الخميس، سبتمبر 29، 2011

حكاية شاويش صرخ و قال: «يا حرامية، يا جتلة، حرام عليكم خربتوا البلد».

أنا عبد العاطي السبع، باش شاويش درجة اولي في سجن طرة.... ده كان لحد الاسبوع اللي فات بس.... أني دلوقت شاويش في نجطة مركز كفر البطاماس... أني حاجولكم حكايتي و انتم أحكموا يا باشاوات...
أني من مواليد البحيرة سنة ما الريس اللي فات ما اتجتل... ايوة السادات الله يرحمه لما جتلوه العيال بتوع جماعات الكفار دول يلا ربنا يغفرلهم ... أنا سمعت ان الواد الكوماندة بتاعهم انعدم الله يرحمه راخر... المهم ابويا كان فلاح غلبان أوجري شغال باليومية... كنت انا التالت بعد اخويا براهيم و اخويا محمدين و بعدييه اختي فاطنة الله يرحمها ماتت بالسرطام من كام سنة... ماطوولش عليكم يا باشاوات ... ابويا كان نفسه يعلمنا و يدخلنا الجامعة بس الأيد اصيرة و العين بصيرة.. دخلنا الكتاب و من بعده بعتنا المدرسة اني كملت لحد رابعة ابتدائي اصلي كنت لعبي حبتين و التعليم مكنش كيفي اصلي كان نفسي ابقي ظابط زي الريس اللي انجتل كان الله يرحمه هيبة و جيمة ما كنتش اعرف انني لازم أتعلم لجل ماكون ظابط بس محمدين اخويا جالي علي موضوع العسكرية ده اصل محمدين كمل علامه و خد الابتدائية انما أنا و براهيم فنزلنا الغيط مع أبونا من بدري ... اه و علي فكرة فاطنة كانت اذكانا و كان نفسها تبقي دكتورة لجل تعالج عيال البلد الغلابة لجل تخفف عليهم زي ما كان الدكتور بطرس بيعمل لاهل بلدنا الله يجدس روحه كان دكتور سكرة عمره ما جفل بابه أصاد حد من البلد و عياله زيه تمام بس يا خسارة مهماش دكاترة زيه... فكرة العسكرية كانت تمام حلبس عسكري و امسك مدفع رشاش و احمي اهلي و اهل بلدنا من الجتلة و اللصوص... فدخلت الشرطة و بجيت عسكري و أمي زغرطت و ملت الدنيا زغاريد. يوم ما دخلت عليها بالميري ... كنت فاكر انني حخدم في بلدنا لكن لا العسكرية معناها انك تخدم مطرح ما يجرروا انك تخدم ... انني من حظي ودوني مصر و خدمت في معسكر كبير جوي جوي ... و كل يوم طوابير و صف و الذي منه بس بصراحة اكل أمي كان اجدع ... اسخم حاجة كانت لما يطلعونا و يوجفونا فوج الكوبري من جبل الفجر لحد المغربية ... بس علمونا اننا منشربش مية يومها والا تبجي مصيبة لو الواحد انحصر ... و علي الكوبري بجا مفيش يا ابن بلدي... فكنت بجول لنفسي كأني في رمضان و أصوم يومها... بس انجهرت لما عرفت اننا واجفين الوجفة الوسخة دي علشان الباشا الكبير جوي .. اكبر باشا في البلد ... لا مش الريس... ده الباشا ابنه الكبير... كان رايح لامؤخذة حفلة تبع الحزب الوتني بتاع الباشا ابوه... اموت واعرف بتاع ايه الحزب ده و بيعملوا فيه ايه... المهم فضلت علي الحال ده حوالي سنتين لما نافوخي ساح من الوجفة في الشمس و الشتا مرة للباشا و مرة للست والدته اللي بيقولوا انها خوجاية ... ازاي خوجاية تحكم البلد؟؟ سبحان الله... ما علينا يا باشوات ... اكمل الحكاية... كان في لواء كبير في المعسكر بجيت أنا المراسلة تبعه... مشاوير و شاي و جهوة بصراحة كان باشا كبير جوي ... بس يا ويل اللي يزعله... مرة الواد المراسلة زميلي سعفان زعله و عينك ما تشوف الا النور ... الواد اتسحل يا عين امه... كل الباشوات اتسلوا علي جفاه زي حرامية البولغ في جامع بلدنا... و اتنجل من معسكرنا معرفش علي فين... العبد لله مشي زي جضيب الجطر لا يمين ولا شمال ... كله تمام يا باشا ... اوامرك يا باشا... و الباشا جرر يرجيني فركبلي شريطة و بجيت شاويش مش مجرد نفر.
و اتنجلت مباحث و دي كان اوسخ ايام عيشتي من يوم ما اتولدت... عمري ما كنت اعرف ان البلد كلها مجرمين يا باشاوات... دحنا مكانش يعدي يوم غير و شدين يجي ٥٠ ولا ١٠٠ نفر و الباشوات الظباط كانت تسليتهم التلطيش للمتهمين عاطل علي باطل... و ساعات كنت اسمع الباشا بيتكلم في التلافون مع واحد بيجوله يا دكتور و بعد المكالمة اللي فيها بيسلط الباشا بتاعنا علي حد مزعله و كنا بنشده من بيته و بتبجي ليلة سودة علينا و علي المتهم... نعد نلطش و نجرفه طول اليل لحد ما الباشا يصرفه... كانت بتبقي ليلة غم لحنا فاهمين بنضربه ليه و لا هو فاهم بينضرب ليه و يجعد يسألنا ليه بتضربوني و إحنا نجوله اوامر يا متهم لحد ما واحد منهم صعب عليا فوجفت الضرب و الباشا شافني فدور الضرب عليا أني كمان و أنا اسأله ليه ولا يرد شلاليط و خلاص تاني يوم اتنجلت السجون مش مسجون لَا ... شاويش محترم و هنا كانت أيامي هنا... الشغل خفيف مفيش ضرب و لا إباحة... كان فيه مسجون اسمه سمير ابن حلال كان مدرس اصلا و كان من حدا بلدنا بس مش بلدنا لكن بلد جنب بلدنا و ابتدأ يعلمني بس في السر.. لحد ما بجيت اقرأ الجرنان كله لوحدي... ربنا يكرمه راجل جدع... و ابتديت اجرا جرايد المعارضة و فهمت ايه اللي بيحصل في البلد و يا نهارنا كوبية ده بلدنا اتنهبت و فاطنة اختي ماتت بسبب الكيماوي اللي ابويا كان بياخده من الجمعية و يرش بيه الزرعة ما أنا جريت انه بيسبب السرطام... و الباشا اللي كان بيمر علي الكوبري كان ناوي يورث البلد بعد ما الباشا الكبير يموت ... و الباشا اللي كان بيخلينا نضرب الناس طلع ان الدكتور اللي بيكلمه و يسلطه علي الخلق ده مستوظف كبير في الحزب بتاع الباشا الريس... و كنت اجول سبحان الله بكرة ربنا يخلص البلد منهم و يريحنا إحنا كمان...
في يوم سمعت انه جامت ثورة و حصل لبش في البلد كلها و جاريت وجتها وجتها في الجرايد انه الشعب هاج و خلع الريس و ان الجيش معملش حاجة لحد ما الموضوع سخن و بانت ديته و ان الريس راحت عليه و بعدين قال انه مع الثورة.... كام يوم كده و لقيت السجن بيتوضب و بيتلمع زي ما كان بيحصل لما الباشا مدير السجون حيمر... لكن المرة دي طلع انه جايلنا مساجين باشاوات... اشي اللي اسمه زهير و اللي اسمه صفوت وواحد بتاع مجلس الشعب اسمه سرور وواحد بيجولوا غني جوي جوي فلوسه توكل البلد كلها لحمة طول العمر اسمه عز باشا....و يوم جالنا الباشا اللي الظباط كلهم و الباشوات كلهم بيعظموله تخية عسكرية حتي و هو بالبدلة الزرجة بتاعة المجرمين عندنا في السجن... و في يوم جالنا الباشا ابن الريس و خوه الباشا التاني اللي ابنه مات من كام سنة الله يرحمه... و اتجمعوا الباشوات كلهم عندنا بس في الناحية النضيفة من السجن اللي دهنوها ووضبوها قبل وصولهم كأنهم كانوا عارفين انهم جايين و عايزيين يريحوهم... المسجون بلدياتي الاستاذ سمير وعاني و فهمني اللي حصل و بيحصل... المهم الجماعة دول كانوا مش مساجين خالص ولا علي بالهم انهم عندنا في السجن ... الباشا المأمور بيهزر و يتسامر معاهم و بيعظم للعادلي باشا و اكل من برة و فرش و مراتب و هدوم و زوار وحاجة هنا ... عمري ماشفت مسجون تاني عايش كدة... ده حتي عيشتهم كانت احسن من عيشتي في البلد و حتي من عيشتي دلوقت.... لا و ايه الريس ابوه (الباشا الكبير جوي خالص) اللي كان وأكلها في عبه بينه عيان بس ايه بيتعالج بيقولوا في مشتشفي غالي و فخم اوي و دكاترة من برة و من جوة تقلش بيكرموه... و أنا ابويا الفلاح الغلبان مات عيان عدمان من غير حتي ما نلاقي حلاق صحة يبص عليه ... بصراحة دمي حمي في عروجي... و لجيت نفسي باصرخ و اجول بعلو صوتي.... «يا حرامية، يا جتلة، حرام عليكم خربتوا البلد» يجوموا ينجلوني !!!؟ ليه!!؟؟؟ هما مش مسجونين علشان حرامية برضك و عشان جتلوا الناس الغلابة!!؟؟؟ ولا مسجونين نزاهة!؟؟؟ أني غلط في ايه بس يا باشاوات... أنا غلط في ايه؟؟؟ حد يجوللي....

الحدوتة دي كانت في خيالي اه... بس مش هلوسة.

توقيع:
المهلوس

الأربعاء، سبتمبر 28، 2011

رسالة للمجلس: كداب يا خيشة كداب أوي...



و إحنا عيال طلعوا عينا وقرفونا من كتر ما كانوا علي طول يقولولنا الكذب وحش و ان الكذب حرام و ان اللي بيكذب حيروح النار و...و... و الذ حاجة بقي ان كلنا لما كانوا يسألونا و احنا عيال : عايز تبقي ايه لما تكبر ياحبيبي؟.... لما اكبر عايز اطلع ظابط... هاهاهاهاهاهاهاهاهاها
طب منين يودي علي فين؟؟ عيل عبيط صحيح..... ازاي ابقي ظابط و أنا ممنوع من الكذب .... ازاي ابقي ظابط و أنا ممنوع من الكذب من اهلي و الأهم من ربنا ... ولا الظباط واخدين اعفاء و مسموح لهم بالكذب... باين انه فعلا كده و الدليل اهو:
- قعدوا يذلونا بان الجيش حمي الثورة و بعدين يطلع طنطن و يشهد ان محدش كان بيضرب العيال بالنار وان الشرطة معملتهمش حاجة ... ده طنطن ذات نفسه اللي قال.... طب مادام كدة يبقي الجيش حماها من إيه بالظبط ... من نفسها الامارة بالسوء!!!
- المجلس اعلن انه حيسلم السلطة للمدنيين عن طريق انتخابات حرة خلال ٦ اشهر من الثورة.... بقالنا ٩ شهور و داخلين علي السنة ... و ابقي قابلني!!!!
- عمل الاستفتاء علي كام نقطة تعديل في الدستور وفي الاخر يطلع علينا المجلس بإعلان دستوري من كااااااااااااااااااام نقطة... تهجيس من بلاليس!!!!
- اللواء/الرويني يطلع بمنتهي الفتاكة و يتمنظر بانه كان بيروج إشاعات في الميدان ايام الثورة و بيكدب علي الناس علشان يهديهم.... اهو دلوقتي اتكتم و اختفي من الشاشة تماماً ليه علشان حيبوظ منظر المجلس ولا ايه!!!!
- اللواء/شاهين يطلع يتخانق و يؤكد ان دستور ٧١ اتلغي كله و بعدين يطلع يتخانق و يؤكد ان دستور ٧١ ماتلغاش كله و لكن حتة منه... حتة منه ولا كله... كله ولا حتة منه!!!!
- المشير حاضر في الاجتماع مع مبارك و عمر سليمان و العادلي و عنان وقت الثورة و بيتفرجوا علي العيال بتتساقط في الميدان علي الشاشات قدامهم و علي فكرة القعدة دي متسجلة بالصورة و برضه مايعرفش حاجة... شوف البجاحة!!!
-و بعدين يلبس بدلة و يتمشي يسلم علي الناس اللي لسة من كام يوم مخوزأها و ملبسها العمة !!!!
آمال كذب ايه بقي اللي حرام و غلط و ازاي بلدنا يبقي بيحميها (علي فرضية انه بيحميها مش بيحمي نفسه) مجلس مكون من بينوكيو و اخواته!!!!؟؟؟
علي فكرة أنا واثق ان انا مش الوحيد اللي مركز قوي كده مع المجلس العسكري و ان ناس كتير واخدة بالها من اللي بيحصل و اننا مش هبل زي ما المجلس فاكرنا ولا ايه؟؟؟؟؟؟ ايه؟؟؟؟؟؟ ايه؟؟؟؟؟؟

توقيع:
المهلوس

- Posted using BlogPress from my iPhone


الثلاثاء، سبتمبر 27، 2011

اسمع كلامك أصدقك أشوف امورك ... العن اليوم اللي شفتك فيه

النهاردة تعبان و مفياش دماغ اكتب، بس في كام حاجة حازأني و لو ما نفستش ممكن أنام مصحاش من الغيظ....
- السعودية تسمح للستات بالانتخاب و الترشح
- السعودية تحكم بجلد سيدة لقيادتها سيارة!!!؟؟؟
- عبدالله يسافر من اليمن للعلاج
- عبدالله يعود لليمن !!!؟؟؟
- البحرين فيها مظاهرات
- البحرين بتقول قوي خارجية و أجندات أجنبية، لسة...!!!؟؟؟
- و بعدين صاحبنا اللي في الصورة اللي فوق ... طبعا مش محتاجة تعليق...

دلوقتي بقي كله كوم و ده كوم تاني...
-المشير يشهد لصالح مبارك
- المشير يلبس بدلة و يتمشي في الشارع يسلم علي الناس اللي خوزأها .... !!!!؟؟؟؟

كنت فاكر ان أنا الوحيد المهلوس، انما دلوقت أنا متأكد انه كله يا مهلوس يا كله بيستهبل...

توقيع:
المهلوس

الأحد، سبتمبر 25، 2011

طويل العمر يطوِّل عمره وينصره على من يعاديه هاي هي


بداية احب أقول وأأكد إن الكلام ده كله من واقع الخيال والهلوسة
وليس له أي علاقة بالواقع...
الواقع الإسود والمقرف اللي احنا عايشينه....
اللهم اجعل كلامنا خفيف عليهم...

مقتطفات من شهادته ...
... وللتوضيح ده مندوب دولة 'هام هام ' أو دولة 'نام نام' ...

ليس لدي معلومات عن هذا واعتقد ان هذا لم يحدث

ليس لدي معلومات

ليس لدي معلومات

إنا معنديش معلومات بكده.. الاحتمالات كتير لكن مفيش معلومة عندي

إنا معرفش ايه اللي حصل


هيا معلومات غير مؤكدة بس اعتقد ان هناك عناصر تدخلت


ممكن تكون عناصر خارجة عن القانون

ليس لدي معلومات مؤكدة ولكن ده احتمال موجود



معنديش علم بذلك
أنا ما أعرفش اللى حصل أيه لكن أعتقد إن وزيرالداخلية بيبلغ وممكن ما يكونش مش عارف بس أنا ما أعرفش



توقيع:
المهلوس

العدالة ...اه ... عدالة... عدالة صحيح... عدالة خالص ... عدالة جداً...

هو دة رمز العدالة ... إللي احنا دايماً نشوفه ونقول يا سلام الميزان موزون ١٠٠ /١٠٠  والسيف موجود لتطبيق العدالة وحماية الحق... صح؟ مش دة إللي إتعلمناه وإلي كبرنا على إنه دة الصح.... ولا يصح إلى الصحيح...
طيب ليه دلوقتي الصورة متغيرة ... ليه عايزين يعلمونا ويعودونا على وضع جديد وصورة جديدة ... عايزينا نتقبل الوضع دة على إنه طبيعي و واقع لا مفر منه لأنه لحمايتنا احنا... اه... احنا... أسهل حاجة للسيطرة هي سياسة التخويف ... بس أنهي تخويف؟ تخويف من أيه ومن مين؟ علشان ميبوظوش صورتهم لو خوفونا منهم و يبقوا هما الاشرار  و هما البعبع ... أبو رجل مسلوخة.... انما لا ... هما لعبوها بطريقة تانية.... هما بيخوفونا من بعض وبيقلبونا على بعض... احنا البعبع إللي بيخوفنا ... يعني احنا القاتل والمقتول... احنا البلطجي واحنا الضحية... علشان كدة احنا لازم نتعاقب على اللي احنا عملناه فينا... طبعاً واضح... منطق مفهوم ...أصل احنا شعب غلبان اه ..لكن بلطجي .. ماينفعش نتحاكم قدام محاكم مدنية علشان لازم نتربى ونتحاسب بسرعة على البلطجة اللي احنا بنبلطجها على نفسنا... ماشي في بلطجية حقيقي... اه في.. لكن أيه اللي يمنع انهم يتحاكموا  في محاكمات مدنية؟ أيه المانع؟ ولا احنا مش قد المقام؟؟؟


هل دي هتكون اخرتها ؟ العدالة نفسها تيأس من وجود عدالة وتجيب من الأخر وتقطع دراعها اللي شايل الميزان طالما الميزان مبقاش موزون؟؟؟؟
تبقى مصيبة ... بس برضوا مش لكل الناس ... خليكو معايا... لمبارك والانجال والعصابة عدم وجود عدالة دة نعمة... لما يتحاكموا قدام محكمة مدنية بعد ما قتلوا ونهبوا وأفسدوا دولة كاملة... فين العدالة هنا بقى ؟؟؟ مفيش ... بس ده حلو عشانهم... زي ما بيقولوا : حلوة للئيم و وحشة للكريم .. مش عارف من اللي بيقولوا ...بس .. عديها بقى.... انما المواطن الغلبان بلطجي أو بريء فجري على محكمة عسكرية شغالة بالامر... وطاخ طيخ طوخ اديله حكم وخلص...
انما الجناة الحقيقيين فا حلني بقى لما ينتصوا حكم دة لو حصل.... موت يا حمار... وكلنا عارفين من الحمار... إنت؟ لا .... إنت؟ لا.... إنت؟ لا....  لا إنت ولا هو ولا هو .... وأكيد مش أنا......  يبقى في حد غريب هنا....


توقيع:
المهلوس


الأربعاء، سبتمبر 21، 2011

عارف لما تصحي من النوم الصبح....


من كام سنة اتفرجت علي مسرحية اسمها "باللو" ده اسمها لو الذاكرة لسة شغالة صح...أو لو فعلا الذاكرة ضربت يبقي كان اسمها حاجة تانية...المهم اشرف عبد الباقي كان بيمثل فيها و طالع في دور مؤلف مسرحي علي قده و لما يسالوه عن مسرحيته و يبتدي يحكيها فكان يبتدي بافيه جامد قوي و هو: عارف لما تصحي من النوم الصبح.... و كل مرة يكمله بحدوتة و حاجة مختلفة ... زي لما تصحي من النوم الصبح وتيجي تقوم من السرير و تلاقي الارض ساقعة؟ و هلما جري في جزء كبير من المسرحية... و بعدين يرسملك صورة مكملة... الارض ساقعة و تقعد تدور برجلك علي الشبشب و الارض سااااقعة و الدنيا ضلمة (مش عارف ازاي ضلمة اذا كان صحي الصبح بس يمكن قبل فتح الشبابيك) و مرة تانية ، عارف لما تصحي من النوم الصبح و تمد ايدك تنور النور و تلاقي زرار النور بس سلكه عريان.... و عيش بقي يا معلم ... الفصل التاني للمسرحية كله كده... مش لاقي الشبشب و الارض ساااااقعة و الدنيا ضللللللمة و زرار النور سلكه عرياااان.... انا بقي مش عارف ايه اللي فاكرني بالحدوتة دي و انا بتابع اخبار الثورة و مجلسنا الحبيب الغالي ابن الغالي (عارفين مين الغالي ولا لازم يعني اقول انه مبارك حبيب المهابيل ... ) المهم العلاقة في مخي الضارب بين الحدوتة و الثورة كانت واضحة وضوح السمس لامؤاخذة ...
الشعب قام بالثورة = صحي من النوم الصبح
الدنيا ضلمة = الهدف كان الحرية بس الطريق غير معروف فكله بيحسس
الارض سااااااقعة = موقعة الجمل و خلافه
الشبشب المفقود = تضليل القيادة الحالية و تسويفهم في تلبية مطالب الثورة (اللي مخبيين الشبشب الله يجازيهم علي قد نيتهم و يمشوا حافيين علي أرضية ساقعة تلج و يجيلهم برد في عظمهم زي ما كسروا عظم العيال بتوع الميدان... قولوا يارب)
و الصلة التانية لما الشعب حاول يظبط المسائل و يغير تغيير حقيقي = ينور النور
و ابتدأ بتطبيق ديمقراطي (الاستفتاء/التعديلات الدستورية) = التدوير علي زرار النور
السلك العريان = البيان الدستوري و قانون الانتخابات و عدم تحديد ميعاد الانتخابات...
(و طبعا واضح مين اللي عري ام السلك علشان يكهرب ابو اللي قاموا بالثورة ...)
بعد تفكير علمي عميق و تدقيق و تفحيص و تمحيص لقيت ان الصلة قوية جدا بين الحدوتين... الشعب بيحاول و المجلس بيقاوم لانه لو محاولات الشعب نجحت = انكشف المجلس و سقط مع بقية اللي سقطوا و اتخلعوا...
علي فكرة في المسرحية لما سالوا المؤلف المسرحي (اشرف عبد الباقي) عن اسم مسرحيته تفتكروا اسمها كان ايه....... لو قلتلكوا حتتاكدوا ان فعلا في صلة بينها و بين اللي بيعمله المجلس دلوقت في الثورة...
كان اسمها: حاجة تقرف.... (أه والله).
حاااجة تقرفففف.

توقيع:
المهلوس

الاثنين، سبتمبر 19، 2011

طلع السنيورة ... طلع السنيورة ... تخسر يا مواطن...


مين فينا ملعبش التلات ورقات؟ و لو حتي علي سبيل الهزار!!؟؟
 طيب مين عمره لعبها مع واد حريف ابن حنت (والله معرف يعني ايه حنت دي) المهم ان الواد ده على طول  السنيورة عايشة في كمه و عمرها ما ما تلمس الطرابيزة ... اصلها مبتتكشفش علي رجالة ... اخلاق عالية . طيب مين عمره لعب التلات ورقات مع الواد الحلنجي ده و كسب ؟ اه كسب.. مين كسب؟ طبعا ولا واحد ولا مرة.. يمكن علشان ملعبناش التلات ورقات قبل كدة اصلها لعبة بيئة... مش من مستوانا...و لا يمكن ملعبنهاش علشان القمار حرام و حد الله مابينا وبين الحرام...و لا يمكن لعبنا و مكسبناش ؟؟؟ و ده مش علشان احنا خائبين ... لا طبعا ...عيب ... انما علشان التلات ورقات عمر ما كان فيهم سنيورة... تسألني عرفت ازاي؟ أقولك يا سيدي...
تعال يا باشا ... جرب يا بيه... قرب مني يا فندي... البريزة تكسب ريال و الربع جنيه يكسب نص و الجنيه يكسب اتنين ....بص يا مفتح ... و صحصح يا نايم... و فتحلي يا مصحصح... فين الانتخابات ؟؟؟ طلع الانتخابات... دي ولا دي و لا دي... تخسر يا سيدي ...  كمان مرة ... فين المحاكم المدنية ؟؟ طلع المحاكم المدنية... تخسر يا مواطن... جرب كمان مرة ... ده البريزة تكسب ريال... طلع الدستور .... ايديا اهي في الهواء ... طلع الدستور... فين الدستور... مفيش دستور ... تخسر يا محترم... العب يا بيه علشان تعوض... الجنيه يكسب اتنين... الكارتة الكسبانة ... محاكمة المخلوع ... فين محاكمة المخلوع... شايف محاكمة المخلوع ... تخسر يا استاذ ... عوضك علي الله... تلعب تاني يا افندي ... تعوض و تروح معاك فاكهة للعيال ... تلعب علي الثورة يا أخ؟ فين الثورة...؟ طلع الثورة... ايديا آهه ... في الهواء ... و الكارت علي الطرابيزة ... العب علي الثورة يا باشا.. طلع الثورة يا بيه ... فين الثورة يا افندي؟؟؟  تلعب علي الثورة يا اخ؟؟؟ 

توقيع:
المهلوس

الجمعة، سبتمبر 16، 2011

قالوا: فتش عن المرأة... احنا قلنا: هي فين الولية؟

زمان في بلاد برة قالوا فتش عن المرأة! الحقيقة مش عارف ليه بس شكلها كده حاجة من اتنين : ياإما واحدة عملت مصيبة و طفشانة أو واحدة مزة قوي و عايزينها تعمل كليب جديد يكسر الدنيا...
احنا بقي بقالنا يجي كام شهر بنقول هي فين الولية؟ هي فين الولية؟ هييييييييه فيييييين الولييييية؟؟؟؟؟؟؟؟ و لا حد عبرنا او عبر أهلنا....
و احب أأكد لحضراتكم ان الولية دي بالذات مش مزة و مش حتعمل فيديو كليب بس حتكسر الدنيا ... ايوة حتكسر الدنيا.... تسألوني ازاي؟ اقولكم... صحصحوا معايا و ركزوا شوية... اصلها حدوتة طويلة حبتين بس انا حاختصر...
كل عصابة و لها زعيم ...صح؟ او زعيمة...صح؟ و احنا كان عندنا (الحقيقة لسة عندنا) عصابة و مش اي عصابة... عصابة تسرق الكحل من العين زي ما بيقولوا... و الصراحة العصابة دي كان لها زعيم بس لما كبر و عجز قامت المدام شالت القعدة لحد ما الواد البكري كبر ماشاء الله عليه و شال معاها الحمل و بعدين كمان الواد الصغير ننوس عين امه كبر و خلص تعليمه و شارك في المسؤلية... عيلة متعاونة صح ... و بعدين كل ما الاعمال زادت قاموا زودوا عدد الصبيان و ظبطوا النظام ١٠٠/١٠٠
و بعدين الزعيمة فكرت و قررت ان التخصص هو مفتاح النجاح... و ده حقيقي عمركم سمعتم عن حرامي غسيل بيسرق عربيات؟ ... لا طبعا... التخصص هو الحل و خصوصا لما العملية و النهبة كبيرة... بلد مثلا... المهم المعلمة بعد ما ركنت الزعيم علي الرف ابتدت توزع التخصصات، واد يمسك الفلوس و كان ماشالله عليه لهلوبة مسابش مشروع و لا حتي سبوبة صغيرة غير ما حت صبعه عليها او علي الاقل شارك فيها... و الفلوس ابتدت تتكوم تقولش فلوس حلال ...
المهم و الواد تاني... ده حبيب امه ده ... كانت المعلمة مخططاله تخطيط علي كبير ... كبير أوي... هي برضه واعية و عارفة انه لما المعلم يفييس وهو رجله و القبر بصراحة يعني ممكن البيزنس يبوظ و العيال يروحوا في حديد و لا حاجة ... فقررت تخلي الواد التاني ده يتخصص سياسة ... اه... و فعلا ظبطته مع الصبيان و خليتهم يرسموله فورمة عجب تخليه يظهر و يلعلط كده في الجو ... و الواد كان له صاحب قزعة كده بس دماغه الماظ و ايده تتلف في حرير ظبطه تمام... بس ادينا حسدناه واهو انطص ١٠ سنين ... يا ضنايا يابني أكيد نسوانه التلاته متشحتفين عليه دلوقت... ما علينا اكملكم حدوتة الولية اللي بندور عليها...
و علشان هي واعية و اروبة حسبتها صح... رجالة المعلم القدام برضه خبرة و ايديهم طايلة و لسة فيهم و معاهم مصلحة و مصالح... فا مش من الفكاكة انها و العيال يخسروهم.. فظبططهم هما و عيالهم برضك... اللي ابنه له في البزنيس ظبططه و اللي ابنه محامي لمعته و اللي ملوش في حاجة برضه دلعته ... يعني من الاخر كده كله بقي تبعها و في السليم والزبون اللي ممشيش علي هواها غيرته و جابت رجالتها و رجالة ولاد ال... عيالها يعني...
و علشان اقصر عليكم....
عدت السنين و العيال بتكبر و اتجوزوا وخلفوا و البيزنس بيكبر و السياسة شغالة حلاوة و العصابة القديمة و الجديدة بالرغم انهم مكانوش حبايب قوي يعني بس المصلحة فوق الجميع و المعلمة الصراحة هي و الولاد كانوا عايشين ١٠٠/١٠٠
الواد السياسي كان ساند اخوه في البيزنس اصله كان دارس بيزنس و كان خلاص حيمسك مكان الزعيم ابوه و كله جاهز و متظبط... لحد ما شوية صيع من بتوع الفيسبوك حشروا مناخيرهم في الموضوع وقوموا البلد ما قعدت و الباقي انتم عارفينه... القفلة اللي في الموضوع ان العيال و ابوهم أتشدوا بس اتشدوا سياسة مش سرقة و نهب و بيزنيس تحت الطرابيزة.. لا سياسة!!!!! يعني براءة انشأ الله...
و صبيانهم اتشدوا سرقة و نهب و خدوا احكام !!! يعني الصبيان هما اللي حيشيلوا القعدة يا معلم... واللي حارقني ان المعلمة برة و لا اتشدت ولا الهوا ... اه سحبوها مرة علي القسم قامت ردت شوية من الحصيلة قاموا خرجوها معززة مكرمة!!! في عرف مين ده بقي؟؟؟
لا و الولية دلوقت حرة طليقة و اهي دقني آهه لو مش هي اللي ورا كل البلاوي اللي بتحصل و بيقولوا عليها الثورة المضادة...
هما مش قالوا ان كيدهن عظيم....
وشوفوا انتم القطة بتعمل ايه لو حد قرب من عيالها ... بتبخ فيه و تخربشه و لو يئست بتاكلهم... صح؟ كرسي في الكلوب يعني...
آهه الولية دلوقت شغالة بنظام لا فيها لا أخفيها... عليا و علي أعدائي... كسر ياله...
علشان كده لازم نعرف فين الولية دي و لازم تروح الكلوب مع بقية الفامولية ده لو عايزين تلموا الدور و القعدة.... وإلا....
اللهم بلغت اللهم فاشهد...

توقيع:
المهلوس

- Posted using BlogPress from my iPhone