الأحد، أغسطس 28، 2011

انا لسه صاحي حالا... عادي يعني...

انا لسه صاحي حالا بس كانني نمت ايام و شهور ....اصل انا كنت بحلم حلم غريب جدا جدا... خير اللهم اجعله خير كانه يا خوانا من كام شهر كده قامت هوجة في البلد ... ناس بتسميها ثورة و ناس بتسميها شوية عيال بيهرتلوا و ناس زعلانة و ناس فرحانة....و التليفزيون المصري كان علي طول بيأكد ان مفيش حاجة و الشوارع هادية و كوبري ٦ اكتوبر التمشية عليه تحفة بالليل ... المهم الحلم شغال و قال ايه مبارك راح شرم الشيخ... و طيب ايه الجديد في كده ما هو علي طول في شرم و جيمي و ماما سوزان هما اللي ممشيين المسائل... عادي يعني... لَا انما المرة دي جيمي و علاء و حتي ماما كله طلع علي شرم... جديدة دي... ما علينا سيبكم من آلِ مبارك... التقيل جاي ورا.... اكملكم الحلم بقي.... المهم الثورة (نمشيها ثورة) عمت أرجاء البلاد و كانت المطالب واضحة و محددة : عيش... حرية... عدالة اجتماعية.
مطالب عادي يعني... الناس جاعت و اتظلمت و اتسرقت (يعني بالبلدي كده اتثبتوا و اتقلبوا) ... فخرجوا ينفثوا... عادي يعني ... المهم انه قامت الحكومة بنت ال... دورت فيهم الضرب و التقتيل... مات اللي مات و اتشلفط اللي اتشلفط و عينك ما تشوف الا النور ... سوق جمال يا باشاوات... اه والله... ما هو الحكومة طلعت علي العيال في الميدان شوية بلطجية علي جمال ... ااااااه ....كان حلم غريب صحيح ... ايام الكفار دخلت علي عصر الانترنت و الفيسبوك ... نسيت احكيلكم ان العيال وضبوا و رتبوا للثورة علي النت... مكانش المفروض اكل و أنام علي طول ... هي دي أخرتها... هلوسة حتي و انا نايم... آلِ جمال و حمير آلِ..!!! اكملكوا بقية الحلم الدماغ ده... اسمعوا الحتة دي ... في وسط الزحمة كان في قناصة فوق المباني بيصطادوا العيال اللي في الميدان... شوفتوا بقي و كمان حتة امريكاني خالص... آشد من جيمز الكمبيوتر.... المهم ان الامور بعد شوية هديت و الجيش مسك زمام الامور ووعد انه خلال شهور كله حيرجع ١٠٠/١٠٠ و الحكومة و الحكام و كله كله حيرجع مدني و خلاص بح... سيفيني ... باي باي حكم العسكر...
المهم الحلم كان طوييييييييييل و عدت ايام و ليالي و اسابيع و شهور (في الحلم يعني) و كل حاجة اتحققت و آلِ مبارك اتحاكموا و رؤوس الفساد كمان راحوا ورا القضبان واحد واحد... و مفيش محاكمات للمدنيين قدام محاكم العسكر... كاله بقي عادي خالص بس حلو يعني... و العيش و الحرية و العدالة الاجتماعية بقت عاديييييييي.... بس خلص الحلم ...
ولما صحيت فتحت التليفزيون و لقيت كله زي ماهو قبل ما انام ... عادي يعني... الاخبار بتقول ان اسرائيل ضربت نار علي عساكرنا في سينا و موتتلها كام واحد ... عادي يعني... و مصر ماعملتشي حاجة ... عادي يعني... و قادة الجيش حضروا دورة كرة رمضانية ووزعوا جوائز علي الفرق المشتركة... عادي يعني... أعوذ بالله من الأحلام الغريبة دي... اخر مرة اكل و انام علي طول... انام و احلم وافرح و لما اصحي اتكبس و اتغم... عادي يعني...و لا ايه؟؟؟

تعليق:
المهلوس

- Posted using BlogPress from my iPhone