمنجي (بيحلم يعني) بالحب و الامان... أي حب و اي أمان حتي لو بالكدب
- الطرف الاول و التاني فعلا بيحبوا بعض بس الظروف اللي حواليهم منعاهم و مصورة الموقف علي انه هجس و لعب بالعواطف و العقول...
- الطرف التاني غامض بسلامته و لابس نضارة
- الطرف التاني كداب في اصل وشه و كدب قبل كدة كتييير
- الطرف التاني اغراضه مش نبيلة... ولا كريمة ولا مني ولا حتي عزة
- الطرف التاني ظروفه بؤس و مش قادر يدّي بس عايز ياخد
- الطرف التاني بيغير كلامه كل شوية ما الناس بتنسى... او بتتناسي
- الطرف التاني قال كلام متزوق و يدوّب القلب اللي اصلاً بيتلكك وعايز الامان
- الطرف التاني استغل ظروف الطرف الاول اللي بيدوّر عالأمان و لعبها صح
في كمان الطرف التالت... اه التالت... مش بيقولك اثنان ثالثهما الشيطان... الطرف التالت ده بقي ممكن يكون حاجة من اتنين:
١- موقعاتي و بيحاول يخرب العلاقة بين الطرف الاول و الطرف التاني (شيطان شيطان يعني)
٢- أو معتقد انه شايف الحقيقة لأنه بعيد عن ارض المعمعة و مش متعرض و متأثر بكلام الطرف التاني المعسول و اللي بيغسل المخ و لما يجي يوعَي الطرف الاول بيتشتم (ما هو شيطان بقي وكدة يعني)
و يفرق مع أبونا ايه اننا نعرف مين بيضحك علي مين و لا مين بيضحك علي نفسه؟
همممم نظرية برضه... بيحبني... مش بيحبني....  بيحبني.... مش بيحبني.... حاجة كدة زي تفريعة... ولا قناة... تفريعة.... قناة... بس عارأيك...حتفرق في ايه ما الفلوس اتصرفت و هنقعد ندعي انها ترجع... قول يارب... 
بيحبني... مش بيحبني...

توقيع:
علي حسني