مبارك قعد علي قلبنا و جزمته علي دماغنا و ايده في جيوبنا لمدة ٣٠ سنة يفكرنا و يذلنا بموضوع الضربة الجوية .... حاجة تعل... كانه مثلا كان في خناقة بين مصر و اسرائيل و صدفة كان مبارك معدي رايح يجيب عيش و لقي الخناقة فدخل فرد عضلاته و لطش لإسرائيل و فض الخناقة و مصر من ساعتها بقت مديوناله بحياتها و حياة عيالها.... مش مثلا انه كان ظابط في الجيش بيؤدي عمله اللي بيقبض عليه مرتب و اللي هو اختاره بمزاجه محدش ضربه علي ايده ... لا مؤاخذة يعني...
دلوقت بقي احنا تقريبا في نفس الموقف بس مع بعض الاختلافات اهمها انه فعلا كان في خناقة ... واحد بلطجي بيثبت و يقلب و بيضرب الناس لمدة ٣٠ سنة وواحد تاني واقف يتفرج لمدة ال٣٠ سنة لحد ما المضروب فاض بيه الكيل و ابتدأ يرد ويصرخ كفاية ضرب لكن البلطجي زود الضرب علي الاخر و هنا المتفرج قام من قعدته و تدخل و فرد عضلاته و فض الخناقة.... حاوضح كلامي شوية.... دلوقت الجيش و للدقة في المعلومة المجلس العسكري بيذلنا انه لما شاف الخناقة بين الشعب و آلِ مبارك و شرطته مخدش جانب مبارك و ضرب الناس انما أخد جانب الثورة (ليه؟؟؟ ميهمناش دلوقتي اهو
حصل و خلاص و الله عليم بما في القلوب)... و علشان كده المفروض نبوس ايدنا وش و ضهر و نحمد ربنا و نقبل الوضع الحالي.... و مين عارف هل حيستمر الوضع ده لمدة ٣٠ سنة جاية... هو ده السؤال؟؟؟ الكلام اللي بيتقال و بيتسمع مايل ناحية لَا مش حيستمر الوضع علي ده الحال... لكن الأفعال و الاعمال "المايلة" ناحية ايوة قاعدين علي قلبكم و الله اعلم لامتي ... اه علشان نحميكم من الصهاينة الوحشين... و الأعداء الداخليين... الوحشيين برضه...
كأنه علشان نحافظ علي البلد من اي عدو برة ولا جوة لازم البلد تتحكم بعسكري!!!!
ليه مينفعش ان كل واحد يعمل شغله و بس:
- الجيش يحمي البلد من برة
- الشرطة تحمي البلد من جوة
- السياسين يمشوا امور البلد الخارجية و الداخلية
يعني كل واحد يشتغل اللي يفهم فيه و بس.... و نعامل ربنا بقي و لو شوية صغنين...
اللي مش عاجبه كلامي مياخدشي عليه... ده كلام واحد مهلوس...
بس علي فكرة هما مش قالوا خدوا الحكمة من أفواه المجانين (و الهلوسة او الجنان واحد).
توقيع:
المهلوس
- Posted using BlogPress from my iPhone