الأحد، فبراير 05، 2012

كنا اربعة ... يا ترى اتنين واتنين لسة أربعة؟

كبرنا مع بعض و الصداقة اتولدت في المدرسة و الجامعة و استمرت برغم السنين و المسافات و ربما ايضا انقطاع الاتصالات ... و علي ذكر العلاقات ايام الشقاوة عطينا سوا و اتشاقينا سوا و اتبسطنا سوا و زعلنا سوا...
كل واحد كان شخصية مختلفة ... يمكن بعض الصفات او الاهتمامات كانت مشتركة انما في الاخر كانت الشخصيات مختلفة... انا مش حاقول اسامي انما حاعمل زي كتب الفضايح (مفيش فضايح متخافوش او متزعلوش) و حاستخدم اول حرفين في الاسم يعني انا علي حسني (ع ح) ماشي؟
نبتدي بقي... "م ق" صديق طفولة اقدر اقول انه المتأنق دائما... البنطلون لازم يكون مكوي و القميص لايق و الجزمة بتلمع فعلا علي طول متأنق ... يمكن شفته في جينز مرات تتعد علي صوابع الايد الواحدة... و بعدين عندنا "ف ع" ده كان الشاطر و الدحيح ... جدول المذاكرة علي التلاجة و الغريب انه كان فعلا بيمشي عليه ... كل مادة لها وقتها ... تحس ان هو كان عارف حيبقي ايه في الحياة و هدفه علي طول قدام عنيه... نيجي بقي ل "ط ن" الجنان اللي علي اصوله ... يعني ايه؟ يعني سواقة عربية من غير سقف في المطرة و لو ده مش جنان مش عارف الجنان يكون ايه....
انا بقي "ع ح" مش عارف اوصفني ازاي بس اكيد مكنتش متأنق يمكن كنت في الحقيقة العكس تماما جينز علي طول الخط و ساعات غطرة فلسطيني و جاكتة واحدة طول السنة و بالنسبة للمذاكرة دي حدوتة تانية خالص يعني اقدر اقول انها مكانتش من اولوياتي ... نيجي بقي للجنان ... لو ممكن اقول ان ركوب عربية مكشوفة تحت المطر جنان فيمكن ركوب العربية بالبيجامة تحت المطر مع "ط ن" في مشوار ساعة رايح و ساعة جاي ممكن نسميه جنان بس مش اوي ... يبقي انا...
المهم اننا كنا مختلفين و كنا متفقين و كنا اصحاب و كنا متنافسين و كنا ستر وغطا و كنا متواطئين و كنا حاجات كتير بس عمرنا ما كنا اعداء او لبعض كارهين... كنا اربعة اصحاب ... اربعة أصحاب بيحبوا بعض...
فاست فورورد لقدام شوية في الزمن كل واحد مشي مشوار حياته زي ما ربنا رسمهوله كلنا اتجوزنا و كل واحد شق طريقه و مشي مشواره...
انا سافرت واتغربت عنهم و عن اهلي و بلدي و "م ق" بقي في مدينتنا و اصبح من رجال الاعمال و "ف ع" شرحه بس اصبح من رجال المال و "ط ن" ترك المدينة و اصبح من رجال الاعمال في المدينة الكبيرة ... و لما اتجمعنا بعد زمن كنا مازلنا اربعة اصحاب... اربعة أصحاب بيحبوا بعض...
فاست فورورد كمان مرة.... و قامت الثورة ٢٥ يناير ٢٠١١ .... الشعب كله أييدها و كله فرح بيها ... اخيرا خلصنا من آل مبارك و الفساد و الظلم و... و بعدين؟
هي دي بقي المشكلة....
انا و "م ق" شايفين ان الثورة لازم تستمر حتي تكتمل...
"ط ن" و "ف ع" شايفين ان الثورة نجحت و يلا نرجع للشغل و بقية طلبات الثورة تكمل مع الوقت...
انا و "م ق" شايفين ان الثورة لو استمرت حتجيب الخير...
"ف ع" و "ط ن" شايفين ان الثورة لو استمرت حتخرب الاقتصاد و البلد...
و الاختلاف في الاراء انا شايف انه طبيعي و صحي و لازم نختلف وإلا تبقي الحياة مملة لو كلنا حبينا نفس الاكل و نفس اللبس و نفس الاتجاهات السياسية... كانت الحياة بقي لونها بني و بقت اخر ملل...
السؤال دلوقت ياتري بقي الاختلافات اللي علي كبر دي ممكن تفسد صداقة العمر تفسد و للود قضية؟ هل الاربعة اصحاب حيبقوا اتنين و اتنين ... يا ترى اتنين واتنين يبقوا أربعة اصحاب ؟

توقيع:
علي حسني

هناك تعليق واحد:

  1. و الله يا "علوة.ح" لو هي مجرد اختلافات في الراي فهي لن تفسد للود قضية. لكن لو الأراء وراها أهواء و مصالح شخصية و عند ممكن ساعتها تبقوا اثنين و اثنين أو اثنين و واحد و واحد. تعبتني معاك يا علي كل شوية أروح لأول المقال علشان أشوف م.ق مين و بعدين أنزل أكمل. انا رأيي لازم نفترض حسن النية في كل الأصدقاءو نفترض إنهم خايفين على البلد زينا تمام و عندما نصل لمرحلة الجدال نوقف النقاش. كل سنة و انتم طيبين

    ردحذف