الجمعة، أبريل 29، 2011

الثورة قامت ... الثورة قعدت... و بعدين؟؟؟

طيب ... قامت الثورة و دلوقت قعدت الثورة او يعني ريحت شوية... انتخت يعني...
المهم دلوقت في كلام عن طرح فكرة مشروع قومي تحتاجه مصر الجديدة (مصر الجديدة بمعني مصر بعد ٢٥ يناير مش مصر الجديدة اللي كان ساكن فيها المخلوع اياه) المهم... من ضمن الأفكار المطروحة فكرة تصنيع سيارة مصرية ١٠٠٪. بصراحة عجبتني الفكرة لانها هايلة و عظيمة و انا واثق انه في عقول مصرية و سواعد مصرية قادرة علي تنفيذ المشروع.
و فجأة جاتلي حالة من الرعب و الخوف و الهلع (يعني من الاخر كدة جتتي اتلبشت)
خير اللهم اجعله خير... مش عارف إيه اللي خلاني افتكر الطفل اللي ظهر في التليفزيون من فترة، تلميذ في اولي اعدادي في مدرسة جنوب سيناء في محافظة جنوب سيناء. المذيعة سألته يستهجي كلمة: سيناء .... و عينك ما تشوف الا النور.... ازبلها و اشرب ميتها...
س ن و ... يا نهار ملحوس .... س ن و ... هو ده التعليم في مصر يا عبلة؟؟؟!!! .... تخيلت ان التلميذ تعيس الحظ ده الذي لم يجد مدرسا مؤهلا ولا حتي أستاذا متعلما في مدرسته و اصبح هو المهندس او الفني اللي حيصنع السيارة اللي ١٠٠٪ المصرية اللي بيتكلموا عليها... هنا و نبضي بقي سريع و ضغطي بقي ١٢٠٠/٥٠٠ و سكري دخل علي ملحي و جتلي رعشة لما تخيلت اني سايق العربية المصرية و لما الاشارة احمرت دست الفرامل و بدل متقف انطلقت زي الصاروخ اتاري ركبوا دواسة البنزين مكان دواسة الفرامل و في الليل ولعت نور العربية المساحات اشتغلت و الفتيس لقيته في وسط الكنبة الورانية....و و و يا نهار كوبية دي حادثة أكيد.... و لقيت نفسي بتحير علي ايام العربية الرمسيس!!! .... دي لسة بتجري في شوارع مصر زي الفل من سنة ١٩٦١... لكن دلوقت الحال غير الحال و التعليم غير التعليم .... المهم...... الحمدالله الحادثة مش حقيقة و مجرد هلاوس في خيالي... لكن ممكن يحصل لو التعليم فضل زي ما هو و لو قبلنا ان سيناء تتكتب: س ن و...
النظام المخلوع تعمد تدمير كل حاجة ... حولوا البلد الي صحراء مليئة بالصبار و بالرغم من كده كان في زهور في وسط الصبار.... (تعبير حلو ... صح؟)
انا واثق انه هناك عقول نابغة و نابهة و نابعة من ارض مصر و من اهل مصر .... زي الزهر اللي بيطلع في وسط الصبار.
ما علينا كل ده جميل لكن تصنيع سيارة ١٠٠٪ مصرية مش حينفع بعقل واحد ولا اثنين ولا ثلاثة ولا حتي مئة... اي حاجة في الدنيا محتاجة عقول كتير... عقول متعلمة ... محتاجين جناين مليانة زهور اكتر من الصبار...(اصله عجبني التعبير ده)...
المشروع القومي لابد ان يكون التعليم ... التعليم قبل اي شئ اخر... محتاجين مدرسين متعلمين و أساتذة فاهمين... محتاجين تلاميذ قادرة علي كتابة سيناء : س ي ن ا ء.

توقيع:
ا ل م هـ ل و س

السبت، أبريل 16، 2011

هل قنا تمثل مصر؟؟؟؟


هل قنا تمثل مصر؟
ارجا ان الاجابة تكون : لَا
لو الاعتراض علي المحافظ الجديد لانه غير مؤهل فده حقهم
لو الاعتراض علي المحافظ الجديد لانه معروف فساده فده من حقهم
لو الاعتراض علي المحافظ الجديد لانه لواء سابق فده من حقهم
لو لاعتراض علي المحافظ الجديد لانه جزء من النظام المخلوع هده من حقهم
لو الاعتراض علي المحافظ الجديد لانه في من هو افضل منه فده من حقهم
انما لو لاعتراض عليه لانه قبطي!!؟؟ فده بقي مش من حقهم و مش من حق اي انسان الاعتراض علي الغير بسبب ديانته...
لو نرجع نجاوب علي السؤال: هل قنا تمثل مصر؟ بالرغم انني أتمني ان الاجابة تكون: لَا. الا انني خايف تطلع الاجابة: نعم، قنا تمثل مصر... مصر ال مبارك.. مصر قبل ٢٥ يناير... مصر اللي دمرها ال مبارك و أعوانه علي مدار ٣٠ سنة... مصر اللي التعليم فيها اصبح في الحضيض و الوعي اصبح غير موجود و الجهل اصبح شرع البلاد و الدين اصبح للتفريق بين الناس مش لتجميعهم... لان النظام كان: فرق تسود... كله يكره كله و كله يرفض كله و كله يكفر كله...
دي مصر قبل ٢٥ يناير... لكن إحنا دلوقت مصر بعد ٢٥ يناير... مصر اللي حررها الشعب المصري ... حررها المسلم و القبطي... يعني المسلم و القبطي وقفوا الايد في الايد ضد الظلم و الفساد... ووقفوا كتف في كتف و القلب علي الفلب و صلوا في الميدان...يعني نقف و نصلي مسلمين و أقباط قدام الخالق الواحد في الميدان و نخرج بره الميدان و نرفض بعض و نكفر بعض و نكره بعض ... يا مصريين ... مسلم و قبطي = مصري...... كلنا مصريين....

توقيع:
المهلوس

- Posted using BlogPress from my iPhone

الثلاثاء، أبريل 12، 2011

أه يا قلبي...

فيلم قديييييييييم... الحقيقة في كل الأفلام القدييييييييييمة... الشرير دائماً بيعمل الحركة دي لما يتزنق... ايوة اقصد الحركة الخايبة... قلبي اه.... قلبي.... دوا القلب يا تفيدة (او سوزان)... المهم يقع علي الكرسي و يحط ايده علي قلبه و يقلب عينيه و يتسلبت و تبقي حالته تقطع القلب... و اول ما الموقف يخلص يقوم يفط زي القرد... او البقرة الضاحكة...

تعليق:
المهلوس


- Posted using BlogPress from my iPhone